Read Alur Thangambere 37 Bible Online

Thangambere 37 - Alur bible

Thangambere 37

¹E Yakobo bedo i ng’om ma won ubedo i ie ni umondo, i ng’om Kanan.

²Maeni dhanum’utuk pa Yakobo. Yusuf, ma rundi pare apar wi abiro, ubekwayu udul rombe karacelo ku utumin mire; man en e nyathin karacelo ku wot Bilha, man ku wot Zilpa, ma gi mon pa won: e Yusuf ukelo rwonglembe ma rac pi joca ba weggi.

³Nwang’u Israel umaru Yusuf ma sagu nyithindho pare ceke, kum en e wode mi tio pare: man etimo ire kanzu ma ju kite.

⁴Man utumin gineno nia weggi mare ma sagu utumin mire ceke; e gidage, man gicopo weco ber ungo i bang’e.

⁵E Yusuf uleko lek, man eyero lekne ni utumin mire: man gidage kendo m’usagu.

⁶Man ewacu igi kumae, Akwayuwu, wuwinj lek maeni m’aleko:

⁷kum, nen, wabetwio dhu cam i podho ni kanga, man, nen, kanga para ai malu, man ecungo atira bende; man, nen, kanga mu gibino gitieko kangane, man girum ni kanga para.

⁸E utumin mire wacu ire kumae, Ibibimo wiwa andha? kadi ibicamu ker i wiwa andha? Man gidage kendo m’usagu kum lek pare, man kum lembe pare.

⁹Man eleko lek mange kendo, e eyere ni utumin mire, man ewacu kumae, Nen, aleko lek kendo; man, nen, ceng’ ku dwi man cero apar wi acel girwo ira.

¹⁰Man eyere ni won, man ni utumin mire; e won ujuke, man ewacu ire kumae, Lek m’ileko maeni en e ang’o? An ku meru man utumeru wabibino wabirum giwa i ng’om i beng’i andha?

¹¹E kumira nego utumin i kume; ento won ukanu lembene i pidoic.

¹²E utumin mire gicidho nikwayu udul rombe pa won i Cekem.

¹³E Israel uwacu ni Yusuf kumae, Utumeru gikwayu udul rombe i Cekem ungo? bin, abiori i bang’gi. Man ewacu ire kumae, Anuti.

¹⁴Man ewacu ire kumae, Cidh kawono, nen tek utumeru gibedo ber, man udul rombe de gibedo ber; man idwok lembene ira kendo. Kum kumeno eore kud i poga mi Hebron, man ewok Cekem.

¹⁵Man ng’atu moko nwang’e, man, nen, ebewire rr i thim: man ng’atuca penje, ewacu kumae, Ibeyenyo ang’o?

¹⁶Man ewacu kumae, Abeyenyo utumira: akwei, yer ira ka ma gikwayu ie udul rombe.

¹⁷Man ng’atuca wacu kumae, Giai ku keni; kum awinjo giwacu kumae, Dong’ wacidhu Dothan. Man Yusuf ucidho tok utumin mire, man enwang’ugi i Dothan.

¹⁸E ginene ku bor, man ka fodi ewok ceng’ni i bang’gi ngo, gipido lembe i kume kara ginege.

¹⁹Man giwecri gigi, giwacu kumae, Nen, jalek maeni bebino.

²⁰Ka kmneno wubin kawono, wek wanegue, man wabeyue i vur moko, e wabiwacu kumae, Yedi ma rac ucame: man wabineno gin ma biwok kum lek pare.

²¹E Ruben uwinjo maeni, man ebodhe kud i cing’gi, e ewacu kumae, ku wakebu kwo pare.

²²E Ruben uwacu igi kumae, Kud wuthwog rimo; wubaye i vur maeni ma ni i yamba, ento kud wuketh cingwu i kume: kara ebodhe kud i cing’gi, edwoke de ba won.

²³Man etimbre, kinde ma Yusuf ubino ba utumin mire, nia giwodho kanzu ku kum Yusuf, kanzu ma ju kite ma ni i kume;

²⁴e gigame, man gibole i vur: nwang’u vuje ie nanu, pi moko mbe i ie.

²⁵E gibedo piny kara gicam kwen: man ging’ayu wang’gi malu e gineno, man, nen, piro mi Juicmaeli ubebino m’uai Gilead, ku ngamia migi m’uyeyo yath ma jwa jwa man mo ma ng’wice ng’ar man udog yen, gibecidho kude piny i Misiri.

²⁶E Yuda wacu ni utumin mire kumae, Kulokane ang’o tek wanego umegwa man wamung’o pi rimbe?

²⁷Wubin, man dong’ wang’ieue ba Juicmaeli, man cingwa kud ubed i kume; kum en e umegwa, ring’kumwa. E utumin mire giwinjo dwande.

²⁸Man Jumidiani ma jukuloka, gikadhu; e giwodho Yusuf giting’e kud i vur, man ging’iewo Yusuf ba Juicmaeli ku sente mi mola ma tar pier ario. E gikelo Yusuf i Misiri.

²⁹Man Ruben udwogo ba vur; man, nen, Yusuf umbe i vuje; e eyeco kendi pare.

³⁰Man edok ba utumin mire, man ewacu kumae, Nyathinne mbe; man an, abicidho kani?

³¹E giting’o kanzu pa Yusuf, man ginego nyok diel, man giroyo kanzu i rimbe;

³²man gioro kanzu ma ju kite, e gikele ba weggi, man giwacu kumae, Wanwang’u maeni: koing’i kawono tek en e kanzu pa wodi kadi ungo.

³³Man eng’ie, ewacu de kumae, En e kanzu pa woda; yedi ma rac ucame; juyeco i Yusuf tung’ tung’ andha.

³⁴E Yakobo yeco kendi pare, man etwio gonia i piere, eywak de pi wode ceng’ dupa.

³⁵E wote ceke ku nyige ceke giai malu kara gijuke; ento ekwero juk; man ewacu kumae, Kum abiloro piny ba woda i liel ku ywak. Man won uywak pire.

³⁶Kum Jumidiani ging’iewe i Misiri ba Potifar, ma jego pa Farao, ma jadit mi jukur.