Read Alur Thangambere 41 Bible Online

Thangambere 41 - Alur bible

Thangambere 41

¹Man etimbre i rundi ario yul, nia Farao leko lek: man, nen, ecungo dhu kulo.

²Man, nen, dhiang’ abiro giwok kud i kulo, ma kumgi leng’ m’ucwe de; man gicamu i usi m’uloth lep lep.

³Man, nen, dhiang’ abiro mange giwok i tokgi kud i kulo, ma kumgi rac m’umok de, e gicungo ku dhiang’ wadi i dhu kulo.

⁴Man dhiang’ abiro ma rac m’umok ucamu dhiang’ abiro ma kumgi leng’ m’ucwe de. E Farao ceu.

⁵Man enindo eleko lek de mir arionde: man, nen, anyogi abiro ubiele wi tiende acel, m’ufung’ni ma ber de.

⁶Man, nen, anyogi abiro m’usau, man ma yamu ma yo nyangu nero, ubiele yo ku ng’eigi.

⁷Man anyogi abiro m’usau umwonyo anyogi abiro m’ufung’ni m’unyak. Man Farao ceu, man, nen, en e lek.

⁸Man etimbre kugweno nia cwinye ng’abre; e eoro elwong’o weg ajoga ceke mi Misiri, ku dhanu ma jurieko ceke m’i ng’ombe: e Farao yero lek pare igi; ento ng’atu moko mbe ma copo ewo there ni Farao.

⁹E jami giramadha ma jadit ulund uyero ni Farao, ewacu kumae, Apoi kum kier para i ceng’ maeni:

¹⁰kwinyo timo Farao kum jutic pare, man eketha i ot ma jukuro i ot pa jego mi jukur, an ku jatedo ma jadit:

¹¹man waleko lek i diewor acel, an wakude de; waleko kubang’wa kubang’wa ng’atuman calku ewothere mi lek pare.

¹²Man jalawobi moko nuti kudwa keca, e Jaebrania, e jatic pa jego mi jukur; e wayero ire, man eewo the lek mwa iwa; eewo there ni ng’atuman calku lek pare.

¹³Man etimbre, calu eewo there iwa, e ebedo kumeca; an edwoka i tic maka para, man en eliere.

¹⁴Farao lund uoro man elwong’o Yusuf, man gikele pio kud i otkol: man elielo tike, eloko kendi pare de, man emondo ba Farao.

¹⁵E Farao wacu ni Yusuf kumae, Aleko lek, e ng’atu moko mbe ma copo ewo there: man awinjo piri, nia kan iwinjo lek icop o ewo there.

¹⁶Man Yusuf uloko lembe ni Farao, ewacu kumae, Embe i ia: Mungu bimio lokolembe mi kwiocwiny ni Farao.

¹⁷Man Farao weco ba Yusuf kumae, I lek para, nen, acungo dhu kulo:

¹⁸man, nen, dhiang’ abiro giwok kud i kulo, ma gicwe kumgi de leng’; man gicamu i usi m’uloth:

¹⁹man, nen, dhiang’ abiro mange giwok yo ng’eigi, m’utal man kumgi rac dit man gimok, wagi ma fodi aneno ki ngo i ng’om Misiri ceke ni racne:

²⁰man dhiang’ m’umok ma kumgi rac gicamu dhiang’ abiro ma kwong’a m’ucwe:

²¹e kinde ma gicamugi, jucopo ng’eyo ngo nia gicamugi; ento kumgi bedo rac asu, calu ma kwong’a. E aceu.

²²Man aneno i lek para, man, nen, anyogi abiro ubiele wi tiende acel, m’unyak man ma ber:

²³man, nen, anyogi abiro, m’uner, m’usau, man ma yamu ma yo nyangu nero, ubiele yo ng’eigi:

²⁴man anyogi m’usau mwonyo anyogi abiro ma ber: e ayere ni weg ajoga: ento ng’atu moko mbe ma copo ewo there ira.

²⁵E Yusuf uwacu ni Farao kumae, Lek pa Farao en e acel: gin ma Mungu ni ceng’ni kutimo enyutho ni Farao.

²⁶Dhiang’ abiro ma ber gi rundi abiro; man anyogi abiro ma ber gi rundi abiro: lek en e acel.

²⁷Man dhiang’ abiro m’umok ma kumgi rac m’uidho malu yo ng’eigi gi rundi abiro, man anyogi m’usau abiro bende ma yamu ma yo nyangu nero; gibibedo rundi abiro mi ndru.

²⁸Maeno gin m’ayero ni Farao: gin ma Mungu ni ceng’ni kutimo enyutho ni Farao.

