Read Alur Thangambere 35 Bible Online

Thangambere 35 - Alur bible

Thangambere 35

¹E Mungu wacu ni Yakobo kumae, Ai malu, idh malu kum Beth-el, man ibed keca: man itim pemblam ni Mungu keca, m’unyuthre iri kinde m’iringo kud i wang’ Esau m’umeru.

²Yakobo lund uwacu ni juode, ku dhanu ceke ma gini kude kumae, wucor mungu ma juwirok cen ma ni i kindwu, man wudwokru giwu leng’, wulok kendi mu de:

³man wek waai, waidh malu de kum Beth-el; e abiguro pemblam ni Mungu keca, m’uloko ira lembe i ceng’ mi can para, ma wabedo wakude i yo m’acidho i ie.

⁴E gimio mungu ma juwirok ceke ma gini i cing’gi ba Yakobo, ku nzir ma ni i ithgi; e Yakobo yikogi the bongu ma ni i Cekem.

⁵E giwotho: man ndiri pa Mungu ni wi adhura m’utiekogi gbur, e gilubo tok wot Yakobo ngo.

⁶Kum kumeno Yakobo bino Luz, ma ni i ng’om Kanan (ma en e Beth-el), en ku dhanu ceke ma ni kude.

⁷E eguro pemblam keca, man elwong’o kakeca El-beth-el; kum Mungu nyuthre ire keca, kinde m’eringo kud i wang’ umin.

⁸E Debora ma jagwok Rebeka tho, man juyike the Beth-el the bongu: man julwong’o nyinge Alonbacuth.

⁹E Mungu nyuthre ni Yakobo kendo, kinde m’eai Padan-aram, man emio mugisa ire.

¹⁰E Mungu wacu ire kumae, Nyingi Yakobo: nyingi jubilwong’o Yakobo kendo ngo, ento Israel bibedo nyingi: man elwong’o nyinge Israel.

¹¹E Mungu wacu ire kumae, An a Mungu ma Jategokpo: nyai man imedri; thek man udul thek biai i beng’i, man ju m’ubimo biai kud i kumi;

¹²e ng’om m’amio ni Ibrahim kud Isak, abimie iri, man abimio ng’ombe ni kodhini yo ng’ei.

¹³E Mungu ai woko kud i bang’e i ka m’eweco ie kude.

¹⁴Man Yakobo guro mbegi i ka m’eweco ie kude, mbegi mi kidi: man ekonjo lam m’amadha i wie, man ekonjo mo i wie.

¹⁵E Yakobo lwong’o nying’ ka ma Mungu weco ie kude kumae, Beth-el.

¹⁶Man giwotho ma giai ko i Beth-el; man fodi gitundo ngo Efrath: e moc ugoyo Rahel, man esendre dit.

¹⁷E etimbre, m’esendre dit, nia ng’atu m’ucole wacu ire kumae, Lworo kud unegi; kum kawono ibibedo ku nyathin ma nico mange.

¹⁸Man etimbre, kinde ma ng’eyong’ec pare becidho (kum etho), nia elwong’o nyinge Ben-oni: ento won ulwong’e Benyamin.

¹⁹E Rahel utho, man juyike i yo ma tundo Efrath (ma en e Beth-lehem).

²⁰E Yakobo guro mbegi wi liende: ma en e Mbegi mi liend Rahel cil i ceng’ ma tin.

²¹E Israel uwotho, man eguro hema pare loka ot ma wiu pa Eder.

²²Man etimbre, kinde ma Israel ubedo i ng’om maeno, nia Ruben ucidho man evuto ku Bilha ma dhaku m’araga pa won: man Israel uwinjo pire. Nie wot Yakobo gin apar wi ario:

²³wot Leya gi eni: Ruben, ma kayu pa Yakobo, man Simeon, ku Lawi, man Yuda, man Isakar, ku Zebulun;

²⁴man wot Rahel gi eni: Yusuf man Benyamin;

²⁵man wot Bilha, ma bong’ pa Rahel gi eni: Dan man Naftali;

²⁶man wot Zilpa, ma bong’ pa Leya gi eni: Gad man Acer: maeni gi wot Yakobo, ma junyolo ire i Padan-aram.

²⁷Man Yakobo bino bang’ Isak ma won i Mamre, ba Kiriath-arba (ma en e Hebron), ka ma Ibrahim kud Isak gibedo ni umondo i ie.

²⁸Man ceng’ pa Isak gi rundi dak acel ku pier abora.

²⁹E Isak umwonyo cwinye, man etho, e jucoke ba juthugi, m’eti m’epong’ ku ceng’ de: e Esau ku Yakobo ma wote giyike.