Read Alur Thangambere 40 Bible Online

Thangambere 40 - Alur bible

Thangambere 40

¹Man etimbre yo ng’ei gin maeni, nia jami giramadha ni ubimo mi Misiri man jatedo pare gikier ni rwoth migi m’ubimo mi Misiri.

²Man kwinyo nego Farao kum jego pare ario, kum jadit mi jumi giramadha, man kum jadit mi jutedo.

³Man eketho jukurogi i ot pa jego mi jukur, i otkol, i ka ma jutwio ie Yusuf.

⁴Man jadit mi jukur ung’olo ni Yusuf pigi, man etimo igi: e gibedo keca nindo moko i ka ma jukuro.

⁵E gileko lek gin ario, man lek pare man lek pare, i diewor acel, ng’atuman calku the lek pare, jami giramadha man jatedo p’ubimo mi Misiri, ma gibedo atwia i otkol.

⁶Man Yusuf ubino i bang’gi kugweno, e enenogi, man, nen, can unegogi.

⁷Man epenjo jego pa Farao ma gini kude i ka ma jukuro i ot pa jadit pare, ewacu kumae, Nedi wuneno piny kumeno ku can tini?

⁸E giwacu ire kumae, Waleko lek, man ng’atu moko mbe ma copo ewo there. Man Yusuf uwacu igi kumae, Ewo there ni ba Mungu ngo? yere ira, akwayuwu.

⁹Man jami giramadha ma jadit uyero lek pare ni Yusuf, man ewacu ire kumae, I lek para, nen, ulok ni i wang’a;

¹⁰man ulokne jange adek ni i kume: man ebedo calu ekudo, e thiwe yepo; man wicne konjo nyingulok m’ucek:

¹¹e kikombe pa Farao ni i cinga; man agamu nyingulokne, e abiogi i kikombe pa Farao, man amio kikombene i cing’ Farao.

¹²E Yusuf uwacu ire kumae, Maeni en e there: jange adek en e ceng’ adek;

¹³ma fodi ceng’ adek kukadhu ngo Farao biting’o wii malu, man ebidwoki i tic maka peri: man ibimio kikombe pa Farao i cinge, calu ma naka ibeditimo ma fodi in i jami giramadha pare.

¹⁴Ento ipoi pira kinde ma lembe peri bedo miero, man inyuth bero ira, akwei, man iyer pira ni Farao, man iwodha kud i ot maeni:

¹⁵kum andha jukwala kud i ng’om mi Juebrania: man keni bende atimo gin moko ngo m’uketho giketha i otkol.

¹⁶Ka jatedo ma jadit uneno nia ewotherene e ber, ewacu ni Yusuf kumae, An bende ani i lek para, man, nen, katoko adek mi mugati ma tar ni i wia:

¹⁷man kwond cemo ceke m’ateda ma ni Farao ni i katoko ma yo malu; man winyo gicamugi ku i katoko kud i wia.

¹⁸E Yusuf uloko lembe, ewacu de kumae, Maeni en e there: katoko adek en e ceng’ adek;

¹⁹ma fodi ceng’ adek kukadhu ngo Farao biting’o wii kud i kumi, man ebilieri wi yen; man winyo bicamu ringi kud i kumi.

²⁰Man etimbre i ceng’ mir adege, ma en e ceng’ ma junyolo ie Farao, nia etimo agba ni jutic pare ceke: man eting’o jami giramadha ma jadit man jatedo ma jadit i kind jutic pare.

²¹Man edwoko jami giramadha ma jadit ba tic ma kakare kendo; e emio kikombe i cing’ Farao:

²²ento eliero jatedo ma jadit: calu Yusuf uewo there igi.

²³Ento jami giramadha ma jadit upoi ungo pi Yusuf, ento wie wil pire.