Read Alur Thangambere 3 Bible Online

Thangambere 3 - Alur bible

Thangambere 3

¹Nwang’u thwol riek ma sagu yedi mange ceke m’i thim ma Yehova Mungu cwio. Man ewacu ni dhaku kumae, Meno te, Mungu wacu kumae, Kud wucam kum nying’ yen ceke m’i podho?

²Man dhakune wacu ni thwol kumae, Kum nying’ yen m’i podho wacopo camu:

³ento kum nying’ yen ma ni i die podho, Mungu wacu kumae, Kud wucam kume moko, kadok amula de kud wumul kume, wumaru tho.

⁴Man thwol uwacu ni dhakune kumae, Wubitho andha ngo:

⁵kum Mungu ng’eyo nia i ceng’ ma wucamu kume moko, e weng’wu biyabre, man wubibedo calu Mungu, ma wung’eyo ko gin ma ber ku gin ma rac.

⁶Man ka dhakune neno nia yen ubedo ber mi cemo, man nia enyayu mutoro i wang’, man nia juketho cwiny kum yende; kara udwok jo riek, egamu kum nying’ yende, e ecamu; man emio ni cware bende ma ni karacelo kude, e ecamu.

⁷E wang’gi yabre gin ario de, man ging’eyo nia gibedo muneru; e gikwoyo ith uboko, gitimo ni kendi igi gigi.

⁸Man giwinjo dwand Yehova Mungu ubewotho i podho i kinde ma yamu mi dieceng’ ukoto: man ng’atu ma nicone ku dhaku pare gipondo gigi ni wang’ Yehova Mungu i kind yedhi mi podho.

⁹Man Yehova Mungu lwong’o ng’atu ma nicone, man ewacu ire kumae, Ini kani?

¹⁰Man ewacu kumae, Awinjo dwendi i podho, man lworo maka, kum abedo muneru; e apondo.

¹¹Man ewacu kumae, ng’a m’uyero iri nia ibedo muneru? Icamu kum nying’ yen, m’ang’olo iri nia kud icami?

¹²E ng’atu ma nicone uwacu kumae, Dhaku m’imio ira ya wabed kude, umio ira en kum nying’ yende, e acamu.

¹³Man Yehova Mungu wacu ni dhakune kumae, Maeni ang’o m’itimo? E dhakune wacu kumae, Thwol ubidha en, man acamu.

¹⁴Man Yehova Mungu wacu ni thwol kumae, Kum itimo maeni, julemi ma sagu lim ceke, man ma sagu yedi m’i thim ceke kubang’e kubang’e; ibimol ku kori, man ibicamu utur ku ba nindo ceke m’ibedo ie kwo:

¹⁵man abinyayu amone i kindwu wuku dhaku, man i kind kodhini ku kodhine: ebicanyu wii, man ibitong’o ufunytiende.

¹⁶Ni dhaku ke ewacu kumae, Abimedo remokum peri dit ku gamuic peri; ibinyolo nyithindho ku remokum; man yeny peri bibedo yo ba cweri, man ebibimo wii.

¹⁷Ni Adamu ke ewacu kumae, Kum iwinjo dwand cegi, man icamu kum nying’yende, m’ang’olo iri pire, awacu kumae, Kud icam kume moko: julamu ng’om i wii; ibicamu jambe ku monjo ku ba nindo peri ceke;

¹⁸ebitwio iri ukudho bende man ucok; man ibicamu uboko lum m’i thim;

¹⁹ibicamu kwen ku kwok i weng’i, cil m’ibidok ko ba ng’om; kum juwodhi kud i ie: kum in i utur, man ibidoko ni utur.

²⁰E ng’atu ma nicone lwong’o nying’ dhaku pare Eva: kum en e meg dhanu ceke ma kwo.

²¹Man Yehova Mungu timo kendi mi lau ni Adamu man ni dhaku pare, man eronyogi ko.

²²Man Yehova Mungu wacu kumae, Nen, ng’atu ma nico doko calu ng’atu acel m’i kindwa, kara eng’ei gin ma ber ku gin ma rac; man kawono, emaru rieyo cinge, man egam kum yen mi kwo bende, ecam de, man ebed kwo rondo ku rondo:

²³ka kumeno Yehova Mungu wodhe woko kud i podho Aden, kara efur ng’om ma jugame i ie.

²⁴Kum kumeno eriemo ng’atu ma nico woko; man eketho Kerubi yo nyangu mi podho Aden, man lebmac mi palamularu m’ulokre kun ku kun, kara ugwok yen mi kwo.