Read Alur Thangambere 33 Bible Online

Thangambere 33 - Alur bible

Thangambere 33

¹E Yakobo ting’o wang’e malu, man eneno, man, nen, Esau bebino, man dhanu dak ang’wen ni karacelo kude. Man epoko nyithindho ba Leya, man ba Rahel, man ba bong’ ario.

²Man eketho bong’ ku nyithindho migi gitelo yo, man Leya ku nyithindho pare yo ng’eigi, Rahel ku Yusuf de gidong’ cen.

³Man en gire ekadhu lokaca i wang’gi, e erum gire i ng’om wang’ abiro, maram etundo ko ceng’ni bang’ umin mire.

⁴Man Esau ringo kara eromb kude, e egwake, man epodho i ng’ute, e ecwio limbe: man giywak.

⁵E eting’o wang’e malu, man eneno mon ku nyithindho; e ewacu kumae, Maeni pa ng’a ma ni kudi? Man ewacu kumae, Nyithindho ma Mungu mio ni jatic peri ku berocwiny.

⁶Bong’ gilund gibino ceng’ni, gin ku nyithindhgi, e girum gigi.

⁷E Leya bende ku nyithindhe gibino ceng’ni, man girum gigi: man yo ku ng’eye Yusuf ubino ceng’ni giku Rahel, e girum gigi.

⁸Man ewacu kumae, Itimo ang’o kud ungu maeni ceke m’arombo kudo? Man ewacu kara anwang’ bero i wang’ rwoth para.

⁹Man Esau wacu kumae, Abedo ku m’uromo, umira; wek maeno m’ibedo ko ubed peri.

¹⁰Man Yakobo wacu kumae, Ungo, akwei, tek kawono anwang’u bero i weng’i, dong’ ijol giramia para kud i cinga; kum aneno weng’i calu ng’atu m’uneno wang’ Mungu, man mutoro nyai i weng’i, ni kuma.

¹¹Gam, akwei, giramia para ma jukelo i beng’i; kum Mungu timo ku berocwiny i bang’a, man kum abedo ko m’uromo. Man ecuke, e egame.

¹²Man ewacu kumae, Dong’ watugu woth mwa, man wacidhu, e abicidho i weng’i.

¹³Man ewacu ire kumae, Rwoth para ng’eyo nia nyithindho gi tek ungo, man udul rombe ku dhok ma ni kuda gibedo ku nyithindhgi: man tek gilekogi ma sagu i ceng’ acel, udulne ceke bitho.

¹⁴Akwei, dong’ rwoth para kadh lokaca i wang’ jatic pare: man abiywaira yo yo, calu woth mi lim ma ni i wang’a man calku woth mi nyithindho, cil m’abino ko ba rwoth para ba Seir.

¹⁵E Esau wacu kumae, Nie dong’ awek dhanu moko m’i bang’a i beng’i. Man ewacu kumae, Nedi ke? dong’ anwang’ bero i wang’ rwoth para.

¹⁶Kum kumeno Esau dok i ceng’ maeca i yo pare ba Seir.

¹⁷Man Yakobo wotho ba Sukoth, man egomo ire ot, man eriko dwol ni lim pare: ka kumeno nying’ kakeca julwong’o Sukoth.

¹⁸E Yakobo bino i kwiocwiny bang’ adhura mi Cekem, ma ni i ng’om Kanan, kinde m’eai Padan-aram; man egonjo i wang’ adhurane.

¹⁹Man eng’iewo ng’et ng’om, ka m’eguro ie hema pare, i cing’ nyithindho pa Hamor, ma won Cekem, ku ng’et mola ma tar dak acel.

²⁰Man eguro pemblam keca, man elwong’e El-Elohe-Israel.