Read Alur Thangambere 49 Bible Online

Thangambere 49 - Alur bible

Thangambere 49

¹Man Yakobo lwong’o wote, man ewacu kumae: Wucokru giwu karacelo, kara ayer iwu pi gin ma bitimbre iwu i ceng’ ma cen.

²Wucokru giwu, man wuwinji, wu wot Yakobo; Man wucik ithwu bang’ Israel ma wegwu.

³Ruben, in i kayu para, tek para thangambere mi tego para de; Dit mi yung, man dit mi tego.

⁴M’ubewali calu pi, ibibedo dit ungo; Kum iidho wi kavuto pa wuru; Ilund icide: eidho malu wi kavuto para.

⁵Simeon man Lawi gin umego; Palamularu migi en e jambali mi rop.

⁶E ng’eyong’ec para, kud imond i porolembe migi; Dwong’ para, kud iribri ku cokri migi; Kum i ng’ecwiny migi ginego dhanu. Man i lembe ma gikeco gitong’o ler koni dhiang’.

⁷Kwong’ ubed wi ng’ecwiny migi, kum lake tek; Man kwinyo migi, kum en e mi rop: Abipokogi i Yakobo, Man abikethogi i Israel.

⁸Yuda, utumeru bipeki: Cingi bibedo wi ng’ut judegi peri; Wot wuru birum i weng’i.

⁹Yuda en e nyathin umvor; Woda, iai ku bang’ amaci: Erum piny, eriebre calu umvor, Man calu min umvor; ng’a ma bituge?

¹⁰Uludhker biai ungo ba Yuda, Kadi uluth pa jabim ku kind tiende, Cil ma Cilo bino ko; Man woro mi kodhidhanu bibedo ire

¹¹M’etwio nyathi kana pare kum ulok, Man nyathi kana pare kum ulok ma jufoyo; Elwoko kendi pare i pigulok, Man kendi pare i rimo mi pigulok:

¹²Wang’e bibogre ku pigulok, Man lake tar ku cak.

¹³Zebulun bibedo i ndiya mi nam; Man ebibedo ni ndiya mi combo; Man kieu pare bibedo wi Sidon.

¹⁴Isakar en e kana ma tek, M’eriebre piny i kind kwac mi rombe:

¹⁵Man eneno kayom m’ubedo ber, Ng’om de nia e ber; Man ejengo goke kara eyei, Man edoko jatic the tic ma jumuli ko.

¹⁶Dan bipoko lembe wi dhanu pare, Calu suru acel mir Israel.

¹⁷Dan bibedo ni thwol i yo, Ni urobi i yo, Ma tong’o ufunytiend riuni, Ketho ng’atu ma ni i wie podho ataru.

¹⁸Akuro both peri, E Yehova.

¹⁹Gad, udul mi jurop bidie; Ento ebidio ufunytiendgi.

²⁰Ku bang’ Acer kwen pare bibedo ni mio, Man ebiwodho gin ma jumaru mi ker.

²¹Naftali en e mege ruda m’ubedo agonya: Ewo dho lembe ma ber.

²²Yusuf en e jang yen ma cego nyinge, En e jang yen ma cego nyinge dhu kulo; Jange lak wi gang’kidi.

²³Weg atum ginyayu can i ie dit, Gikile ve, man gisende:

²⁴Ento atum pare bedo i tego, Man bot mi cinge, judwoko tek, Ku cing’ Ng’atu Matek pa Yakobo (Jakwac uai keca, en e kidi mir Israel),

²⁵Cil ni kum Mungu pa wuru, ma bikonyi, Man ni kum Ng’atu ma Jategokpo, ma bimio mugisa iri, Ku mugisa m’i polo ma malu, Mugisa mi nam m’uriebre piny, Mugisa mi thuno, man mi ic.

²⁶Mugisa pa wuru Sagu mugisa mi judongo para Cil kum dhu kieu mir ungulu gudi mi nja: Gibibedo i wi Yusuf, Man i die wi ng’atu m’ukoc tung’ ku utumin mire.

²⁷Benyamin en e urudi ma yeco: Kugweno ebicamu amaci, Man uthieno ebipoko ayeki.

²⁸Maeni ceke gi suru apar wi ario mir Israel: man maeni en e gin ma weggi yero igi man emio mugisa igi; man emio mugisa igi kubang’gi kubang’gi ng’atuman calku mugisa pare.

²⁹Man eng’olo igi, ewacu igi kumae, Jubicoka ba dhanu para: yika karacelo ku kwara i odng’om ma i podho pa Efron ma Jahiti,

³⁰i odng’om ma ni i podho mi Makpela, ma ni i wang’ Mamre, i ng’om Kanan, ma Ibrahim ung’iewo karacelo ku podho ba Efron ma Jahiti ni piny mi kayik.

³¹Giyiko Ibrahim keca man Sara ma dhaku pare; giyiko Isak keca ku Rebeka ma dhaku pare; man ayiko Leya keca—

³²podho ku odng’om ma ni i ie, ma jung’iewo ba nyithindho pa Heth.

³³Man kinde ma Yakobo daru ng’olo lembe ni wote, edolo tiende malu i kavuto, man emwonyo cwinye, man jucoke ba juthugi.