Read Alur 2 Samwil 20 Bible Online

2 Samwil 20 - Alur bible

2 Samwil 20

¹Man lembe podho nia ng’atu ma rac ni keca, ma nyinge Ceba, ma wod Bikri, ma Jabenyamini: e ekudho agwara, man ewacu kumae, Ka mwa mbe ba Daudi, kadok aba de mbe kudwa ba wod Yese: dhanu ceke kubang’gi kubang’gi ng’atuman udok i hema pare, E Israel.

²Kum kumeno dhanu ceke mir Israel giidho malu ku ba lubo Daudi, man gilubo Ceba ma wod Bikri; ento dhanu pa Yuda gimoko kum ubimo migi, ugambre Yordan cil kum Yerusalem.

³Man Daudi bino i ot pare i Yerusalem; e Daudi gamu mon pare apar m’araga, m’eweko kara ugwok ot, man ekethogi i ka ma jukuro, emio igi cemo de, ento emondo i bang’gi ngo. Kum kumeno juciko bang’gi cil i ceng’ mi tho migi, ma gibedo ko ni mon landu.

⁴Ubimo lund uwacu ni Amasa kumae, Lwong’ dhanu pa Yuda ubin i bang’a ma fodi ceng’ adek kukadhu ngo, man ibed nuti keni.

⁵Kum kumeno Amasa cidho kara elwong’ dhanu mi Yuda karacelo; ento egalu ma sagu nindo m’aketha m’eng’olo ire.

⁶Man Daudi wacu ni Abicai kumae, Kawono Ceba ma wod Bikri bitimowa rac ma sagu Absalom: gam jutic pa rwoth peri, man ilub toke, emaru maku adhura ma tek ire, man emaru both i wang’wa.

⁷Man dhanu pa Yoab gilubo toke, man Jukerethi ku Jupelethi, ku dhanu ma tek ceke; man giai kud i Yerusalem, kara gilub tolf Ceba ma wod Bikri.

⁸Kinde ma gini kum kidi ma dit ma ni i Gibeon, Amasa bino kara eromb kugi. Man Yoab ukendo jambali pare m’eronyo, etwio wie ku del ma palamularu ni i kume i ukorone; man kan ewok woko epodho.

⁹Man Yoab uwacu ni Amasa kumae, Lembe bedo ber i beng’i, umira? Man Yoab umaku Amasa ku tike i cinge ma yor acwic kara ecwi limbe.

¹⁰Ento Amasa ie pido ngo pi palamularu ma ni i cing’ Yoab: kum kumeno edhuye kudo, man eolo cindie i ng’om, man egoye kendo ngo; e etho. Man Yoab kud Abicai m’umin mire gilubo tok Ceba ma wod Bikri.

¹¹Man jalawobi pa Yoab acel ucungo i vute, man ewacu kumae, Ng’atu m’ufoyo Yoab, ku ng’atu ma jaba Daudi, dong’ elub tok Yoab.

¹²Man Amasa vuto m’ebefodre wi rimo pare i die gengi. Man kinde ma ng’atuno neno nia dhanu ceke cungo ling’, eting’o Amasa kud i gengi etere i thim, man ebolo kendi i wie, kinde m’eneno nia dhanu ceke kubang’gi kubang’gi m’ubino i vute gicungo ling’.

¹³Kinde ma jukabe kud i gengi, dhanu ceke gicidho gilubo Yoab, kara gilub tok Ceba ma wod Bikri.

¹⁴Man ekadhu kud i suru mir Israel ceke cil kum Abel, man kum Beth-maka, ku Juberi ceke: e jucokogi karacelo, man gin bende gicidho i toke.

¹⁵Man gibino gitieke kud ali i Abel mi Beth-maka; man gidhuro ng’om kum adhurane, man ecungo kum dhugang’ mi ot ma tek; man dhanu ceke ma gini ku Yoab gibemugo gang’kidi, kara ging’iele.

¹⁶Dhaku ma riek ulund ulwong’o ku i adhura kumae, Winj, winj; akwayuwu, wuwac ni Yoab kumae, Bin ceng’ni keni, kara wawec wakudi.

¹⁷Man ebino ceng’ni i bang’e; man dhakune wacu kumae, In i Yoabi? Man eloko lembe kumae, An a en. Elund ewacu ire kumae, Winj lembe pa bong’ peri. Man eloko lembe kumae, Abewinjo.

¹⁸Elund eyero, ewacu kumae, Yang’ con juwacu, juwacu kumae, Gibipenjo lembapora i Abel andha: man gidaru lembe kumeca.

¹⁹An a kind ju ma gi weg kwiocwiny man mandha i Israel: iyenyo inyoth adhura ku mego i kind Israel: ibimwonyo aba pa Yehova nedi?

²⁰Man Yoab uloko lembe ewacu kumae, Ebed bor, ebed bor ira, ma nia amwony kadi anyoth.

²¹Lembene bedo kumeno ngo: ento ng’atu moko m’i ng’om gudi pa Efraim, en e Ceba ma wod Bikri ku nyinge, eting’o cinge kum ubimo, kum Daudi; mie kende, e abiai kum adhura. E dhakune wacu ni Yoab kumae, Nen, jubibolo wie i beng’i ku wi gang’kidi.

²²E dhakune lund ucidho ba dhanu ceke ku rieko pare. E githumo wi Ceba ma wod Bikri, man gibole woko ba Yoab. E ekudho agwara, man julalugi ku kum adhurane, ku ba dhanu ceke ng’atuman ba hema pare. Man Yoab udok i Yerusalem bang’ ubimo.

²³Nie Yoab ni wi udul mir Israel ceke; man Benaya ma wod Yehoiada ni wi Jukerethi man wi Jupelethi;

²⁴man Adoram ni wi dhanu ceke ma jukethogi kum tic mi olo, man Yehocafat ma wod Ahilud en e jagorlemkei;

²⁵man Ceba en e jagorcik; man Zadok kud Abiathar gi julam;

²⁶man Ira bende ma Jajari en e jatim ma jadit ni Daudi.