Read Alur Thangambere 43 Bible Online

Thangambere 43 - Alur bible

Thangambere 43

¹Man ndruje dit i ng’om.

²Man etimbre, kinde ma gicamu cam ma gigamu kud i ng’om Misiri, weggi wacu igi kumae, Wucidh kendo, wung’ieu cam ma nyanok iwa.

³E Yuda yero ire, ewacu kumae, Ng’atuca cimowa ma tek, ewacu kumae, Wubineno wang’a ngo, tek umegwu bedo kudu ngo.

⁴Tek iyio oro umegwa kudwa, wabiloro piny man wabing’iewo iri cam:

⁵ento tek ibiore ngo, wabiloro piny ungo; kum ng’atuca wacu iwa kumae, Wubineno wang’a ngo, tek umegwu bedo kudu ngo.

⁶Man Israel uwacu kumae, Wutimo rac kumeni i bang’a nedi, ma wuyero ko ni ng’atuca nia umegwu nuti e?

⁷Man giwacu kumae, Ng’atuca penjo piwa ngili ngili, man pi wat mwa, ewacu kumae, Wegwu fodubedo kwo? wubedo kud umegwu mange? man wayero ire calku penji mi lembe maeni: wacopo ng’eyo nenedi nia ebiwacu kumae, Wukel umegwu pinyi?

⁸Man Yuda wacu ni Israel ma won kumae, Or nyathinne kuda, e wabiai wabicidho; kara wabed kwo, man ku watho, wan, wakudu, man nyithindho mwa ma thindho bende.

⁹Lembe pare bibedo i wia; ibilwong’e i cinga: tek adwoke i beng’i ngo, man akethe i weng’i ngo, e lembene bibedo i wia mi nja:

¹⁰kum tek wagalu ngo, nwang’u kawono wadwogo mir arionde andha.

¹¹E weggi ma Israel uwacu igi kumae, Tek ebedo kumeno kawono, wutim kumeni: wugam nying’ piny ma cu mi ng’om maeni i jamni mu, man wulor piny ku giramia ni ng’atuca, mo moko ma liu, ku kic moko nyanok, yath ma jwa jwa kud udogyen, nying yen ma tek, man akpalakpala;

¹²man wucidh ku sente wang’ ario i cingwu; ku sente ma judwoko i dhu usau mu wutere kendo i cingwu; kuno nyo wigi wil awila:

¹³wugam umegwu bende, man wuai, wucidh kendo ba ng’atuca:

¹⁴man Mungu ma Jategokpo emi kisa iwu i wang’ ng’atuca, kara egony iwu umegwu mucelo man Benyamin. Man tek jukabu nyithindho para kud i bang’a, nwang’u junega.

¹⁵E dhanune gigamu giramia maeno, man gigamu sente mir arionde i cing’gi, ku Benyamin; man giai malu, e giloro piny i Misiri, man gicungo i wang’ Yusuf.

¹⁶E kinde ma Yusuf uneno Benyamin ni karacelo kugi, ewacu ni jagwokot pare kumae, Kel dhanune i ot, man ithum ring’o, iyik cemo de; kum wabicamu waku dhanunegi dieceng’.

¹⁷E ng’atuca timo calu Yusuf uwacu; e ng’atuca kelo dhanu maeno i ot pa Yusuf.

¹⁸E lworo nego dhanunegi, kum juterogi i ot pa Yusuf; man giwacu kumae, Jukelowa i ot kum sente ma judwoko i usau mwa ku kwong’a; kara enwang’ lembe i kumwa, man epodh i wiwa, man egamwa ni ng’eca, ku kana mwa.

¹⁹E gibino ceng’ni jagwokot pa Yusuf, man giyero ire ku i dhugola mi ot,

²⁰man giwacu kumae, A, rwoth para, ku kwong’a waloro piny andha kara wang’ieu cam:

²¹man etimbre, kinde ma wawok i kagonjo, nia wayabu usau mwa, man, nen, sente mi dhanu kubang’gi kubang’gi ng’atuman pare ni i dhu usau pare, sente mwa ni bo: man wakele kendo i cingwa.

²²Man wakelo sente mange de waloro kudo piny i cingwa kara wang’ieu kudo cam: wang’eyo ng’atu m’uketho sente i usau mwa ngo.

²³Man ewacu kumae, Kwiocwiny iwu, lworo kud unegwu: Mungu mu, man Mungu pa wegwu, emio iwu piny i usau mu: abedo ku sente mu. Man ekelo Simeon woko i bang’gi.

²⁴Man ng’atuca kelo dhanunegi i ot pa Yusuf, e emio igi pi, man gilwoko tiendgi; man emio cemo ni kana migi.

²⁵E giyiko giramia kum bino pa Yusuf ma dieceng’: kum giwinjo nia gibicamu kwen keca.

²⁶E kinde ma Yusuf udwogo pacu, gikelo ire giramia ma ni i cing’gi i ot, man girum gigi ire i ng’om.

²⁷Man epenjogi pi bedo migi, ewacu de kumae, Wegwu kume leng’i, ng’atu m’uti ma wuweco pire? Fodi ebedo kwo?

²⁸E giwacu kumae, Jatic peri ma wegwa kume leng’, fodi ebedo kwo. Man gikulo wigi, e girwo.

²⁹Man eting’o wang’e malu, e eneno Benyamin m’umin, nyathin pa min, man ewacu kumae, Maeno umegwu ma cogo, ma wuweco pire ira? Man ewacu kumae, Mungu nyuth bero iri, woda.

³⁰E Yusuf utimo pio; kum ava umin unego adundene: man eyenyo ka ywak; e emondo i kusika pare, man eywak keca.

³¹E elogo wang’e, man ewok woko; e etwio cwinye gire, man ewacu kumae, Keth cam.

³²Man giketho ire ka kende, igi de ka kendgi, man mi Misiri ma gicamu gikugi, ka kendgi: kum Jumisiri gicopo camu kwen ku Juebrania ngo; kum maeno bedo ni ginmajudagu ni Jumisiri.

³³E gibedo i wang’e, ma kayu calku dit mi nyol pare, man ma cogo calkud aradu pare: man dhanune igi wang’ lii i kindgi gigi.

³⁴Man eoro cam igi kud i bang’e: ento cam pa Benyamin usagu migi wang’ abic. E gimadhu, man anyong’a negogi gikugi.