Read Alur 2 Samwil 10 Bible Online

2 Samwil 10 - Alur bible

2 Samwil 10

¹Man etimbre yo ng’ei maeni, nia ubimo mi nyithindho mir Amon utho, man Hanun ma wode camu ker kakare.

²Man Daudi wacu kumae, Abinyutho bero ni Hanun ma wod Nahac, calu won unyutho bero ira. Kum kumeno Daudi ciko lembe ku dhu jutic pare kara ujuke pi won. Man jutic pa Daudi giwok i ng’om mi nyithindho mir Amon.

³Ento judongomawijo mi nyithindho mir Amon giwacu ni Hanun ma rwoth migi kumae, Iwacu nyo Daudi bemio yung ni wuru, kum eoro jujuk i beng’i? Daudi oro jutic pare i beng’i ngo kara giyeny i adhura, man gilibe, man ging’iele?

⁴Kum kumeno Hanun ugamu jutic pa Daudi, man elielo theng’ tikgi kucel, man ethumo kendi migi pu, wi adhiggi, e ecikogi.

⁵Man ka giyero maeni ni Daudi eoro kwenda uromb kugi; kum lewic unego dhanune dit. Man Daudi wacu kumae, Wubed i Yeriko maram tikwu wob ko, e ka wudwogi.

⁶Man ka nyithindho mir Amon gineno nia gidoko ni ginmajudagu ni Daudi, nyithindho mir Amon gioro kwenda man gimio sukulia gigamu ko Jucami ba Beth-rehob, man Jucami pa Zoba, dhany ma ku tielo rubanga pier ario, man ubimo mi Maka karacelo ku dhanu rubanga acel, man dhanu pa Tob dhanu rubanga apar wi ario.

⁷Man ka Daudi winjo pire, eoro Yoab, kud udul ceke mi dhanu ma tek.

⁸E nyithindho mir Amon giwok woko, man githero lwiny i kamondo mi dhugang’: man Jucami pa Zoba man pa Rehob, ku dhanu pa Tob man Maka, gini karacelo i thim.

⁹Nie kinde ma Yoab uneno nia juthero lwiny i kume i wang’e ku yor i ng’eye de, egoyo wi dhanu ma cu ceke mir Israel, man etherogi kum Jucami:

¹⁰man dong’ dhanu eketho i cing’ Abicai m’umin mire; man etherogi dhu nyithindho mir Amon,

¹¹Man ewacu kumae, Tek Jucami gibedo tek m’usagu ira, e ibilund konya; ento tek nyithindho mir Arnon gibedo tek m’usagu iri, abilund bino man abikonyi.

¹²Wubed ku tegocwiny, man dong’ wadwok cwinywa tek pi dhanu mwa, man pir adhura pa Mungu mwa: man Yehova tim gin m’ubedo ber ire.

¹³Kum kumeno Yoab ku dhanu ma gini karacelo kude gicoro ceng’ni lwiny kum Jucami: e giringo i wang’e.

¹⁴Man kinde ma nyithindho mir Amon gineno nia Jucami giringo, e gin bende giringo i wang’ Abicai, e gimondo i adhura. Yoab ulund uai ba nyithindho mir Amon, man ebino Yerusalem.

¹⁵Man ka Jucami gineno nia jusagugi i wang’ Israel, e gicokri gigi karacelo.

¹⁶Man Hadarezer uoro kwenda, man egamu Jucami ma gini loka Kulo: e gibino Helam, karacelo ku Cobak ma jego mir udul pa Hadarezer i wigi.

¹⁷E juyero maeni ni Daudi; man ecoko Israel ceke karacelo, e ekadhu loka Yordan man ebino Helam. Man Jucami githeri gigi kum Daudi, man gikiedo kude.

¹⁸E Jucami giringo i wang’ Juisraeli; man Daudi nego kind Jucami dhanu mi magali dak abiro, man weg riuni rubanga pier ang’wen, man egoyo Cobak ma jego mir udul migi, ketho nia etho keca.

¹⁹Man kan ubimo ceke ma gi jutic pa Hadarezer gineno nia jusagugi i wang’ Israel, gitimo kwiocwiny kud Israel, man gitimo igi. Kum kumeno lworo konyo nyithindho mir Amon kendo unego Jucami.