Read Alur Thangambere 7 Bible Online

Thangambere 7 - Alur bible

Thangambere 7

¹Man Yehova wacu ni Noa kumae, Wubin wuku juodi ceke i avur; kum aneni ibedo pwe i wang’a i kind dhanum’utuk maeni.

²Ku ba lim ceke ma leng’ igam abiro abiro, ma co ku ma dhakune; man ku ba lim ceke ma gi leng’ ungo, gam ario ario ma co ku ma dhakune:

³man winyo ma kor polo bende, abiro abiro, ma co ku ma mon, kara ugwok kodhi bed kwo i wang’ ng’om ceke.

⁴Kum fodi ceng’ udong’ abiro, man abikonjo koth wi ng’om ceng’ pier ang’wen ku diewor de pier ang’wen; man ku ba gin ceke ma kwo m’acwio abinyotho woko kud i wang’ ng’om.

⁵Man Noa timo calku ceke ma Yehova ng’olo ire.

⁶Man Noa rundi pare dak abusiel kinde ma pi m’ucoro ng’om ni wi ng’om.

⁷Man Noa mondo, ku wote, man dhaku pare, ku mond wote gikugi, i avur, ni kum pi dupa mi pi m’ucoro ng’om.

⁸Kind lim ma leng’, man kind lim ma gi leng’ ungo, man kind winyo, man kind kwond gin ceke ma lak wi ng’om,

⁹gimondo ario ario ba Noa i avur, ma co ku ma mon, calu Mungu ng’olo ni Noa.

¹⁰Man etimbre yo ng’ei ceng’ abiro, nia pi dupa mi pi m’ucoro ng’om ni wi ng’om.

¹¹I rundi dak abusiende mi camung’om pa Noa, i dwi mir arionde, i ceng’ apar wi abirone mi dwije, i cenguno kulo ceke mi nam ma dit uthwogre, man wang’ polo yabre.

¹²E koth ni wi ng’om ceng’ pier ang’wen ku diewor pier ang’wen.

¹³I cenguno Noa mondo i avur, man wot Noa, en e Cem ku Ham man Yafeth, man dhaku pa Noa, ku mond wote adek gikugi;

¹⁴gin, man ku ba yedi ceke ku kite ku kite, man lim ceke ku kite ku kite, man ku ba gin ceke ma lak i ng’om ku kite ku kite, man ku ba winyo ku kite ku kite, man ku ba winyo ceke ma kwonde tung’ tung’.

¹⁵Man gimondo i avur ba Noa, ario ario mi weg kum ceke ma lietho mi kwo ni i igi.

¹⁶Man ju ma gimondo, gimondo ma nico ku ma dhaku mi weg kum ceke, calu Mungu ng’olo ire: man Yehova ciko bang’e.

¹⁷E pi m’ucoro ng’om ubedo wi ng’om ceng’ pier ang’wen; man pi sagre, e eting’o avurne, man etingre malu ku wi ng’om.

¹⁸E pi sagre, man enyai dit wi ng’om; man avur uwotho wi wang’ pi.

¹⁹E pi sagre apila wi ng’om; man gudi ma wiu ceke ma gini the polo ceke umbre.

²⁰Pi pong’ ma sagu bot apar wi abic; man gudi umbre.

²¹Man weg kum ceke ma wotho ku wi ng’om utho, winyo, man lim, ku yedi, man ku ba gin ceke ma lak wi ng’om ma wotho wi ng’om man dhanu kubang’gi kubang’gi:

²²gin ceke ma yuyo mi tipo mi kwo ni i umgi, mi gin ceke ma ginuti wi ng’om m’uthwo, githo.

²³E gin ceke ma kwo kubang’e kubang’e unyothre ma ni i wang’ ng’om, dhanu, ku lim, man gin ma lak wi ng’om, ku winyo ma kor polo; e ginyothri kud i ng’om: man Noa kende e m’udong’, ku ju ma gini kude i avur.

²⁴Man pi sagre wi ng’om ceng’ dak acel ku pier abic.