Read Alur Thangambere 38 Bible Online

Thangambere 38 - Alur bible

Thangambere 38

¹Man etimbre i nindo maeca, nia Yuda loro piny ku ba utumin mire, man elokre ba ng’atu ma Jaadulami, ma nyinge Hira.

²Man Yuda neno nyaku pa Jakanani moko keca ma nyinge Cua; man egame, e emondo i bang’e.

³Man egamu ie, e enyolo nyathin ma nico; man elwong’o nyinge Er.

⁴Man egamu ie kendo, e enyolo nyathin ma nico; man elwong’o nyinge Onan.

⁵Man enyolo nyathin ma nico kendo, e julwong’o nyinge Cela: man eni i Kezib, kinde m’enyole.

⁶Man Yuda gamu dhaku ni Er ma kayu pare, ma nyinge Tamar.

⁷Man Er, ma kayu pa Yuda, e jadubo i wang’ Yehova; e Yehova nege.

⁸Man Yuda wacu ni Onan kumae, Mond ba dhaku p’umeru, man itim gin m’umaku piny p’umin cwar dhaku i bang’e, man iting’ kodhi ni umeru.

⁹Man Onan ung’eyo nia kodhi bibedo pare ngo; man etimbre, kinde m’emondo ba dhaku p’umin, nia eoyo kodhine i ng’om, kara kud emi kodhi ni umin.

¹⁰Man gin m’etimo bedo rac i wang’ Yehova: man enege bende.

¹¹Yuda lund uwacu ni Tamar ma ci wode kumae, Bed jamusuma i ot pa wuru, maram Cela ma woda bidongo ko; kum ewacu kumae, Emaru tho bende, calu utumin mire. Man Tamar ucidho man ebedo i ot pa won.

¹²Man ka nindo kadhu nya Cua, ma ci Yuda, utho; man Yuda jukre, e eidho malu ba junyar yuk rombe pare ba Timna, en ku jarimbe ma Hira ma Jaadulami.

¹³E juyero maeni ni Tamar, juwacu kumae, Nen, kwaru cidho malu i Timna kara enyar yuk rombe pare.

¹⁴Man ekabu kendi mi ywak pare woko, man eumbre gire ku bongu pare mi wang’, man etwire ku bongu, e ebedo dhugang’ pa Enaim, ma ni i yo mi Timna; kum eneno nia Cela dongo, man jumie ire ngo ni dhaku.

¹⁵Kinde ma Yuda nene, ewacu nyo en e won asara; kum eumo wang’e.

¹⁶Man elokre i bang’e ku dhu yo, e ewacu kumae, Akwei, bin wek amond i wii: kum eng’eyo ngo nia en e ci wode. Man ewacu kumae, Ibimia ang’o, kara imond i wia?

¹⁷Man ewacu kumae, Abioro iri nyathi diel ku bang’ udul diegi. Man ewacu kumae, Ibimio ira mukwatu, ma fodi k’iore ngo?

¹⁸Man ewacu kumae, Mukwatu ma nedi m’abimio iri? E ewacu kumae, Ayi peri, man thondh pieri, kud uluth peri ma ni i cingi. Man emiogi ire, man ebino i bang’e, e egamu ie kude.

¹⁹Man eai malu, ecidho de, man ekabu bongu m’i wang’e kud i kume, e ekendo kendi mi ywak pare de.

²⁰E Yuda oro nyathi diel ma kind diegi ku cing’ jarimbe ma Jaadulami, kara egam mukwatu kud i cing’ dhakune: ento enwang’e ngo.

²¹Elund epenjo dhanu ma i ka m’ebedo i ie, ewacu kumae, Won asara ma bedo dhu yo i Enaim eni kani? E giwacu kumae, Won asara bedo keni ngo.

²²E edwogo ba Yuda, man ewacu kumae, Anwang’e ngo; man dhanu ma kakeca bende giwacu kumae, Won asara moko mbe ma bedo keni.

²³Man, Yuda wacu kumae, Wek etere i bang’e, lewic umaru podho i wiwa: nen, aoro nyathi diel maeni, man inwang’e ngo.

²⁴Man etimbre calu dwi adek yo ng’eye, nia juyero ni Yuda, juwacu kumae, Tamar ma ci wodi utimo asara; man ke, nen, egamu ie kud asara. E Yuda wacu kumae, Kele woko, man wek juwang’e.

²⁵Kinde ma juwodhe woko, eoro kwenda ba kwaru mire, ewacu kumae, Agamu ia ku ng’atu ma won gin maeni: man ewacu kumae, Akwei, ng’i maeni gi piny pa ng’a, ayi, ku thol de, man uluth.

²⁶E Yuda ng’iogi, man ewacu kumae, En e pwe ma saga, kum amie ngo ni Cela ma woda. Man eng’eye kendo ngo.

²⁷Man etimbre i nindo mi moc pare, nia, nen, rut ni i ie.

²⁸Man etimbre, kinde m’esendre, nia acel uwodho cinge: man jacol utwio thol ma kwar ng’ut cinge, ewacu kumae, Maeni lar uwok.

²⁹Man etimbre, kan edwoko cinge, nia, nen, umin uwok woko: man ewacu kumae, Nedi itimo pokri iri giri? ka kumeno julwong’o nyinge Perez.

³⁰Man yo ku ng’eye umin uwok woko, m’ubedo ku thol ma kwar ng’ut cinge: man julwong’o nyinge Zera.