Read Alur Thangambere 9 Bible Online

Thangambere 9 - Alur bible

Thangambere 9

¹Man Mungu mio mugisa ni Noa ku wote, man ewacu igi kumae, Wunyol, wumedru de, man wupong’ ng’om.

²Man lworowu ku ndiriwu bibedo wi yedi ceke ma wi ng’om kubang’e kubang’e, man wi winyo ceke ma kor polo kubang’e kubang’e; gin ceke ma ng’om upong’ ko, ku rec ceke m’i nam, jukethogi i cingi.

³Ku ba gin ceke ma kwo m’ubewotho bibedo ni cemo iwu; calu uboko ma numu m’amio iwu e amio iwu giki ceke kumeca.

⁴Ento ring’o ku kwone, ma en e rimone, kud wucam.

⁵Man andha rimo mu, rimo mi kwo mu abilwong’o; i cing’ yedi ceke kubang’e kubang’e abilwong’e: man i cing’ dhanu, cil i cing’ umego kubang’e kubang’e, abilwong’o kwo mi dhanu.

⁶Ng’atu ma tek uketho rimb dhanu cwir, en de dhanu biketho rimbe cwir: kum i ayi Mungu ecwio dhanu.

⁷E wun, wunyol, wunyai; wunyol dit i ng’om, man wunyai i ie.

⁸Man Mungu yero ni Noa, man ni wote ma gibedo gikugi, ewacu kumae,

⁹Man an, nen, aketho lembariba para cung kudu, man ku kodhiwu yo ng’eiwu;

¹⁰man ku gin ma kwo ceke kubang’e kubang’e ma gini kudu, winyo, man lim, ku yedi ceke m’i ng’om kubang’e kubang’e ma gini karacelo kudu; mi gin ceke m’uwok woko kud i avur, cil yedi ceke m’i ng’om kubang’e kubang’e.

¹¹Man abiketho lembariba para cung kudu; kadok weg kum ceke de gibinyothri kendo ngo ku pi mi pi ma coro ng’om; kadok pi ma coro ng’om de bibedo nuti kendo ngo ya unyoth ng’om.

¹²Man Mungu wacu kumae, Maeni giranyutha mi lembariba m’atimo i kindwa wakudu ku giracwia ma kwo ceke kubang’e kubang’e ma ni kudu, pi dhanu m’ucikutuk thiri thiri:

¹³aketho danyu para i afuru, man ebibedo ni giranyutha mi lembariba i kindwa ku ng’om.

¹⁴Man ebitimbre, kan akelo afuru wi ng’om, nia danyu binen i afurune,

¹⁵e abipoi kum lembariba para, ma ni i kindwa wakudu ku giracwia ma kwo ceke kubang’e kubang’e mi weg kum ceke; man pi bidoko ni pi ma coro ng’om kendo ngo ya unyoth weg kum ceke.

¹⁶Man danyu bibedo i afuru; man abineno i wie, kara apoi pi lembariba mi nja i kind Mungu ku giracwia ma kwo ceke kubang’e kubang’e mi weg kum ceke ma ni wi ng’om.

¹⁷Man Mungu wacu ni Noa kumae, Maeni lembanyutha mi lembariba m’aketho i kindwa waku weg kum ceke ma ni wi ng’om.

¹⁸Man wot Noa, m’uwok kud i avur, gi Cem, ku Ham, man Yafeth: man Ham en e won Kanan.

¹⁹Maeni adek gi wot Noa: man ng’om ngung’ upong’ ku dhanu ni kum juadek maeni.

²⁰Man Noa maku bedo jatipodho, man epidho podho mir ulok:

²¹e emadhu pigulokne, man emer; e ebedo muneru i hema pare.

²²Man Ham, ma won Kanan, uneno mumero pa won mire, e eyero ni utumin ario ma woko.

²³E Cem ku Yafeth giting’o kendi, man gikethe wi gokgi gin ario, e gicidho ku ng’eigi, man giumo muneru pa weggi; man wang’gi bedo yor i ng’eigi, e gineno muneru pa weggi ngo.

²⁴E Noa ceu kud i pigulok pare, man eng’eyo gin ma wode ma nok utimo ire.

²⁵Man ewacu kumae, Kwong’ ubed wi Kanan; Ebibedo jatic mi jutic ni utumin mire.

²⁶Man ewacu kumae, Mugisa bed ni Yehova Mungu pa Cem; Man wek Kanan ubed jatic pare.

²⁷Mungu med Yafeth, Man wek ebed i hema pa Cem; Man wek Kanan ubed jatic pare.

²⁸Man Noa camu ng’om rundi dak adek ku pier abic yo ng’ei pi m’ucoro ng’om.

²⁹Man ceng’ pa Noa ceke en e rundi dak abung’wen ku pier abic: e etho.