Read Alur 2 Samwil 13 Bible Online

2 Samwil 13 - Alur bible

2 Samwil 13

¹Man etimbre yo ng’ei maeni, nia Absalom ma wod Daudi nyamin mire nuti ma wang’e leng’, ma nyinge Tamar; man Amnon ma wod Daudi mare.

²Man ava Tamar ma nyamin mire nego Amnon dit ketho kume make; kum en e nyaku ma sumba; man timo gin moko ire ubedo tek ni Amnon.

³Ento Amnon jarimbe nuti, ma nyinge Yonadab, ma wod Cimea, m’umin Daudi: man Yonadab en e dhanu ma riek dit.

⁴Man ewacu ire kumae, Nedi E wod ubimo, imok kumeni ceng’ ku ceng’i? ibiyero ira ngo? Man Amnon uwacu ire kumae, Amaru Tamar, ma nyamin umira ma Absalom,

⁵Man Yonadab uwacu ire kumae, Vut wi kavuto peri, man ipeli nia kumi lith: e kinde ma wuru bino neni, wac ire kumae, Wek nyamira ma Tamar ubin, akwei, man emi ira kwen acam, man eyik cemo i wang’a, kara anene, man acam kud i cinge.

⁶Kum kumeno Amnon uvuto, man epale gire nia kume lith: e kinde m’ubimo bino nene, Amnon uwacu ni ubimo kumae, Wek Tamar ma nyamira bin, akwei, man etim ira kwen m’apada ario i wang’a, kara acam kud i cinge.

⁷Daudi lund uoro lembe pacu ba Tamar, ewacu kumae, Cidh kawono i ot pa Amnon m’umeru, man iyik cemo ire.

⁸Kum kumeno Tamar ucidho i ot pa Amnon m’umin mire; man evuto avuta. Man eting’o kwen, emiene de, e etimo kwen m’apada i wang’e, man etedo kwen m’apadane.

⁹Man eting’o jamni, e etokogi i wang’e; ento ekwero camu. Man Amnon uwacu kumae, Lal co ceke kud i kuma. Man gilal kubang’gi kubang’gi kud i kume.

¹⁰Man Amnon uwacu ni Tamar kumae, Kel cemone i kusika, kara acame kud i cingi. Man Tamar uting’o kwen m’apadane m’etimo, ekelogi de i kusika bang’ Amnon m’umin mire.

¹¹E kinde m’ekelogi ceng’ni i bang’e kara ecam, emake, man ewacu ire kumae, Bin, wavut kudi, nyamira.

¹²Man eloko lembe ire kumae, Ungo, umira, kud icida; kum maku wagi gin ma kumeni kud utimbre i kind Israel: kud itim kasegu maeni.

¹³Man an, abitero lewic para kani? man in, ibibedo calu ng’atu acel ma kind jukusegu i kind Israel. Ka kumeno kawono, akwei, yer ni ubimo; kum ebikwera iri ngo.

¹⁴Ento eyio ngo ewinj dwande; ento kum e tek ma sage, emake, man evuto kude.

¹⁵Amnon ulund udage kud adegi ma dit apila; kum adegi m’edage ko sagu mer ma naka emare ko. Man Amnon uwacu ire kumae, Ai malu, cidhi.

¹⁶E ewacu ire kumae, Kumeno ngo, kum dubo ma dit maeni ku riem m’iriema ko e rac ma sagu gin maeni m’itimo i kuma. Ento eyenyo ngo ewinj dwande.

¹⁷Elund elwong’o jatic pare ma timo ire, man ewacu kumae, Kab dhaku maeni woko kud i bang’a kawono, man icik dhugola i toke kud utwindi.

¹⁸Man kendi ma kite tung’ tung’ ni i kume; kum nyig ubimo ma gisumba gibedo ku wagi kendi ma kumeno. Jatic pare lund uwodhe woko, man eciko dhugola yo ng’eye kud utwindi.

¹⁹Man Tamar uketho vuru i wie, eyeco kendi pare de ma kite tung’ tung’ ma ni i kume; man egwaku wie ku cinge, man ecidho i yo pare, m’ewotho kuywak ma tek.

