Read Alur Thangambere 47 Bible Online

Thangambere 47 - Alur bible

Thangambere 47

¹Yusuf ulund umondo man eyero ni Farao, man ewacu kumae, Vwa ku utumira, kud udul rombe migi, man dhok migi, ku gin ceke ma gibedo ko, giai kud i ng’om Kanan; man, nen, gini i ng’om Gocen.

²Man egamu dhanu abic kud i kind utumin mire, e enyuthogi ni Farao.

³Man Farao wacu ni utumin mire kumae, Tic mu ang’o? Man giwacu ni Farao kumae, Jutic peri gi jukwac, wan, man wegwa de.

⁴Man giwacu ni Farao kumae, Wabino ni umondo i ng’om; kum kakwac umbe ni udul rombe mi jutic peri; kum ndru dit i ng’om Kanan: ka kumeno kawono, wakwei, wek jutic peri bed i ng’om Gocen.

⁵E Farao yero ni Yusuf, ewacu kumae, Wuru man utumeru gibino i beng’i:

⁶ng’om Misiri ni i weng’i; keth wuru ku utumeru gibed i ng’om ma ber m’usagu; wek gibed i ng’om Gocen: man tek ing’eyo dhanu ma cu i kindgi, keth gibed jubim wi lim para.

⁷E Yusuf ukelo Yakobo ma won, man ekethe i wang’ Farao: man Yakobo mio mugisa ni Farao.

⁸Man Farao wacu ni Yakobo kumae, Ceng’ mi rundi mi bedo peri adi?

⁹Man Yakobo wacu ni Farao kumae, Ceng’ mi rundi mi woth para en e rundi dak acel ku pier adek: ceng’ mi rundi mi kwo para nok man rac, man gitundo ngo kum ceng’ mi rundi mi kwo pa kwara i ceng’ mi woth migi.

¹⁰E Yakobo mio mugisa ni Farao, man eai kud i vut Farao.

¹¹E Yusuf uketho won ku utumin i kakagi, man emio igi piny i ng’om Misiri, i ng’om ma ber m’usagu, i ng’om mi Rameses, calu Farao ng’olo.

¹²E Yusuf ugwoko won, ku utumin mire, man juudi ceke pa won, ku kwen, calku wat migi.

¹³Man kwen moko mbe i ng’om ceke; kum ndruje rac dit, ketho ng’om Misiri ku ng’om Kanan uvoc ni ndru.

¹⁴Man Yusuf ucoko sente ceke ma junwang’u i ng’om Misiri, man i ng’om Kanan, mi cam ma ging’iewo: e Yusuf ukelo sentene i ot pa Farao.

¹⁵Man kinde ma julalu sente ceke i ng’om Misiri, man i ng’om Kanan, Jumisiri ceke gibino ba Yusuf, man giwacu kumae, Mi iwa kwen: kum watho nedi i vuti? kum sente mwa thum.

¹⁶E Yusuf uwacu kumae, Wumi lim mu; man abimio iwu pi lim mu, tek sente thum.

¹⁷Man gikelo lim migi ba Yusuf; e Yusuf umio igi kwen kaka riuni, man pir udul rombe, man pi dhok, man pir udul kana: man emio igi kwen kaka lim migi ceke mi rundi maeca.

¹⁸Man ka rundi maeca thum, gibino i bang’e i rundi mir arionde, man giwacu ire kumae, Wabimung’o ngo ni rwoth para, maram sente mwa ceke thum ko; man udul lim gi pa rwoth para; gin moko mbe m’udong’ i wang’ rwoth para, ndhu kumwa, ku ng’om mwa:

¹⁹watho nedi i weng’i, wan ku ng’om mwa? ng’ieuwa ku ng’om mwa de ku kwen, man wan ku ng’om mwa wabibedo jutic ni Farao: man mi iwa kodhi, kara wabed kwo, man ku watho, man kara ng’om kud udong’ ni uvuru.

²⁰Kum kumeno Yusuf ung’iewo ng’om ceke mi Misiri ni Farao; kum Jumisiri ging’iewo pothi migi kagi ceke kubang’gi kubang’gi, kum ndru bedo dit i wigi: man ng’ombe doko pa Farao.

²¹Man dhanune, edwokogi i adhura ugambre i kajik mi kieu Misiri cil kum kajik mucelo.

²²Ng’om mi julam kende e m’eng’iewo ngo: kum julam gibedo ku makapiny migi m’uai ba Farao, man gicamu makapiny migi ma Farao mio igi; kum kumeno ging’iewo ng’om migi ngo.

²³Yusuf ulund uwacu ni dhanune kumae, Nen ang’iewowu i ceng’ maeni ku ng’om mu ni Farao: nen, maeni kodhi iwu, man wubicoyo i ng’om.

²⁴Man ebitimbre i palacam, nia wubimio mir abije ni Farao, man ng’ete ang’wen bibedo mu, mi kodhi mi podho, man mi cemo mu, man pi dhanu ma juudiwu, man mi cemo mi nyithindho mu ma thindho.

²⁵Man giwacu kumae, Ibodho kwo mwa: wek wanwang’ bero i wang’ rwoth para, man wabibedo jutic pa Farao.

²⁶Man Yusuf ukethe ni cik i ng’om Misiri cil i ceng’ maeni, nia Farao bed kud abije; ng’om mi julam kende e m’udoko pa Farao ngo.

²⁷Man Israel ubedo i ng’om Misiri, i ng’om mi Gocen; man gigamu igi piny i ie, man ginyai, gimedri apila.

²⁸Man Yakobo bedo i ng’om Misiri rundi apar wi abiro: kum kumeno ceng’ pa Yakobo, ma rundi m’ecamu ie ng’om, en e rundi dak acel ku pier ang’wen wi abiro.

²⁹E nindo dhingo ma Israel ubitho i ie be: man elwong’o Yusuf ma wode, ewacu ire de kumae, Tek kawono anwang’u bero i weng’i, akwei, keth cingi the bamba, man itim ber man mandha i bang’a: akwei, kud iyika i Misiri;

³⁰ento kinde m’anindo ku kwaru, ibiyeya ku i Misiri, man ibiyika i kayik migi. Man ewacu kumae, Abitimo calu iwacu.

³¹Man ewacu kumae, Kwong’ ira: e ekwong’o ire. Man Israel utiele atiela wi uluth pare.