Read Alur 2 Samwil 1 Bible Online

2 Samwil 1 - Alur bible

2 Samwil 1

¹Man etimbre yo ng’ei tho pa Saul, kinde ma Daudi dwogo ku ba nek mi Juamaleki, man Daudi bedo ceng’ ario i Ziklag;

²etimbre i ceng’ mir adege, nia, nen, ng’atu acel uai ba Saul i kagonjo, ku kendi pare m’uyec, man ku ng’om i wie: man ebedo kumeno, kinde m’ebino ba Daudi, nia epodho i ng’om, man erwo.

³Man Daudi wacu ire kumae, Iai kani? man ewacu ire kumae, Aboth kud i ka ma Israel ugonjo i ie.

⁴Man Daudi wacu ire kumae, Lembene timbre nenedi? Akwei, yer ira, Man eloko lembe kumae, Dhanu giringo ku dhu lwiny, man kind dhanu dupa bende podho e githo; man Saul ku Yonathan ma wode bende githo.

⁵E Daudi wacu ni jalawobine m’uyero ire lembe kumae, Ing’eyo nenedi nia Saul ku Yonathan ma wode githo?

⁶Man jalawobine m’uyero ire uwacu kumae, Kan awok kum got Gilboa, nen, Saul ujeng’ kum tong’ pare; man, nen, magali ku weg riuni gilubo toke ma tek.

⁷Man kan eneno ng’eye, enena, man elwong’a. E aloko lembe kumae, Anuti.

⁸Man ewacu ira kumae, In i ng’a? Man aloko ire lembe kumae, An a Jaamaleki.

⁹Man ewacu ira kumae, Akwei, Cung i ng’eta, man inega; kum atem umaka; kum fodi kwo para ni bo i ia.

¹⁰Kum kumeno acungo i ng’ete, man anege, kum ang’eyo andha nia ecopo bedo kwo ngo yo ng’ei podho m’epodho man ating’o jamkermiwic ma ni i wie, ku gwang’ ma ni i bote, man akelogi keni ba rwoth para.

¹¹Daudi lund umaku kendi pare, man eyeco; man dhanu ceke ma gini karacelo kude bende kumeca:

¹²e can unegogi, man giywak, e giweko cam cil uthieno, pi Saul, man pi Yonathan ma wode, man pi dhanu pa Yehova, man pi ot mir Israel; kum gipodho ku palamularu.

¹³Man Daudi wacu ni jalawobine m’uyero ire lembe kumae, In i dhanu ma kani? Man eloko lembe kumae, An a wod umondo, a Jaamaleki.

¹⁴Man Daudi wacu ire kumae, Lworo negi ngo nedi nirieyo cingi m’inyoth ko ng’atu ma Yehova wiro?

¹⁵E Daudi lwong’o ng’atu acel ma kind awobi, man ewacu kumae, Cor ceng’ni, man ipodh i wie. Man egoye, ketho etho.

¹⁶E Daudi wacu ire kumae, Rimbi bed i wii; kum dhogi tuco lembe i wii, iwacu kumae, Anego ng’atu ma Yehova wiro.

¹⁷Man Daudi ywagu Saul giku Yonathan ma wode ku ywak maeni

¹⁸(Man ewacu igi ya giponj nyithindho pa Yuda ku wer mir atum: nen, egore i kitabu pa Yacar):

¹⁹Dwong’ peri, E Israel, junego i kakeri ma malu! Aka jutego podho maa!

²⁰Kud wuyer pire i Gath, Kud wurweye i gengi mi Ackelon; Anyong’a maru nego nyig Jufilisti, Nyig ju ma yaa mbe i kumgi maru sagu.

²¹Wu gudi mi Gilboa, Thoi kud ubed i wiwu kadi koth, kadok pothi mi girathiera: Kum jubayu ban mi jutego keca ku lewic. Ban pa Saul, calu pa ng’atu ma juwiro ngo.

²²Ku ba rimo mi ju ma junego, ku ba mio mi jutego, Atum pa Yonathan udwogo ngo. Man palamularu pa Saul udwogo mananu ngo.

²³Saul ku Yonathan gi weg mer, man gi ber i bedo migi, Man gipokri ngo i tho migi: Kumgi yot mi ringo ma sagu acur, Gi tek ma sagu umvor.

²⁴Wu nyig Israel, wuywag Saul, M’uronyowu ku kendi ma kwar ngbo ku mutoro, M’uruko kendi mu ku mola ma kwar.

²⁵Aka jutego podho i lwiny mire maa! E Yonathan, ma junegi i kakeri ma malu.

²⁶Can unega piri, umira ma Yonathan: Ibedo ber dit ira: Mer peri m’i kuma wang’u ijo, Sagu mer mi mon.

²⁷Aka jutego podho maa, Man jambali rwinyo!