²⁰Man Absalom m’umin mire wacu ire kumae, Amnon m’umeru udubi? ento kawono twi cwinyi, nyamira: en e umeru; kud iyi lembe maeni dieng’ cwinyi. Kum kumeno Tamar ubedo i ot p’umin ma Absalom ma wang’e bedo lic.

²¹Ento ka Daudi m’ubimo winjo pi gin maeni ceke, kwinyo ma dit unege.

²²Man Absalom uyero lembe moko ngo ni Amnon ma rac kadi ma ber de; kum Absalom udagu Amnon, kum edubo Tamar ma nyamin mire.

²³Man etimbre yo ng’ei rundi ario yul, nia Absalom ubedo ku junyar yuk rombe i Bal-hazor, ma ni i ng’et Efraim: man Absalom ulwong’o wot ubimo ceke.

²⁴E Absalom ubino bang’ ubimo, man ewacu kumae, Kawono nen, jatic peri bedo ku junyar yuk rombe; akwei, wek ubimo ku jutic pare gicidh karacelo ku jatic peri.

²⁵Man ubimo wacu ni Absalom kumae, Ungo, woda, ku wacidh kawa ceke, wamaru sendi. Man ecuke: ento ekwero cidho, endre emio ire mugisa.

²⁶Absalom ulund uwacu kumae, Tek kumeno ngo, akwei, wek wacidh wakud Amnon m’umiragi. E ubimo wacu ire kumae, Nedi wuci wukugi?

²⁷Ento Absalom ucuke, man eweko Amnon ku wot ubimo ceke gicidh gikugi.

²⁸Man Absalom ung’olo ni jutic pare, ewacu kumae, Wunen kawono, kinde ma pigulok umero adunde Amnon; man kinde m’awacu iwu kumae, Goi Amnon, e wunege; lworo kud unegwu; ang’olo iwu ngo? wubed ku tegocwiny, man wubed jiurukara.

²⁹Man jutic pa Absalom gitimo kum Amnon calu Absalom ung’olo. Wot ubimo ceke gilund giai malu, man kubang’gi kubang’gi ng’atuman uidho wi kana pare, man giringo.

³⁰Man etimbre, kinde ma gini i yo, nia rwonglembe tundo ba Daudi, m’uwacu kumae, Absalom unego wot ubimo ceke, ng’atu acel de mbe m’i kindgi m’udong’.

³¹Ubimo lund uai, man eyeco kendi pare, evuto i ng’om de; man jutic pare ceke gicungo i vute ku kendi migi m’uyec.

³²Man Yonadab, ma wod Cimea, m’ umin Daudi, eloko lembe man ewacu kumae, Dong’ rwoth para kud uwac nia nyo ginego awobi ceke ma wot ubimo; kum Amnon kende e m’utho: kum ni kum lembe pa Absalom jukeco maeni ugambre i ceng’ m’edubo ie Tamar ma nyamin mire.

³³Ka kumeno kawono rwoth para m’ubimo adundene kud udieng’ kum lembe maeni, ma nia ewac nyo wot ubimo ceke githo; kum Amnon kende e m’utho.

³⁴Ento Absalom uringo. Man jalawobi ma kuro piny uting’o wang’e malu, man eneno, man, nen, dhanu dupa gibino yo kum ungulu got yor i ng’eye.

³⁵Man Yonadab uwacu ni ubimo kumae, Nen, wot ubimo giwok: calu jatic peri wacu, ebedo kumeca.

³⁶Man etimbre, kan edaru weco, nia, nen, wot ubimo gibino, man giting’o dwandgi malu, e giywak: man ubimo bende ku jutic pare ceke giywak hai.

³⁷Ento Absalom uringo, man ecidho ba Talmai ma wod Amihur, m’ubimo mi Gecur. Man Daudi ywak pi wode ceng’ ku ceng’.

³⁸Kum kumeno Absalom uringo, man ecidho Gecur, e ebedo kuca rundi adek.

³⁹Man ava cidho tok Absalom unego ubimo ma Daudi: kum ejukre kum Amnon, kum etho.