Read Alur Thangambere 5 Bible Online

Thangambere 5 - Alur bible

Thangambere 5

¹Maeni kitabu mi dhanum’utuk pa Adamu. I ceng’ ma Mungu cwio ie dhanu, ecwie kud ayi Mungu;

²nico ku dhaku de ecwiogi, man emio mugisa igi, man elwong’o nying’gi Dhanu, i ceng’ m’ecwiogi i ie.

³Man Adamu camu ng’om rundi dak acel ku pier adek, man enyolo nyathin ma nico ma calu en gire, m’ulubo ayine; e ecaku nyinge Seth:

⁴man ceng’ pa Adamu yo ng’ei nyolo Seth en e rundi dak abora: man enyolo nyithindho ma co ku nyithindho ma nyir.

⁵Man ceng’ ma Adamu camu ie ng’om en e rundi dak abung’wen ku pier adek: e etho.

⁶Man Seth ucamu ng’om rundi dak acel kud abic, man enyolo Enoc:

⁷man Seth ucamu ng’om yo ng’ei nyolo Enoc rundi dak abora kud abiro, man enyolo nyithindho ma co ku nyithindho ma nyir:

⁸man ceng’ pa Seth ceke en e rundi dak abung’wen kud apar wi ario: e etho.

⁹Man Enoc ucamu ng’om rundi pier abung’wen, man enyolo Kenan:

¹⁰man Enoc ucamu ng’om yo ng’ei nyolo Kenan rundi dak abora kud apar wi abic, man enyolo nyithindho ma co ku nyithindho ma nyir:

¹¹man ceng’ pa Enoc ceke en e rundi dak abung’wen ku wi abic: e etho.

¹²Man Kenan ucamu ng’om rundi pier abiro, man enyolo Mahalalel:

¹³man Kenan ucamu ng’om yo ng’ei nyolo Mahalalel rundi dak abora ku pier ang’wen, man enyolo nyithindho ma co ku nyithindho ma nyir:

¹⁴man ceng’ pa Kenan ceke en e rundi dak abung’wen kud apar: e etho.

¹⁵Man Mahalalel ucamu ng’om rundi pier abusiel wi abic, man enyolo Yared:

¹⁶man Mahalalel ucamu ng’om yo ng’ei nyolo Yared rundi dak abora ku pier adek, man enyolo nyithindho ma co ku nyithindho ma nyir:

¹⁷man ceng’ pa Mahalalel ceke en e rundi dak abora ku pier abung’wen wi abic: e etho.

¹⁸Man Yared ucamu ng’om rundi dak acel ku pier abusiel wi ario, man enyolo Enok:

¹⁹man Yared ucamu ng’om yo ng’ei nyolo Enok rundi dak abora, man enyolo nyithindho ma co ku nyithindho ma nyir:

²⁰man ceng’ pa Yared ceke en e rundi dak abung’wen ku pier abusiel wi ario: e etho.

²¹Man Enok ucamu ng’om rundi pier abusiel wi abic, man enyolo Methusela:

²²man Enok uwotho ku Mungu yo ng’ei nyolo Methusela rundi dak adek, man enyolo nyithindho ma co ku nyithindho ma nyir:

²³man ceng’ pa Enok ceke en e rundi dak adek ku pier abusiel wi abic:

²⁴man Enok uwotho ku Mungu: e en embe; kum Mungu game.

²⁵Man Methusela camu ng’om rundi dak acel ku pier abora wi abiro, man enyolo Lamek:

²⁶man Methusela camu ng’om yo ng’ei nyolo Lamek, rundi dak abiro ku pier abora wi ario, man enyolo nyithindho ma co ku nyithindho ma nyir:

²⁷man ceng’ pa Methusela ceke en e rundi dak abung’wen ku pier abusiel wi abung’wen: e etho.

²⁸Man Lamek ucamu ng’om rundi dak acel ku pier abora wi ario, man enyolo nyathin ma nico:

²⁹man elwong’o nyinge Noa, ewacu kumae, Ng’atu maeni bijukowa i tic mwa man i muli mi cingwa, m’uwok kum ng’om ma Yehova kwong’o.

³⁰Man Lamek ucamu ng’om yo ng’ei nyolo Noa rundi dak abic ku pier abung’wen wi abic, man enyolo nyithindho ma co ku nyithindho ma nyir:

³¹man ceng’ pa Lamek ceke en e rundi dak abiro’ ku pier abiro wi abiro: e etho.

³²Man Noa rundi pare dak abic: man Noa nyolo Cem, Ham, man Yafeth.