Read Alur Thangambere 44 Bible Online

Thangambere 44 - Alur bible

Thangambere 44

¹Man eng’olo ni jakurot pare, ewacu kumae, Pong’ usau mi dhanune ku cam, calu ma gicopo yeyo, man iketh sente mi dhanune ceke kubang’gi kubang’gi pa ng’atuman dhu usau pare.

²Man iketh kikombe para, kikombe mi mola ma tar, i dhu usau pa cogo, man sente mi cam pare. Man etimo calku lembe ma Yusuf uyero.

³Kinde ma piny uru, juoro dhanune gicidho, gin ku kana migi.

⁴E kinde ma giai woko kud i adhura, man ma fodi gini bor ungo, Yusuf uwacu ni jakurot pare kumae, Ai, lub tok dhanunegi; man kinde m’inwang’ugi, wac igi kumae, Nedi wudwoko gin ma rac pi gin ma beri?

⁵Maeni en e gin ma rwoth para madhu kudo ngo, m’eewo kudo lembe de ngo andha? wutimo rac kum wutimo kumeni.

⁶E erubogi, man eyero igi lembe maeni.

⁷Man giwacu ire kumae, Nedi rwoth para yero wadi lembe ma kumeni? Dong’ ebed bor i kum jutic peri nia gitim wadi gin maeni.

⁸Nen, sente, ma wanwang’u i dhu usau mwa, wakelo kendo i beng’i kud i ng’om Kanan: ka kumeno wabikwalu mola ma tar kadi mola ma kwar de nenedi kud i ot pa rwoth peri?

⁹Ng’atu ma tek junwang’e i bang’e i kind jutic peri, wek etho, man wan bende wabibedo ni ng’eca pa rwoth para.

¹⁰Man ewacu kumae, Kawono bende wek ebed calku lembe mu: ng’atu ma junwang’e i bang’e ebibedo ng’eca para; e lembe bibedo i wiwu ngo.

¹¹Gilund gitimo pio, man giketho usau migi i ng’om kubang’gi kubang’gi, e giyabu usau mi dhanu ceke kubang’gi kubang’gi.

¹²Man eyenyo, ugambre kum ma kayu, man ejik kum cogo: e junwang’u kikombe i usau pa Benyamin.

¹³Gilund giyeco kendi migi, man gidwoko ter wi kana migi kubang’gi kubang’gi, e gidok i adhurane.

¹⁴E Yuda ku utumin mire gibino ba ot pa Yusuf; man en fodi enuti keca: man gipodho i wang’e i ng’om.

¹⁵Man Yusuf uwacu igi kumae, Gin maeni ang’o ma wutimo? wung’eyo ngo nia ng’atu ma calu an copo ewo lembe andha?

¹⁶Man Yuda wacu kumae, Wabiwacu ang’o ni rwoth para? wabiyero ang’o? kadi wabikabu lembe m’i wiwa nenedi? Mungu nwang’u kier mi jutic peri: nen, wan wa ng’eca pa rwoth para, wan, wa ku ng’atu ma junwang’u kikombe i bang’e bende.

¹⁷Man ewacu kumae, Dong’ ebed bor i kuma nia atim kumeno: ng’atu ma junwang’u kikombe i cinge, ebibedo ng’eca para; ento wun, wuidh malu ku kwiocwiny ba wegwu.

¹⁸E Yuda lund ubind ceng’ni i bang’e, man ewacu kumae, A, rwoth para, akwei, wek jatic peri yer lembe i ith rwoth para, man kud iyi ng’ecwiny peri op kum jatic peri; kum in i calu Farao.

¹⁹Rwoth para penjo jutic pare, ewacu kumae, Wegwu nuti, kadi umegwu?

²⁰E wawacu ni rwoth para kumae, Wegwa nuti, en e ng’atu m’uti, man nyathin mi tio pare, en e ng’atu ma nok; e umin utho, man edong’ e kende ka pa min; man won umare.

²¹Man iwacu ni jutic peri kumae, Wukele piny i bang’a, kara anene.

²²Man wawacu ni rwoth para kumae, Nyathinne copo weko won ungo: kum tek eweko won, won bitho.

²³Man iwacu ni jutic peri kumae, Tek umegwu ma nok uloro piny karacelo kudu ngo, wubineno wang’a kendo ngo.

²⁴E etimbre kinde ma w ai dho malu ba jatic peri ma vwa, wayero ire lembe pa rwoth para.

²⁵E wegwa wacu kumae, Wucidh kendo, wung’ieu iwa cam moko nyanok.

²⁶Man wawacu kumae, Wacopo loro piny ungo: tek umegwa ma nok ni kudwa, e wabilund loro piny; kum wacopo neno wang’ ng’atuca ngo, tek umegwa ma cogo ni karacelo kudwa ngo.

²⁷Man jatic peri ma vwa wacu iwa kumae, Wung’eyo nia dhaku para nyolo ira nyithindho ma co ario:

²⁸man acel uai kud i bang’a, man awacu kumae, Juyece nziki nziki andha; e anene kendo ngo:

²⁹man tek wukabu maeni bende kud i bang’a, man gin ma rac upodho i wie, wubitero lwar mi wia ku can i liel.

³⁰Ka kumeno kan abino ba jatic peri ma vwa, man nyathinne ni karacelo kudwa ngo; kum kwo pare ribre ku kwo pa wode;

³¹ebitimbre, kinde m’eneno nia nyathin umbe kudwa, nia ebitho: man jutic peri bitero lwar ma wi jatic peri ma wegwa ku can i liel.

³²Kum jatic peri goyo kore pi nyathin ni vwa, ewacu kumae, Tek akele i beng’i kendo ngo, lembe bilund bedo i wia mi nja ba vwa.

³³Ka kumeno kawono, wek jatic peri, akwei, ubed ng’eca ni rwoth para ka nyathinne; man wek nyathin uidh malu ku utumin mire.

³⁴Kum abiidho malu ba vwa nenedi, tek nyathin umbe i bang’a? amaru neno gin ma rac ma biwok i kum vwa.