Read Alur 2 Samwil 14 Bible Online

2 Samwil 14 - Alur bible

2 Samwil 14

¹Nwang’u Yoab ma wod Zeruia ng’eyo nia cwiny ubimo ni yo ba Absalom.

²Man Yoab uoro kwendai i Tekoa, man egamu dhaku ma riek ku kuca, man ewacu ire kumae, Akwei, peli giri nia in i jaywak, man ikend kendi mi ywak, akwei, man kud iwiri ku mo, ento ibed calu dhaku m’ugamu ywak con kum dhanu pare m’utho:

³man imond bang’ ubimo, e iwac calu maeni ire. Kum kumeno Yoab uketho lembe i dhoge.

⁴Man kinde ma dhaku ma Tekoa yero ni ubimo, epodho arieba wang’e i ng’om, man erwo, ewacu kumae, Konya, E ubimo.

⁵Man ubimo wacu ire kumae, Gin moko timi? Man ewacu kumae, Andha an a dhaku ma cwara tho, e cwara tho.

⁶E bong’ peri bedo ku wote ario, e gipiembri karacelo i podho, man ng’atu moko mbe m’utheggi, ento ng’atu acel ugoyo wadi, enege de.

⁷Man, nen, wat ceke giai kum bong’ peri, man giwacu kumae, Mi ng’atu m’ugoyo umin mire, kara wanege pir umin mire m’enego, man nia ginyoth jacam pacu bende kumeca. E kumeno gibinego cukmac para m’udong’, man gibiweko nying’ ungo ni cwara, kadok donge m’udong’ i wang’ ng’om.

⁸E ubimo wacu ni dhakune kumae, Dok i ot peri, man abimio lembang’ola piri.

⁹Man dhaku ma Tekoa wacu ni ubimo kumae, Rwoth para, E ubimo, kier ubed i wia, man wi ot pa vwa; man ubimo ku komker pare ubed umbe dubo.

¹⁰Man ubimo wacu kumae, Ng’atu ma tek uyero lembe moko i beng’i, kele i bang’a, man ebimulo kumi kendo ngo.

¹¹Elund ewacu kumae, Akwei, dong’ ubimo poi kum Yehova Mungu peri, kara jacul wang’ rimo kud unyoth kendo, gimaru nyotho woda. Man ewacu kumae, Calu Yehova bedo kwo, yukwi wodi acel de mbe ma bipodho i ng’om.

¹²Dhakune lund uwacu kumae, Akwei, wek bong’ peri yer lembe acel ba rwoth para m’ubimo. Man ewacu kumae, Yer asu.

¹³Man dhakune wacu kumae, Kum kumeno nedi ii pido pi wagi gin ma kumeni kum dhanu pa Mungu? kum kuyero lembe maeni ubimo bedo calu ng’atu ma lembe ni i wie, kum ubimo kudwoko ng’atu ma pare ma juriemo kendo ngo pacu.

¹⁴Kum wabikotho be, man wa calu pi m’uoi i ng’om, ma jucopo coko kendo ngo; kadok Mungu de ekabu kwo woko ngo, ento ie poro lembe, kara ng’atu ma jurieme kud ebed ng’atu ma jurieme kud i bang’e.

¹⁵Ka kumeno kawono kum nwang’u abino niyero lembe maeni ni rwoth para m’ubimo, en e kum dhanu nyayu lworo i ia: man bong’ peri wacu kumae, Abiyero kawono ni ubimo; kuno nyo ubimo bitimo penji pa jatic pare.

¹⁶Kum ubimo biwinjo, kara ebodh jatic pare kud i cing’ ng’atu m’uyenyo nyotha ku woda karacelo ku i aba pa Mungu.

¹⁷Bong’ peri lund uwacu kumae, Akwei, wek lembe pa rwoth para m’ubimo ubed mi juk; kum calu malaika pa Mungu, rwoth para m’ubimo bedo kumeca m’eng’io ko gin ma ber ku gin ma rac: e Yehova Mungu peri bed kudi.

¹⁸Ubimo lund uloko lembe man ewacu ni dhakune kumae, Akwei, kud imung’ ira, gin moko m’abipenji pire. Man dhakune wacu kumae, Wek rwoth para m’ubimo yer kawono.

¹⁹E ubimo penjo kumae, Cing’ Yoab ni kudi i gin maeni ceke? Man dhakune loko lembe man ewacu kumae, Calu ng’eyong’ec peri bedo kwo, rwoth para m’ubimo, ngat’u moko mbe ma copo lokre yo ku cinge ma yor acwic kadi ma yor acam ku ba gin ma rwoth para m’ubimo yero; kum jatic peri Yoab, ewacu ira, man eketho lembe maeni ceke en i dhu bong’ peri;

²⁰jatic peri ma Yoab utimo lembe maeni kara ulok ayi lembene: e rwoth para e riek, calku rieko pa malaika pa Mungu, mi ng’eyo gin ceke ma ni i ng’om.

²¹Man ubimo wacu ni Yoab kumae, Kawono nen, atimo gin maeni: ka kumeno cidhi, gam jalawobine ma Absalom kendo.

²²Man Yoab upodho arieba wang’e i ng’om, man erwo, emio mugisa ni ubimo de; man Yoab uwacu kumae, Tinuni jatic peri ng’eyo nia anwang’u bero i weng’i, E rwoth para, ubimo, kum ubimo timo penji pa jatic pare.

²³Kum kumeno Yoab uai man ecidho Gecur, man ekelo Absalom i Yerusalem.

²⁴Man ubimo wacu kumae, Wek ekadh i ot pare ma dhe, ento kud enen wang’a. Kum kumeno Absalom ucidho i ot pare ma dhe, man eneno wang’ ubimo ngo.

²⁵Nwang’u ng’atu moko mbe i Israel ceke ma jupake hai kum leng’ne ma calu Absalom: ugambre kum tiende cik i wie abala moko mbe i kume.

²⁶Man kinde m’enyaru yukwie (enyare nwang’u rundi thum; kum ebedo pek i wie, ka kumeno enyare); eporo yukwie cekel dak ario calku mukero p’ubimo.

²⁷Man junyolo nyithindho ma co adek ni Absalom, man nyaku acel, ma nyinge Tamar: en e nyaku ma wang’e leng’.

²⁸Man Absalom ubedo rundi ario yul i Yerusalem; man eneno wang’ ubimo ngo.

²⁹Absalom ulund ulwong’o Yoab, kara eore bang’ ubimo; ento ekwero bino i bang’e: man eoro kendo wang’ arionde, ento ekwero bino.

³⁰Ka kumeno ewacu ni jutic pare kumae, Wunen, podho pa Yoab ni i ng’et para, man nganu ni i ie keca; wucidh wucwinye ku mac. Man jutic pa Absalom gicwinyo podhone ku mac.

³¹Yoab ulund uai, man ebino ba Absalom i ot pare, man ewacu ire kumae, Nedi jutic peri gicwinyo podho para ku maci?

³²Man Absalom uloko lembe ni Yoab kumae, Nen, aoro kwenda i beng’i awacu kumae, Bin keni, kara aori bang’ ubimo, kara iwac kumae, Nedi aai i Gecuri? e ber ma sagu ira tek abedo asu kuca. Ka kumeno kawono wek anen wang’ ubimo; man tek kier ni i ia, wek enega.

³³Kum kumeno Yoab ubino bang’ ubimo, man eyero ire; e kan elwong’o Absalom, ebino bang’ ubimo, man erum arieba wang’e i wang’ ubimo: e ubimo cwio limb Absalom.