Read Alur 2 Samwil 11 Bible Online

2 Samwil 11 - Alur bible

2 Samwil 11

¹Man etimbre, ka rundi wok kendo, i nindo m’ubimo cidho yo lwiny, nia Daudi oro Yoab, ku jutic pare gikugi, man Israel ceke; man ginyotho nyithindho mir Amon, man gitieko Raba kud ali. Ento Daudi dong’ i Yerusalem.

²Man etimbre i kinde mir uthieno, nia Daudi ai malu ku wi kavuto pare, man ewotho wi ot p’ubimo: man eneno dhaku moko m’ubejom ku wi ot; e dhakune leng’ hai mir anena.

³Man Daudi oro kwenda epenjo de pi dhakune. Man ng’atu moko wacu kumae, Maeni Bath-ceba ngo, ma nyar Eliam, ma dhaku p’Uria ma Jahiti?

⁴E Daudi oro jukwenda, man gigame; man ebino i bang’e, e evuto kude (kum ebedo leng’ kum cilo pare); e edok i ot pare.

⁵E dhakune gamu ie; man eoro eyero ni Daudi, ewacu kumae, Ia nuti.

⁶E Daudi oro lembe ba Yoab, ewacu kumae, Or Uria ma Jahiti i bang’a. Man Yoab uoro Uria ba Daudi.

⁷Man kan Uria wok i bang’e, Daudi penje maram Yoab utimo ko, man maram dhanu bedo ko, man maram ali bedo ko miero.

⁸E Daudi wacu ni Uria kumae, Lor piny i ot peri, man ihvok tiendi. E Uria ai kud i ot p’ubimo, man cemo m’uai bang’ ubimo ulube.

⁹Ento Uria vuto dhugola mi ot p’ubimo karacelo ku jutic pa rwoth pare ceke, man eloro piny ba ot pare ngo.

¹⁰E ka juyero ni Daudi, juwacu kumae, Uria loro piny ba ot pare ngo, Daudi wacu ni Uria kumae, Iai i woth ungo? nedi iloro piny ungo ba ot peri?

¹¹Man Uria wacu ni Daudi kumae, Sanduk, man Israel, ku Yuda, gibedo i odbak; man rwoth para ma Yoab, ku jutic pa rwoth para, gigonjo i thim ma ngbeng’; abilund mondo i ot para, nicamu man nimadhu, man nivuto ku dhaku para? calu ibedo kwo, man calu ng’eyong’ec peri bedo kwo, abitimo gin maeni ngo.

¹²Man Daudi wacu ni Uria kumae, Ri keni tinuni bende, man urwo abiweko icidho. Kum kumeno Uria bedo i Yerusalem i ceng’ maeca, man urwone.

¹³Man kinde ma Daudi lwong’e, ecamu man emadhu i wang’e; e eketho emer: man uthieno ecidho kara evut wi kavuto pare karacelo ku jutic pa rwoth pare, ento eloro piny Ungo ba ot pare.

¹⁴Man etimbre kugweno, nia Daudi goro waraga ni Yoab, man eore ku cing Uria.

¹⁵Man egoro i waragane, ewacu kumae, Wuketh Uria i wang’ lwiny ma tek, man wucor cen kud i kume, kara jugoye, man etho.

¹⁶Man etimbre, kinde ma Yoab ukuro adhura, nia eketho Uria i ka m’eng’eyo nia dhanu ma jurukara gini ie.

¹⁷E dhanu mir adhurane giwok woko, man gikiedo ku Yoab: e kind dhanu, ma jutic pa Daudi gipodho; man Uria ma Jahiti utho bende.

¹⁸Yoab ulund uoro kwenda man eyero ni Daudi pi gin ceke mir ali;

¹⁹man eng’olo ni jakwendane, ewacu kumae, Kinde m’idaru yero gin ceke mir ali ni ubimo,

²⁰ebibedo nia tek kwinyo p’ubimo wok, man ewacu iri kumae, Nedi wucidho ceng’ni adhura nikiedo? wung’eyo ngo nia gibikilowu kud i gang’kidi?

²¹ng’a m’ugoyo Abimelek ma wod Yerubecethi? dhaku bolo kidi rego ma malu i wie ngo ku wi gang’kidi, ketho nia etho i Thebezi? nedi wucidho kumeni ceng’ni ba gang’kidi? kan ibilund wacu kumae, Jatic peri Uria ma Jahiti bende tho.

²²Kum kumeno jakwenda cidho, man ebino enyutho ni Daudi gin ceke ma Yoab uore pire.

²³E jakwenda wacu ni Daudi kumae, Dhanu gisagu i kumwa man giwok woko i bang’wa i thim, man wakiedo kugi cil kum kamondo mi dhugang’.

²⁴Man weg athero gikilo jutic peri ku wi gang’kidi; man jumoko ma kind jutic p’ubimo githo, man jatic peri m’Uria ma Jahiti bende tho.

²⁵Daudi lund uwacu ni jakwenda kumae, Ibiwacu ni Yoab kumae, Kud iyi gin maeni ton ii, kum palamularu nego ng’atu acel calu mucelo; keth ali peri bed tek ma sagu kum adhurane, man ing’iele: man idwok cwinye tek.

²⁶Man kinde ma dhaku p’Uria winjo nia Uria ma cware tho, eywagu cware.

²⁷Man kinde ma nindo mi ywak ukadhu, Daudi oro kwenda man egame i bang’e i ot pare, man edoko dhaku pare, e enyolo ire nyathin ma nico. Ento gin ma Daudi timo ton i Yehova.