Read Alur Thangambere 48 Bible Online

Thangambere 48 - Alur bible

Thangambere 48

¹Man etimbre yo ng’ei gin maeni, nia ng’atu acel uwacu ni Yusuf kumae, Nen, kum wuru lith: man egamu wote ario gikugi, Manase gikud Efraim.

²Man ng’atu acel uyero ni Yakobo, man ewacu kumae, Nen Yusuf ma wodi bino i beng’i: e Israel utegre gire, man ebedo wi kavuto.

³Man Yakobo wacu ni Yusuf kumae, Mungu ma Jategokpo nyuthre ira i Luz i ng’om Kanan, man emio mugisa ira,

⁴man ewacu ira kumae, Nen, abiketho inyai, man abimedi, man abikethi ni udul kodhidhanu, man abimio ng’om maeni ni kodhini yo ng’ei ni piny mi nja.

⁵Man kawono woti ario, ma junyolo iri i ng’om Misiri ma fodi abino i beng’i ngo i Misiri, gi para; Efraim giku Manase, cil calu Ruben ku Simeon, gibibedo para.

⁶Man kodhi peri, m’ibinyolo yo ng’eigi, bibedo peri; gibilwongri tok nying utumeggi i aba migi.

⁷Man an, kinde m’aai Padan, Rahel utho i vuta i ng’om Kanan i yo, ma fodi woth ulwar i wang’wa ma jutundo ko Efrath: man ayike keca i yo ma jutundo ko Efrath (ma en e Beth-lehem).

⁸E Israel uneno wot Yusuf, man ewacu kumae, Maeni ng’agi?

⁹Man Yusuf uwacu ni won kumae, Gi wota, ma Mungu mio ira keni. Man ewacu kumae, Akwei, kelgi i bang’a, man abimio mugisa igi.

¹⁰Nwang’u wang’ Israel udoko via via kum tio, ketho nia ecopo neno ngo. E ekelogi ceng’ni i bang’e; man ecwio limbgi, egwakugi de.

¹¹Man Israel uwacu ni Yusuf kumae, Ia pido ngo nia abineno weng’i: man, nen, Mungu yio anen kodhini bende.

¹²Man Yusuf uwodhogi woko ku kum conge; man erum arieba cwinye.

¹³Man Yusuf ugamugi gin ario, Efraim yo ku cinge ma yor acwic yo ku cing Israel ma yor acam, man Manase i cinge ma yor acam yo ku cing Israel ma yor acwic, e ekelogi ceng’ni i bang’e.

¹⁴Man Israel urieyo cinge ma yor acwic, man ekethe i wi Efraim, ma en e cogo, man cinge ma yor acam i wi Manase, etharu cinge athara; kum Manase en e ma kayu.

¹⁵Man emio mugisa ni Yusuf ewacu kumae, Mungu ma kwara ma Ibrahim kud Isak giwotho i wang’e, Mungu ro’umio ira cemo i bedo para ceke cil i ceng’ maeni,

¹⁶malaika m’uwara ni gin ma rac ceke, umi mugisa ni awia; man wek nyinga bed i wigi, man nying’ kwara ma Ibrahim kud Isak; man wek ginyai ni udul i die ng’om.

¹⁷Man ka Yusuf uneno nia won uketho cinge ma yor acwic i wi Efraim, eton i ie: man eting’o cing won malu, kara ekabe ku wi Efraim edwoke wi Manase.

¹⁸E Yusuf uwacu ni won kumae, Kumeno ngo, vwa; kum maeni en e ma kayu; keth cingi ma yor acwic i wie.

¹⁹E won ukwero, man ewacu kumae, Ang’eyo, woda, ang’eyo; en bende ebidoko ni thek dhanu, man en bende ebibedo dwong’: ento umin ma nok bibedo dwong’ ma sage, man kodhine bidoko ni udul mi thek.

²⁰Man emio mugisa igi i ceng’ maeca, ewacu kumae, Israel bimio mugisa ni kumi, ebiwacu kumae, Mungu dwoki calu Efraim man calu Manase: man eketho Efraim i wang’ Manase.

²¹Man Israel uwacu ni Yusuf kumae, Nen, atho: ento Mungu bibedo kudu, man ebidwokowu kendo i ng’om pa kwaruwu.

²²Man ke amio iri makapiny acel ma sagu utumeru, m’akabu kud i cing’ Juamori ku palamularu para man kud atum para.