Read Alur Thangambere 39 Bible Online

Thangambere 39 - Alur bible

Thangambere 39

¹E Jutero Yusuf i Misiri: man Potifar, ma jego pa Farao, ma jadit mi jukur, ma Jamisiri, eng’iewe kud i cing’ Juicmael, m’ukele piny keca.

²E Yehova ni karacelo ku Yusuf; en e ng’atu ma won mierolembe; man eni i ot pa jadit pare ma Jamisiri.

³Man jadit pare neno nia Yehova ni kude, man nia Yehova ketho gin ceke m’etimo bedo miero i cinge.

⁴E Yusuf unwang’u bero i wang’e, e etimo ire: man edwoke ni jawiot pare, man gin ceke m’ebedo ko eketho i cinge.

⁵Man etimbre ugambre i nindo m’edwoke ni jawiot pare, man wi gin ceke m’ebedo ko, nia Yehova mio mugisa ni ot pa Jamisiri ni kum Yusuf; man mugisa pa Yehova ni wi gin ceke m’ebedo ko, i ot man i podho.

⁶Man eweko gin ceke m’ebedo ko i cing’ Yusuf; man eng’eyo ngo gin ma ni kude, ndhu kwen m’ecamu. Man Yusufne wang’e leng’, man kume de leng’.

⁷Man etimbre yo ng’ei gin maeni nia ci jadit pare loko wang’e kum Yusuf; man ewacu kumae, Vut kuda.

⁸Ento ekwero, man ewacu ni dhaku pa jadit pare kumae, Nen, jadit para ng’eyo ngo gin ma ni i ot i bang’a, man eketho gin ceke m’ebedo ko i cinga:

⁹en edwong’ ma sagu an ungo i ot maeni; kadok gin moko de ecero ngo ira ndhu in, kum in i dhaku pare: ka kumeno acopo timo dubo maeni ma dit nenedi, man adub ni Mungu?

¹⁰Man etimbre, kinde m’eweco ku Yusuf ceng’ ku ceng’, nia ewinjo dwande ngo, kara evut kude, kadi kara gibed kude.

¹¹Man etimbre ceng’ni ku nindo maeni, nia ecidho i ot kara etim tic pare; man dhanu m’i ot moko mbe keca i ie.

¹²Man emake ku kendi pare, ewacu kumae, Vut kuda: man eweko kendi pare i cinge, e eringo, man ewok woko.

¹³Man etimbre kan eneno nia eweko kendi pare i cinge, man eringo woko,

¹⁴nia elwong’o dhanu m’i ot pare, man eweco i bang’gi, ewacu kumae, Nen, ekelo Jaebrania i bang’wa kara ucaiwa: emondo i bang’a kara evut kuda, man akok ku dwanda ma tek:

¹⁵e etimbre, kinde m’ewinjo nia ating’o dwanda man akok, nia eweko kendi pare i bang’a, man eringo, e ewok woko.

¹⁶Man eketho kendi pare i bang’e, maram jadit pare dwogo ko pacu.

¹⁷E eweco i bang’e calku lembe maeni, ewacu kumae, Jatic ma e Jaebrania, m’ikelo i bang’wa, emondo i bang’a, kara ecaya:

¹⁸man etimbre, kan ating’o dwanda malu man akok, nia eweko kendi pare i bang’a, man eringo woko.

¹⁹Man etimbre, kinde ma jadit pare winjo lembe pa dhaku pare, m’eyero ire, m’ewacu kumae, Jatic peri timo i bang’a kumeni; nia kwinyo pare opo.

²⁰Man jadit pa Yusuf umake, man ekethe i otkol, i ka ma jukol p’ubimo gibedo atwia i ie: e ebedo keca i otkol.

²¹Ento Yehova ni karacelo ku Yusuf, man enyutho bero ire, emio ire bero de i wang’ jakur otkolne.

²²Man jakur otkol umio jukol ceke ma ni i otkol i cing’ Yusuf; man gin ceke ma gitimo keca, en e jatimne.

²³Jakur otkol uneno ba gin moko ki ngo ma ni the cinge, kum Yehova ni kude; man gin m’etimo, Yehova ketho ebedo miero.