Read Alur 2 Samwil 22 Bible Online

2 Samwil 22 - Alur bible

2 Samwil 22

¹Daudi yero lembe mi wer maeni ni Yehova i ceng’ ma Yehova bodhe kud i cing’ judegi pare ceke, man kud i cing’ Saul:

²man ewacu kumae, Yehova en e cana para, man ot ma tek para, man jabodhna, ma para;

³Mungu, ma cana para, abipondo i ie; Ban para, man tung mi both para, ot ma wiu para, man kapondo para; Jabodhna, ibodha ni rop.

⁴Abilwong’o Yehova, m’eromo ya jupake: Kum kumeno abiboth ni judegina.

⁵Kum mukura mi tho tieka; Man pi ma eoro ng’om mi bedo m’ayi Mungu mbe i kume nyayu lworo i ia:

⁶Thol mi liel utieka; Uwic mi tho wok i wia.

⁷I lem ma tek para alwong’o Yehova; Eyo, alwong’o Mungu para: Man ewinjo dwanda ku i hekalu pare, Man ywak para bino i ithe.

⁸Ng’om ulund uyengre man emiel, The polo yengre Man juyenge, kum kwinyo nege.

⁹Yiro thwogre kud i ume, Man mac ucamu kud i dhoge: Cukmac uopo kude.

¹⁰Egungo polo bende, man eloro piny; Man mudho ma bii ni the tiende.

¹¹Man ewotho ku wi kerubi, man elwadhu ku bombe; Eyo, junene wi bomb yamu.

¹²Man etimo mudho ni hema m’utieke, Cokri mi pi, afuru ma dit m’i polo.

¹³I der m’i wang’e Cukmac uopo.

¹⁴Yehova timo morpolo kud i polo, Man Ng’atu ma Malu Ngbir uwodho dwande.

¹⁵Man eoro athero, e ekethogi; Lukoth, man esendogi.

¹⁶E kakadhu mi nam ulund uwok, The ng’om uwodhre ngbeng’, Ku juk pa Yehova, Ku y uyo lietho m’i o diurne.

¹⁷Eoro kwenda ku malu, egama ko; Ewodha woko kud i pi dupa;

¹⁸Ebodha ni jadegina ma tek, Ni ju m’udaga; kum gi tek ma saga.

¹⁹Gicori i wia i ceng’ mi ruvwa para; Ento Yehova en e jeng’ para.

²⁰Ewodha woko bende i ka ma lac; Ebodha, kum anyong’a nege i kuma.

²¹Yehova mio ira sukulia calku bedopwe para; Calku leng’ mi cinga eculo ira.

²²Kum agwoko yo pa Yehova, Man adubo ngo ku weko Mungu para.

²³Kum lembapoka pare ceke ni i wang’a; Man akoira ngo ku cik pare.

²⁴Abedo ndhu cu yor i bang’e bende; Man agwokra gira ni kier para.

²⁵Ka kumeno Yehova culo ira calku bedopwe para, Calku leng’ para i wang’e.

²⁶Ni weg kisa ibinyuthri giri won Irisa; Ni ng’atu ma ndhu cu ibinyuthri ndhu cu;

²⁷Ni ju ma leng’ ibinyuthri giri leng’; Man ni juco ibinyuthri giri ku co.

²⁸Man ibibodho dhanu ma jusendogi; Ento weng’i ni wi ju m’utingri, kara ijwiggi.

²⁹Kum in i thala para, E Yehova; E Yehova bilero mudho para.

³⁰Kum ni kumi aringo ku i udul; Ni kum Mungu para apiei ku wi gang’kidi.

³¹En e Mungu, yo pare ndhu cu: Lembe pa Yehova jumulo i ie; En e ban ni dhanu ceke m’upondo i ie.

³²Kum Mungu en e ng’a, ma ku Yehova ngo? Man ng’a ma cana, ma ku Mungu mwa ngo?

³³Mungu en e ot ma tek para ma tek; Man etelo wi ju ma ndhu cu i yo pare.

³⁴Edwoko tienda va tiend ruda, Man eketha i kakara ma malu.

³⁵Eponjo cinga kud ali, Ketho nia bota gomo atum mi mola.

³⁶Imio ira ban mi both peri bende: Man mol peri yunga.

³⁷Ikoko dakutienda i thera; Man tienda kier ungo.

³⁸Alubo tok judegina, man anyothogi; Kadok aloka de alokra kendo ngo maram githum ko.

³⁹Man anyothogi, e agoyogi foo, ketho gicopo ai ungo: Eyo, gipodho the tienda.

⁴⁰Kum itwio ira tego mi lwiny; Ijwigo ira ju m’uai i kuma.

⁴¹Iketho judegina bende gilok ng’eigi ira, Kara akab ju m’udaga woko.

⁴²Gineno, ento ng’atu moko mbe m’ubodhgi; Cil ba Yehova, ento eloko lembe igi ngo.

⁴³Alund aodogi nyung’u nyung’u calu utur m’i ng’om, Man anyonogi calu ulobo m’i gengi, man amoyogi mba mba.

⁴⁴Ibodha bende ni piem mi dhanu para; Igwoka kara abed wi thek; Dhanu ma fodi ang’eyo ngo bitimo ira.

⁴⁵Juwirok gibimondo gigi ira: Ka pira winjre igi, gibiwora.

⁴⁶Juwirok birwinyo woko, Man gibiwok ku i kapondo migi ma kumgi miel.

⁴⁷Yehova bedo kwo; man mugisa bed wi cana para; Man Mungu bed dwong’, ma cana mi both para.

⁴⁸En e Mungu m’uculo kwoja, Man m’ujwigo kodhidhanu i tienda,

⁴⁹Man m’uwodha woko ku ba judegina: Eyo, iting’a malu wi ju m’ujai ira; Ibodha ni ng’atu ma jarop.

⁵⁰Ka kumeno abimio foc iri, E Yehova, i kind thek, Man abiwero pak ni nyingi.

⁵¹Emio both ma dit ni ubimo pare Man enyutho mer mi bero ni ng’atu m’ewiro pare, Ni Daudi man ni kodhi pare, mi nja.