Read Alur 2 Samwil 2 Bible Online

2 Samwil 2 - Alur bible

2 Samwil 2

¹Man etimbre yo ng’ei maeni, nia Daudi penjo ba Yehova, ewacu kumae, Abiidho malu i adhura moko mi Yuda? E Yehova wacu ire kumae, Idh malu. Man Daudi wacu kumae, Abiidho malu kakani? Man ewacu kumae, I Hebron.

²Kum kumeno Daudi idho malu kuca, ku mon pare ario bende, Ahinoam ma Nyayezreli, kud Abigail ma naka ci Nabal ma Jakarmeli.

³Man dhanu pare ma gini karacelo kude Daudi kelogi malu, ku ba dhanu ceke ng’atuman ku juode: man gibedo i adhura mi Hebron.

⁴E dhanu mi Yuda gibino, man giwiro Daudi ni ubimo wi ot pa Yuda keca. Man giyero ni Daudi, giwacu kumae, Dhanu mi Yabec-gilead gi ju m’uyiko Saul.

⁵E Daudi oro jukwenda ba dhanu mi Yabec-gilead, man ewacu igi kumae, Mugisa pa Yehova kwanywu, kum wunyutho bero maeni kum rwoth mu, en e ni Saul, man wuyike.

⁶Man kawono Yehova nyuth mer mi bero ku lemandha iwu man an bende abidwoko iwu wang’ bero maeni, kum wutimo gin maeni.

⁷Ka kumeno kawono dong’ cingwu bed tek, man wubed jurukara, kum Saul ma rwoth mu tho, man juot pa Yuda bende giwira ni ubimo i wigi.

⁸Nwang’u Abner ma wod Ner, ma jego mir udul pa Saul, egamu Ic-boceth ma wod Saul, man etere ba Mahanaim;

⁹man ekethe ni ubimo wi Gilead, man wi Juacuri, man wi Yezrel, man wi Efraim, man wi Benyamin, man wi Israel ceke.

¹⁰Ic-boceth, ma wod Saul, rundi pare pier ang’wen kinde m’emaku camu ker wi Israel, man ecamu ker rundi ario. Ento juot pa Yuda gilubo tok Daudi.

¹¹Man nindo ma Daudi bedo ie ni ubimo i Hebron wi juot pa Yuda en e rundi abiro ku dwi abusiel.

¹²Man Abner ma wod Ner, ku jutic pa Ic-boceth ma wod Saul, giai Mahanaim gicidho Gibeon.

¹³Man Yoab ma wod Zeruia, ku jutic pa Daudi, gicidho, man girombo kugi dhu kut mi Gibeon; e gibedo piny, jukurucel i ng’et kut kurucel, jukurucel de i ng’et kut kurucel.

¹⁴Man Abner uwacu ni Yoab kumae, Akwei, wek awobi giai malu gituk i wang’wa. E Yoab uwacu kumae, Wek giai ya.

¹⁵Gilund giai man gikadhu lokaca ni wel ni wel: ma pa Benyamin, man pa Ic-boceth ma wod Saul, apar wi ario, man kind jutic pa Daudi apar wi ario.

¹⁶Man ku ba dhanu ku ba dhanu gimakri ku wigi, ng’atuman udhuyo ng’et wagi ku palamularu pare man de dhuyo ng’et wadi ku palamularu pare; kum kumeno gipodho piny karacelo: kum kumeno julwong’o kakeca Helkath-hazurim, ma eni i Gibeon.

¹⁷E lwiny ubedo tek dit i ceng’ maeca; man jusagu Abner, ku dhanu mir Israel, i wang’ jutic pa Daudi.

¹⁸Man wot Zeruia adek gini keca, Yoab, man Abicai, ku Asahel: man Asahel tiende yot pa tiend ruda m’i thim.

¹⁹Man Asahel ulubo tok Abner; man i ringo pare elokre yor i cinge ma yor acwic kadi ma yor acam de ngo kinde m’elubo Abner.

²⁰Abner ulund uneno yor i ng’eye man ewacu kumae, En e in, Asaheli? Man eloko lembe kumae, En e an.

²¹Man Abner uwacu ire kumae, Lokri yor i ng’eti ma yor acwic kadi ma yor acam, man imak ng’atu acel ma kind awobi, e igam jambali pare iri. Ento Asahel ukwero lokre cen ku kum lubo toke.

²²Man Abner uwacu kendo ni Asahel kumae. Lokri cen ku kum lubo toka: iyenyo agoi i ng’om nedi? e kan abidong’ ting’o wang’a malu nenedi bang’ umeru ma Yoabi?

²³Ento ekwero lokre cen: kum kumeno Abner udhuyo kume ku dindo tong’ pare, ketho nia tong’ utuc yor i ng’eye; man epodho piny keca, etho de i kakeca: man etimbre, nia dhanu ceke m’ubino i ka ma Asahel upodho i ie piny e etho gicungo ling’.

²⁴Ento Yoab kud Abicai gilubo tok Abner: man ceng’ upodho kinde ma giwok bang’ ungulu got mi Ama, m’ubedo i wang’ Gia yo mi langa mi Gibeon.

²⁵Man nyithindho pa Benyamin gicokri gigi karacelo tok Abner, man gidoko udul acel, man gicungo wi ungulu gotne.

²⁶Abner ulund ulwong’o Yoab, man ewacu kumae, Palamularu bithumo nja? ing’eyo ngo nia ma cen ebidoko raci? ebilund bedo rokani, ma fodi ibiwacu ie ni dhanu ya gijik kum lubo tok uturneggi?

²⁷Man Yoab uwacu kumae, Calu Mungu bedo kwo, dok ande k’iyero ngo, nwang’u ande kugweno dhanu gilal andha, kuno di ng’atuman kulubo tok umin ungo.

²⁸Kum kumeno Yoab ukudho agwara; man dhanu ceke gicungo ling’, man giludo tok Israel kendo ngo, kadok akieda de gikiedo kendo ngo.

²⁹Man Abner ku dhanu pare gicidho ku diewor maeca soro kud i Araba; man gikadhu loka Yordan, man gikadhu ku i Bithron ceke, e giwok Mahanaim.

³⁰E Yoab udwogo ku ba lubo tok Abner: e kan ecoko dhanu ceke karacelo, jutic pa Daudi m’urem gi dhanu apar wi abung’wen kud Asahel.

³¹Ento jutic pa Daudi gigoyo kind dhanu pa Benyamin, man kind dhanu pa Abner, ketho nia dhanu dak adek ku pier abusiel githo.

³²Man giting’o Asahel, e giyike i odliel pa won, ma ni i Beth-lehem. Man Yoab ku dhanu pare gicidho ku diewor soro, e piny ulero igi i Hebron.