Read Alur Thangambere 50 Bible Online

Thangambere 50 - Alur bible

Thangambere 50

¹Man Yusuf upodho i wang’ won, man eywak i wie, ecwio limbe de.

²Man Yusuf ung’olo ni jutic pare ma weg yath nia gicob yath i kum won man giboye de: e weg yath gicobo yath i kum Israel man giboye.

³E jutimo ceng’ pier ang’wen bo pire juywage ko; kum ceng’ mi royo yath ku boyo avu uthum kakare kumeca: man Jumisiri giywak pire ceng’ pier abiro.

⁴Man kinde ma ceng’ mi ywak ma pire kadhu, Yusuf uyero ni ot pa Farao, ewacu kumae, Tek kawono anwang’u bero i weng’wu, akwayuwu, wuyer i ith Farao, wuwac kumae,

⁵Vwa ketho akwong’o kwong’, ewacu kumae, Nen, atho: liel para m’atong’o ira i ng’om Kanan nuti, ibiyika keca. Ka kumeno kawono wek aidh malu, akwei, man ayik vwa, e abibino kendo.

⁶Man Farao wacu kumae, Idh malu, man iyik wuru, calu m’eketho ikwong’o.

⁷Man Yusuf uidho malu kara eyik won; man jutic pa Farao ceke giidho malu gikugi, judongo m’i ot pare, man judongo ceke m’i ng’om Misiri,

⁸man juot ceke pa Yusuf, ku utumin mire, man juot pa won: ento nyithindho migi ma thindho, man udul rombe migi, ku dhok migi, giweko i ng’om Gocen.

⁹Man magali ku weg riuni giidho malu gikugi: en e udul ma dit apila.

¹⁰Man giwok ba lelacam pa Atad, ma en e loka Yordan, e giywak keca ku ywak mi can ma dit: man eketho ywak pi won ceng’ abiro.

¹¹E ka ju m’ubedo i ng’ombe, Jukanani, gineno ywak wi lela pa Atad, giwacu kumae, Maeni ywak mi can mi Jumisiri: kum kumeno julwong’o nyinge Abel-mizraim, ma en e loka Yordan.

¹²Man wote timo ire calu eng’olo igi:

¹³kum wote gitere i ng’om Kanan, man giyike i odng’om mi podho mi Makpela, ma Ibrahim ung’iewo karacelo ku podho, ni piny mi kayik, ba Efron ma Jahiti, i wang’ Mamre.

¹⁴Man Yusuf udok i Misiri, en, ku utumin mire, yo ng’ei yiko won, ku dhanu ceke m’uidho malu karacelo kude niyiko won.

¹⁵E kinde ma utumin Yusuf gineno nia weggi tho, giwacu kumae, Kuno nyo Yusuf bidaguwa man ebiculo wang’ gin ma rac ceke ma watimo i kume i kumwa.

¹⁶E gioro kwenda ba Yusuf, giwacu kumae, Wuru ng’olo lembe ma foketho ngo, ewacu kumae,

¹⁷Wubiwacu ni Yusuf kumae, Akwei kawono wek kier ku dubo mi utumeru woko kum gitimo rac i beng’i. Man wakwei kawono iwek kier mi jutic pa Mungu pa wuru. Man Yusuf uywak ka giyero ire.

¹⁸Man utumin mire bende gicidho gipodho arieba wang’gi i wang’e; e giwacu kumae, Nen, wan wa jutic peri.

¹⁹E Yusuf uwacu igi kumae, Lworo kud unegwu: kum an ani i ka Mungu?

²⁰Man wun, wupido lembe rac i kuma; ento Mungu pido lembene mi ber, kara uketh etimbre, calu ebedo i ceng’ maeni, kara ubodh dhanu dupa gibed kwo.

²¹Ka kumeno kawono lworo kud unegwu: abigwokowu, ku nyithindho mu ma thindho. Man ejukogi, eweco ku bero i bang’gi de.

²²Man Yusuf ubedo i Misiri, en, ku ot pa won: man Yusuf ucamu ng’om rundi dak acel kud apar.

²³Man Yusuf uneno nyithindho pa Efraim mi dhanum’utuk mir adege: nyithindho pa Makir bende ma wod Manase junyolo wi cong Yusuf.

²⁴E Yusuf uwacu ni utumin mire kumae, Atho: ento Mungu biliewowu andha, man ebidwokowu malu kud i ng’om maeni ba ng’om m’ekwong’o ni Ibrahim, ni Isak, man ni Yakobo.

²⁵Man Yusuf uketho nyithindho mir Israel gikwong’o kwong’, ewacu kumae, Mungu biliewowu andha, man wubiyeyo cogona malu ku keni.

²⁶Kum kumeno Yusuf utho, ma rundi mi tio pare dak acel kud apar: e giroyo yath i kume giboye, man jukethe i sanduk mi yik i Misiri.