Read Alur Thangambere 32 Bible Online

Thangambere 32 - Alur bible

Thangambere 32

¹E Yakobo cidho i yo pare, man malaika pa Mungu girombo gikude.

²Man ka Yakobo nenogi ewacu kumae, Maeni udul pa Mungu: man elwong’o nying’ kakeca Mahanaim.

³E Y akobo oro kwenda i wang’e bang’ Esau m’umin mire ba ng’om mi Seir, ma podho pa Edom.

⁴Man eng’olo igi ewacu kumae, Wubiwacu kumeni ni rwoth para ma Esau: Jatic peri ma Yakobo wacu kumae, Abedo ni umondo ba Laban, man cil ku kawono de adong’:

⁵man abedo ku koni dhiang’, ku kana, man udul lim, ku jumiru, man bong’: e aoro kara juyer ni rwoth para, kara anwang’ bero i weng’i.

⁶Man jukwenda gidwogo ba Yakobo, giwacu kumae, Wawok bang’ umeru ma Esau, man kendo ebebino rombo kudi, ku dhanu dak ang’wen ma ni kude.

⁷E ang’abacwiny ku lworo lund utimo Yakobo dit: man epoko dhanu ma ni i bang’e, man udul rombe, kud udul dhiang’, kud udul ngamia, ni ungu ario;

⁸man ewacu kumae, Tek Esau bino bang’ ungu acel, man egoye, ungu m’udong’ bilund both.

⁹Man Yakobo wacu kumae, E Mungu pa kwara ma Ibrahim, man Mungu pa vwa ma Isak, E Yehova, m’iwacu ira kumae, Dok ba ng’om ma thu, man ba wat peri, man abitimi ber:

¹⁰aromo ngo ku mer mi bero ma nok ceke man mi lemandha ma nok ceke, m’inyutho ni jatic peri; kum akadhu ku wi Yordan maeni kud uluth para; man kawono adoko ni ungu ario.

¹¹Akwei, bodha kud i cing umira, kud i cing Esau: kum alwore, emaru bino goya, meg nyithindho ku nyithindho.

¹²E iwacu kumae, Abitimi ber andha, man abiketho kodhini calu kwio ma dhu nam, ma copo kwandre ngo ni udulne.

¹³E egonjo keca i diewor maeca, man egamu kum piny m’ebedo ko ni moth ni Esau m’umin mire:

¹⁴mege diegi dak ario man nyogi diegi pier ario, ku mege rombe dak ario, man nyogi rombe pier ario,

¹⁵mege ngamia ma weg cak pier adek ku nyithindhgi, mege dhiang’ pier ang’wen ku thwoni apar, mege kana pier ario man thwonine apar.

¹⁶Man emiogi i cing’ jutic pare, udul kubang’gi kubang’gi tung’ tung’, man ewacu ni jutic pare kumae, Wukadh lokaca i wang’a, man wuwek kind udul ubed thwolo.

¹⁷Man eng’olo ni ng’atu m’utelo yo, ewacu kumae, Kinde ma Esau m’umira rombo kudi, man epenji, ewacu kumae, In i pa ng’a? man icidho kani? man maeni pa ng’a i weng’i?

¹⁸ibilund wacu kumae, Gi pa jatic peri ma Yakobo: en e giramia ma juoro ni rwoth para ma Esau: man, nen, en bende eni i ng’eiwa.

¹⁹Man eng’olo ni mir arionde bende, man ni mir adege, man ni dhanu ceke m’ulubo udulne, ewacu kumae, Wubiweco kumeni ni Esau, ka wurombo kugi;

²⁰man wubiwacu kumae, Man kendo, nen, Yakobo ma jatic peri ni i ng’eiwa. Kum ewacu kumae, Abiyiko kindwa ku giramia m’ucidho i wang’a, man yo ku ng’eye abineno wang’e; kuno nyo ebijola.

²¹Kum kumeno giramia kadhu i wang’e: man en gire egonjo i diewor maeca i kind ungu.

²²Man eai malu i diewor maeca, man egamu mon pare ario, ku bong’ pare ario, man nyithindho pare apar wi acel, e ekadhu lokaca ku wi kakadhu mi kulo Yabok.

²³E egamugi, man eketho gikadhu kulone, man eketho piny m’ebedo ko bende kadhu.

²⁴E Yakobo dong’ kende; man ng’atu moko nyego kude keca cil ma piny uru ko.

²⁵E kan eneno nia esage ngo, emulo ng’et bambe; e ng’et bamb Yakobo wil, kinde ma ginyego gikude.

²⁶Man ewacu kumae, Wek acidhi, kum piny ulero. Man ewacu kumae, Abiweki ngo icidhi, tek imio ira mugisa ngo.

²⁷Man ewacu ire kumae, Nyingi ng’a? Man ewacu kumae, Yakobo.

²⁸E ewacu kumae, Jubilwong’o nyingi Yakobo kendo ngo, ento Israel: kum inyego ku Mungu man ku dhanu, e isagu.

²⁹Man Yakobo penje ewacu kumae, Akwei, wac ira nyingi. Man ewacu kumae, Nedi ipenjo nyinga? E emio mugisa ire keca.

³⁰Man Yakobo Lwong’o nying’ kakeca Penuel: kum, ewacu kumae, Aneno Mungu wang’ ku wang’, man kwo para both.

³¹Man ceng’ udongo i wie kan ekadhu Penuel, man ekomo akoma ni bambe.

³²Kum kumeno nyithindho mir Israel gicamu ler mi dir ma ni wi ng’et bamb ungo, cil i ceng’ maeni: kum emulo ng’et bamb Yakobo i ler mi dir.