Read Alur 2 Samwil 12 Bible Online

2 Samwil 12 - Alur bible

2 Samwil 12

¹Man Yehova oro Nathan ba Daudi. Man ebino i bang’e, ewacu ire kumae, Dhanu ario ginuti i adhura acel; acel jalonyo, wadi ke jacan.

²Jalonyone en e won udul rombe ku dhok ma dit apila;

³ento jacan ke gin moko m’ebedo ko mbe, ndhu nyathi rombo acel ma vonge, m’eng’iewo man etunge: man edongo i bang’e, man ku nyithindho pare; ecamu kum cemo pare ma dhe, man emadhu kud i kopo pare ma dhe, man evuto i kore, e ebedo ire calu nyare.

⁴E jawoth ubino ba jalonyo, man ekwero gamu kind udul rombe pare ma dhe man kind dhiang’ pare ma dhe, kara eyang’e ni jawoth m’ubino i bang’e, ento egamu nyathi rombo pa jacan, man eyang’e ni ng’atu m’ubino i bang’e.

⁵E ng’ecwiny pa Daudi opo dit kum ng’atuno; man ewacu ni Nathan kumae, Calu Yehova bedo kwo, ng’atu m’utimo maeno eromo ku tho:

⁶man ebidwoko nyathi rombo bang’ ang’wen, kum etimo gin maeni, man kum ngisi pare m’umbe.

⁷Man Nathan uwacu ni Daudi kumae, In i ng’atuno. Yehova, Mungu mir Israel, uwacu kumae, Awiri ni ubimo wi Israel, man abodhi kud i cing’ Saul;

⁸man amio iri ot pa jadit peri, man mon pa jadit peri i kori, man amio iri ot mir Israel ku pa Yuda; man tek maeni bedo nok m’usagu, kuno di amedo iri gin ma kuman kuman.

⁹Icayu lembe pa Yehova nedi, kutimo gin maeni ma rac i wang’e? igoyo Uria ma Jahiti ku palamularu, man igamu dhaku pare ubed dhaku peri, man inege ku palamularu ku yo ba nyithindho mir Amon.

¹⁰Ka kumeno kawono palamularu biweko ot peri ki ngo, kum icaya, man igamu dhaku p’Uria ma Jahiti ubed dhaku peri.

¹¹Yehova wacu kumae, Nen abiting’o lem ma rac i kumi kud i ot peri giri; man abigamu mon peri kud i weng’i, e abimiogi ni jadhugola peri, e ebivuto ku mon peri i wang’ ceng’ maeni.

¹²Kum itime amung’a: ento abitimo gin maeni i wang’ Israel ceke, man i wang’ ceng’.

¹³E Daudi wacu ni Nathan kumae, Adubo ni Yehova. Man Nathan uwacu ni Daudi kumae, Yehova bende ketho dubo peri cen; ibitho ngo.

¹⁴Ento, ni kum gin maeni m’itimo imio kaka ma dit ni judegi pa Yehova kara uyer lembacidi, nyathin ma junyolo iri bende bitho andha.

¹⁵E Nathan udok i ot pare. Man Yehova goyo nyathin ma dhaku p’Uria nyolo ni Daudi, e kume lith dit.

¹⁶Ka kumeno Daudi kwayu Mungu pi nyathinne; man Daudi kwiro cam, e emondo, man evuto diewor soro i ng’om.

¹⁷Man judongo m’i ot pare giai, e gicungo i vute, kara giting’e malu kud i ng’om: ento eyenyo ngo, kadok camu kwen kugi de ecamu ngo.

¹⁸Man etimbre i ceng’ mir abirone, nia nyathinne tho. Man jutic pa Daudi lworo wacu ire nia nyathinne tho unegogi; kum giwacu kumae, Nen, kinde ma fodi nyathin ubedo kwo, wayero ire, man ewinjo dwand wa ngo: e ka tek wawacu ire nia nyathin utho ke, ebitimbre nedi!

¹⁹Ento kinde ma Daudi neno nia jutic pare gibemung’ amung’a karacelo, Daudi ng’eyo nia nyathinne tho; e Daudi wacu ni jutic pare kumae, Nyathin utho? Man giwacu kumae, Etho.

²⁰Daudi lund uai kud i ng’om, man elogo, e ewir gire, man eloko kendi pare; man emondo i ot pa Yehova, erwo de: kan elund ebino i ot pare; man kan epenjo, giketho kwen i wang’e, e ecamu.

²¹Jutic pare gilund giwacu ire kumae, Gin maeno m’itimo en e ang’o? ikwiro cam man iywak pi nyathinne, kinde m’ebedo kwo; ento ka nyathine tho, iai malu man icamu kwen.

²²Man ewacu kumae, Kinde ma fodi nyathin ubedo kwo, akwiro cam man aywak: kum awacu kumae, Ng’a m’ung’eyo kuno nyo kisa binego Yehova i kuma, kara nyathin ubed kwo?

²³Ento kawono etho, akwir cam mir ang’o? acopo dwoke kendo? abicidho i bang’e, ento ebidwogo ngo i bang’a.

²⁴Man Daudi juko Bath-ceba ma dhaku pare, e emondo i bang’e, man evuto kude: man enyolo nyathin ma nico, e elwong’o nyinge Suleman. Man Yehova mare;

²⁵e eoro lembe ku cing’ Nathan ma jabila; man ecaku nyinge Yedidia, ni kum Yehova.

²⁶Nie Yoab ukiedo kum Raba mi nyithindho mir Amon, man emaku adhura mir ubimo.

²⁷E Yoab uoro jukwenda ba Daudi, man ewacu kumae, Akiedo kum Raba; eyo, amaku adhura mi pi.

²⁸Ka kumeno kawono cok dong’ dhanu karacelo, man igonj kum adhurane e imake; amaru maku adhurane, man jumaru lwong’e ku nyinga.

²⁹E Daudi coko dhanu ceke karacelo man ecidho ba Raba, ekiedo i kume de, man emake.

³⁰Man ewodho jamkermiwic mir ubimo migi kud i wie; e pekne en e talanto mi mola ma kwar, man kidi ma pire tek ni i ie; man jukethe i wi Daudi. Ewodho ayeki mir adhurane de, dit apila.

³¹Man ewodho dhanu ma gini i ie woko, man ekethogi kum uligu, man kum umbu ma koro i ng’om, man kum lei mi nyunyu, man eketho gikadhu ku ka ma jugoyo ie biriki: man etimo kumeca kum adhura ceke mi nyithindho mir Amon. Man Daudi ku dhanu ceke gidok i Yerusalem.