Read Alur Thangambere 46 Bible Online

Thangambere 46 - Alur bible

Thangambere 46

¹E Israel utugo woth ku gin ceke m’ebedo ko, man ebino Ber-ceba, man ethiero lam ni Mungu pa Isak ma won.

²Man Mungu yero ni Israel ku ginmawokiwang’ mi diewor, man ewacu kumae, Yakobo, Yakobo. Man ewacu kumae, Anuti.

³Man ewacu kumae, An a Mungu, Mungu pa wuru: kud ilwor niloro piny i Misiri; kum abidwoki ni thek ma dit kuca:

⁴wabiloro wakudi i Misiri; man abidwoki malu bende kendo andha: man Yusuf biketho cinge i weng’i.

⁵Man Yakobo ai malu kud i Ber-ceba: e wot Israel giyeyo Yakobo ma weggi, ku nyithindho migi ma thindho, ku mon migi, i magali ma Farao oro uyeye.

⁶E gigamu lim migi, ku jamni migi, ma gilimo i ng’om Kanan, man gibino i Misiri, Yakobo, ku kodhine ceke gikugi:

⁷wote, man wot wote gikugi, nyige, ku nyig wote, ku kodhine ceke ekelo karacelo kude i Misiri.

⁸Man maeni gi nying’ nyithindho pa Israel, m’ubino i Misiri, Yakobo ku wote: Ruben, ma kayu pa Yakobo.

⁹Man wot Ruben gi eni: Hanok, man Palu, man Hezron, man Karmi.

¹⁰Man wot Simeon gi eni: Yemuel, man Yamin, man Ohad, man Yakin, man Zohar, man Caul ma wod Nyakanani.

¹¹Man wot Lawi gi eni: Gercon, Kohath, man Merari.

¹²Man wot Yuda gi eni: Er, man Onan, man Cela, man Perez, man Zera; ento Er ku Onan githo i ng’om Kanan. Man wot Perez gi Hezron man Hamul.

¹³Man wot Isakar gi eni: Tola, man Puva, man Yob, man Cimron.

¹⁴Man wot Zebulun gi eni: Sered, man Elon, man Yalel.

¹⁵Maeni gi wot Leya, m’enyolo ni Yakobo i Padan-aram, man nyare ma Dina: ng’eyong’ec ceke mi wote ku nyige gi pier adek wi adek.

¹⁶Man wot Gad gi eni: Zifion, man Hagi, ku Cuni, man Ezbon, man Eri, man Arodi, man Areli.

¹⁷Man wot Acer gi eni: Imna, man Icva, man Icvi, man Beria, man Sera ma nyameggi; man wot Beria gi eni: Heber, man Malkiel.

¹⁸Maeni gi wot Zilpa, ma Laban umio ni Leya ma nyare; man maeni enyolo ni Yakobo; en e ng’eyong’ec apar wi abusiel.

¹⁹Man wot Rahel ma dhaku pa Yakobo gi eni: Yusuf man Benyamin.

²⁰Man junyolo Manase giku Efraim ni Yusuf i ng’om Misiri, ma Asenath ma nyar Potifera ma jalam mi On, unyolo ire.

²¹Man wot Benyamin gi eni: Bela man Beker, man Acbel, man Gera, man Naman, man Ehi, man Roc, man Mupim, man Hupim, man Ard.

²²Maeni gi wot Rahel, ma junyolo ni Yakobo: ng’eyong’ec ceke gin apar wi ang’wen.

²³Man wot Dan gi eni: Hucim.

²⁴Man wot Naftali gi eni: Yazrel, man Guni, man Yazer, man Cilem.

²⁵Maeni gi wot Bilha, ma Laban umio ni Rahel ma nyare, man enyolo maeni ni Yakobo: ng’eyong’ec ceke gin abiro.

²⁶Ng’eyong’ec ceke ma gibino giku Yakobogi i Misiri, m’uai i kume, ma jukwanu mond wot Yakobo ngo, ng’eyong’ec ceke gi pier abusiel wi abusiel;

²⁷man wot Yusuf, ma junyolo ire i Misiri, gi ng’eyong’ec ario: ng’eyong’ec ceke mi ot pa Yakobo m’ubino i Misiri gi pier abiro.

²⁸Man eoro Yuda i wang’e ba Yusuf, kara enyuth yo i wang’e i Gocen; e gibino i ng’om Gocen.

²⁹E Yusuf uyiko magali pare, man eidho malu kara eromb kud Israel ma won, i Gocen; e enyuthre gire ire, man epodho i ng’ute, eywak de wi ng’ute hai.

³⁰Man Israel uwacu ni Yusuf kumae, Kawono wek atho, kum aneno weng’i, nia fodi ibedo kwo.

³¹Man Yusuf uwacu ni utumin mire kumae, man ni ot pa won kumae, Abiidho malu, e abiyero ni Farao, man abiwacu ire kumae, Utumira, man ot pa vwa, ma naka gini i ng’om Kanan, gibino i bang’a;

³²man dhanune gi jukwac, kum naka gibedo jugwok lim; e gikelo udul rombe migi, man dhok migi, ku gin ceke ma gibedo ko.

³³Man ebitimbre, ka Farao bilwong’owu, man ebipenjowu kumae, Tic mu ang’o?

³⁴nia wubiwacu kumae, Jutic peri naka gi jugwok lim ugambre i aradu mwa cil ku kawono de, wan, ku wegwa de: kara wubed i ng’om Gocen; kum jukwac kubang’gi kubang’gi gin gi ginmajudagu ni Jumisiri.