²⁹Nen, rundi abiro bino mi yeng’o ma dit i ng’om Misiri ceke:

³⁰man rundi abiro mi ndru biwok yo ng’eigi; man yeng’o ceke wijo biwil pire i ng’om Misiri; e ndrune bicamu ng’om;

³¹man yeng’o jubing’eyo pire i ng’om ungo ni kum ndru maeno m’ulube; kum ebibedo rac dit.

³²Man kum lek pa Farao dwogo wang’ ario, en e kum Mungu ketho ginduni cungo, man fodi nyanok Mungu biketho etimbre.

³³Ka kumeno dong’ kawono Farao yeny ng’atu ma pidoie cu ma riek de, man ekethe wi ng’om Misiri.

³⁴Dong’ Farao tim maeni, man dong’ egoi wi junen wi ng’om, man eting’ ng’et cam mir abije mi ng’om mi Misiri i rundi abiro mi yeng’o.

³⁵Man wek gicok cam ceke mi rundi ma ber maeni m’ubino, man gikan cam the cing’ Farao ni cemo i adhura, man wek gigwoke.

³⁶Man cemo bibedo ni gin m’akana i ng’om mi rundi abiro mi ndru, ma bibedo i ng’om Misiri; kara ng’om kud unyothre ni kum ndru.

³⁷E gin maeno bedo ber i wang’ Farao, man i wang’ jutic pare ceke.

³⁸Man Farao wacu ni jutic pare kumae, Wacopo nwang’u wadi ng’atu maeni, ma ng’atu ma tipo Mungu ni i ie?

³⁹Man Farao wacu ni Yusuf kumae, Kum Mungu nyutho maeni ceke iri, ng’atu moko mbe ma pidoie cu ma riek de calu in:

⁴⁰ibibedo wi ot para, man jubibimo dhanu para ceke calku lembe peri: wi komker kende e m’abibedo ie dit ma segi.

⁴¹E Farao wacu ni Yusuf kumae, Nen, akethi wi ng’om Misiri ceke.

⁴²Man Farao wodho lagith mir ayine kud i cinge, man eroye i cing’ Yusuf, man eronye ku kendi mi bongu ma nwang’ ma ber, e ebolo nyoro mi mola ma kwar i ng’ute;

⁴³man eketho ewotho i magali mir arionde m’ebedo ko; man gikok i wang’e kumae, Wurum congwu: e ekethe wi ng’om Misiri ceke.

⁴⁴Man Farao wacu ni Yusuf kumae, An a Farao, man unibe kudi ng’atu moko mbe ma biting’o cinge kadi tiende i ng’om Misiri ceke.

⁴⁵E Farao lwong’o nying’ Yusuf Zafenath-panea; man emio ire Asenath ni dhaku, ma nya Potifera ma jalam mi On. Man Yusuf ucidho woko wi ng’om Misiri.

⁴⁶Man Yusuf rundi pare pier adek kinde m’ecungo i wang’ Farao m’ubimo mi Misiri. E Yusuf uai woko kud i vut Farao, man ecidho i ng’om ceke mi Misiri mba mba.

⁴⁷Man i rundi abiro mi yeng’o ng’om ucego upong’o cing’.

⁴⁸Man ecoko cemo ceke ma ni i ng’om Misiri mi rundi abiro, man ekanu cemo i adhura: cemo mi pothi, m’utieko adhura kubang’e kubang’e gbur, ekanu i adhurane.

⁴⁹Man Yusuf ukanu cam calu kwio ma dhu nam, dit hai, cil m’eweko ko kwan; kum ekwandre ngo.

⁵⁰Man junyolo nyithindho ma co ario ni Yusuf ma fodi rundi mi ndru kuwok ungo, ma Asenath, ma nya Potifera ma jalam mi On, unyolo ire.

⁵¹Man Yusuf ulwong’o nying’ ma kayu Manase: Kum, ewacu, Mungu ketho wia wil kum muli mi tic para ceke, ku ot pa vwa ceke.

⁵²Man nying’ mir arionde elwong’o Efraim: Kum Mungu ketho acego nying’ i ng’om mi masendi para.

⁵³Man rundi abiro mi yeng’o, ma ni i ng’om Misiri, ujik.

⁵⁴Man rundi abiro mi ndru maku bino, calu Yusuf uwacu: e ndru nuti i ng’om ceke; ento i ng’om Misiri ceke kwen nuti.

⁵⁵E kinde ma kec umaku timo ng’om Misiri ceke, dhanu giywak ba Farao pi kwen: man Farao wacu ni Jumisiri ceke kumae, Wuci ba Yusuf; gin m’ewacu iwu, wutim.

⁵⁶Man ndiuje ni wi wang’ ng’om ceke: e Yusuf uyabu dhu otkancam ceke, man eng’iewo ni Jumisiri; e ndruje dit i ng’om Misiri.

⁵⁷Man ng’om ceke gimondo i ng’om Misiri kara ging’ieu cam ba Yusuf, kum ndruje dit i ng’om ngung’.