Read Alur Thangambere 30 Bible Online

Thangambere 30 - Alur bible

Thangambere 30

¹Man ka Rahel uneno nia enyolo nyithindho ngo ni Yakobo, nyeko timo Rahel kum nyamin; man ewacu ni Yakobo kumae, Mi ira nyithindho, kadi tek kumeno ngo atho.

²E ng’ecwiny pa Yakobo opo kum Rahel: man ewacu kumae, Abedo ka Mungu, m’ucero iri nyodo m’i ici?

³Man ewacu kumae, Nen, bong’ para ma Bilha, mond i bang’e; kara enyol wi conga, man an bende anwang’ nyithindho ni kume.

⁴Man emio ire Bilha ma bong’ pare ni dhaku: man Yakobo mondo i bang’e.

⁵Bilha gamu ie, man enyolo nyathin ma nico ni Yakobo.

⁶E Rahel uwacu kumae, Mungu poko lembe para, man ewinjo dwanda bende, e emio ira nyathin ma nico: ka kumeno elwong’o nyinge Dan.

⁷Man Bilha ma bong’ pa Rahel ugamu ie kendo, man enyolo nyathin ma nico mir arionde ni Yakobo.

⁸Man Rahel uwacu kumae, Wapiembra ku nyamira ku piem ma dit, man asagu: man elwong’o nyinge Naftali.

⁹Kinde ma Leya neno nia eweko nyol, egamu Zilpa ma bong’ pare, man emie ni Yakobo ni dhaku.

¹⁰E Zilpa ma bong’ pa Leya nyolo nyathin ma nico ni Yakobo.

¹¹Man Leya wacu kumae, Miero! man elwong’o nyinge Gad.

¹²Man Zilpa ma bong’ pa Leya nyolo nyathin ma nico mir arionde ni Yakobo.

¹³Man Leya wacu kumae. An a jamutoro! kum nyir gibilwong’a jamutoro: e elwong’o nyinge Acer.

¹⁴Man Ruben ucidho i nindo mi mwoka nganu, man enwang’u nying yen i podho, e ekelogi ba Leya ma min mire. Rahel ulund uwacu ni Leya kumae, Akwei, mi ira kum nying yen pa wodi moko.

¹⁵Man ewacu ire kumae, En e lembe ma nyanok nia imayu cwara woko kud i bang’a? man ibimayu nying yen pa woda bende? E Rahel uwacu kumae, Ka kumeno ebivuto kudi i diewor maeni kum nying yen pa wodi.

¹⁶Man Yakobo ai kud i podho uthieno, e Leya cidho woko nirombo kude, man ewacu kumae, Ibik omondo i bang’a be; kum alonyi andha ku nying yen pa woda. Man evuto kude diewor maeca.

¹⁷E Mungu winjo dwand Leya, man egamu ie, man enyolo nyathin ma nico mir abije ni Yakobo.

¹⁸Man Leya wacu kumae, Mungu mio ira sukulia para, kum amio bong’ para ni cwara: e elwong’o nyinge Isakar.

¹⁹E Leya gamu ie kendo, man enyolo nyathin ma nico mir abusiende ni Yakobo.

²⁰Man Leya wacu kumae, Mungu mio ira bete ma ber; kawono cwara bibedo kuda, kum anyolo ire nyithindho ma co abusiel: e elwong’o nyinge Zebulun.

²¹Man yo ku ng’eye enyolo nyathin ma nyaku, man elwong’o nyinge Dina.

²²Man Mungu poi kum Rahel, e Mungu winjo dwande, e eyabu ie.

²³Man egamu iet, enyolo nyathin ma nico: man ewacu kumae, Mungu kabu cac para woko:

²⁴man elwong’o nyinge Yusuf, ewacu kumae, Yehova med ira nyathin ma nico mange.

²⁵Man etimbre, kinde ma Rahel unyolo Yusuf, nia Yakobo wacu ni Laban kumae, Cika, kara acidh kakara ma dhe, man ba ng’om ma thuwa.

²⁶Mi ira mon para man nyithindho para m’atimo iri pigi, man wek acidhi: kum ing’eyo tic para m’atimo iri.

²⁷Man Laban uwacu ire kumae, Tek kawono anwang’u bero i weng’i, koibed tundu: kum aneno nia Yehova mio mugisa ira ni kumi.

²⁸Man ewacu kumae, Wac ira pi sukulia peri, man abimie.

²⁹Man ewacu ire kumae, Ing’eyo maram atimo ko iri, man maram lim peri bedo ko kuda.

³⁰Kum ibedo ko nyanok ma fodabino ngo, man enyai edoko ni udul; man Yehova mio mugisa iri ka ceke ma tek alokra i ie: ka kumeno abitimo tic mi ot para ma dhe ke awene?

³¹Man ewacu kumae, Abimio iri ang’o? Man Yakobo wacu kumae, Ibimio ira gin moko ngo: tek ibitimo gin maeni ira, abikwayu udul rombe kendo man abigwoke.

³²Abikadhu ku kind udul lim peri ceke tin, man abikoyo ku keca lim kubang’e kubang’e ma kume cwinyo man m’utir, man ma col kubang’e kubang’e ma kind rombe, man m’utir man ma kume cwinyo i kind diegi: man wadi ma kumeno bibedo ni sukulia para.

³³E kumeno bedopwe para binyutho pira ma cen, i kinde m’ibibino pi sukulia para ma ni i weng’i: ku ba lim ceke ma kume cwinyo ngo, man m’utir ungo i kind diegi, man ma col ungo i kind rombe, tek junwang’u i bang’a, jubiwacu nia jukwalu akwala.

³⁴Man Laban uwacu kumae, Nen, ayenyo ebed calku lembe peri.

³⁵Man i ceng’ maeca ekoyo nyogi diegi ma kumgi thumo man ma kumgi cwinyo, ku mege diegi ceke m’utir man ma kumgi cwinyo kubang’e kubang’e, ma kumgi cwinyo tar, man ma col ceke ma kind rombe, man emiogi i cing wote;

³⁶man eketho woth mi ceng’ adek i kindgi giku Yakobo: man Yakobo kwayu dong lim pa Laban.

³⁷Man Yakobo gamu ire dund yend upok, man akpalakpala, man mir atego; man ealu korgi moko dong’ tar, man eketho kor dund yen unen tar.

³⁸Man eketho dund yen m’ealu i wang’ udul lim i ka ma ungoli ma gimadhu ie pi ni i ie, i ka ma udul lim gibino nimadhu ie pi; e giporo nwang’u gibino madhu pi.

³⁹E udul lim gidhuro i wang’ dund yen, man udul lim ginyolo nyithindhgi ma kumgi thumo, m’utir, man, ma kume cwinyo.

⁴⁰E Yakobo koyo nyithi rombe, man eketho wang’ udul lim yo ba ma kumgi thumo man yo ba ma col ceke ma i udul lim pa Laban: man ekoyo udul lim pare gire, man ekethogi ngo bang’ udul lim pa Laban.

⁴¹Man etimbre, nia kinde ma tek lim ma tek ma kind udul lim udhuro, nia Yakobo ketho dund yen i wang’ udul lim i ka pi, kara gipor kind dund yen;

⁴²ento tek udul lim kumgi ng’ic, ekethogi i ie ngo: kum kumeno ma kumgi ng’ic gi pa Laban, man ma kumgi tek gi pa Yakobo.

⁴³E ng’atuno nyai apila, man ebedo kud udul lim dupa, man bong’ ku jumiru, ku ngamia man kana.