Read Alur 2 Samwil 3 Bible Online

2 Samwil 3 - Alur bible

2 Samwil 3

¹Nie ali nyang’ i kind ot pa Saul ku ot pa Daudi: e Daudi cikudoko tek m’usagu, ento ot pa Saul ucikudoko ng’ic m’usagu.

²Man junyolo nyithindho ma co ni Daudi i Hebron: man kayu pare en e Amnon, ma kor Ahinoam ma Nyayezreli;

³man pare mir arionde Kileab, ma kor Abigail ma naka dhaku pa Nabal ma Jakarmeli; man mir adege, Absalom ma wod Maka ma nya Talmai m’ubimo mi Gecur;

⁴man mir ang’wende, Adonija ma wod Hagith; man mir abije, Cefatia ma wod Abital;

⁵man mir abusiende, Ithream, ma kor Egla, ma dhaku pa Daudi. Junyolo maeni ni Daudi i Hebron.

⁶Man etimbre, kinde m’ali ni kind ot pa Saul ku ot pa Daudi, nia Abner udwokre gire tek i ot pa Saul.

⁷Nwang’u dhaku pa Saul m’araga nuti ma nyinge Rizpa, ma nyar Aia, man Ic-boceth uwacu ni Abner kumae, Pirang’o imondo wi dhaku pa vwa m’araga?

⁸E kwinyo ma dit ulund unego Abner kum lembe pa Ic-boceth, man ewacu kumae, An a wi gwoki ma piny pa Yuda? Tinuni anyutho bero kum ot pa Saul ma wuru, kum utumin mire, man kum jurimbe, man amii ngo i cing’ Daudi; ento iting’o lembe i kuma i ceng’ maeni pi dhaku maeni.

⁹Mungu tim kumeni kum Abner, man mange bende, tek, calu Yehova kwong’o ni Daudi, tek atimo cil kumeca ngo i bang’e;

¹⁰ya alok ker kud i ot pa Saul, man ating’ komker pa Daudi wi Israel man wi Yuda, ugambre Dan cil kum Ber-ceba.

¹¹Man ecopo loko lembe ngo kendo bang’ Abner, kum lworo nege i kume.

¹²Man Abner uoro jukwenda ba Daudi pire, ewacu kumae, Ng’om en e pa ng’a? ewacu kumae bende, Watim lembariba wakudi, man, nen, cinga bibedo karacelo kudi, kara ukel Israel ceke i beng’i.

¹³Man ewacu kumae, Ber; wabitimo lembariba wakudi; ento gin acel alwong’o i beng’i: en e maeni, ibineno wang’a ngo, tek k’ilar ikelo Mikal ma nya Saul ungo, kan ibino neno wang’a.

¹⁴Man Daudi oro jukwenda ba Ic-boceth, ma wod Saul, ewacu kumae, Mi ira dhaku para Mikal, m’anyomo ira ku dendkum m’i kendi mi Jufilisti dak acel.

¹⁵Man Ic-boceth uoro, man egame ku ba cware, en e ba Paltiel ma wod Laie.

¹⁶E cware gicidho gikude, m’ewotho ku ywak, man elubo toke cil ba Bahurim. Abner ulund uwacu ire kumae, Cidhi, doki: e edok.

¹⁷Man Abner giweco ku judongo mir Israel, giwacu kumae, I nindo m’ukadhu wuyenyo Daudi ubed ubimo i wiwu:

¹⁸e dong’ wutime; kum Yehova yero pi Daudi, ewacu kumae, Ku cing’ Daudi ma jatic para, abibodho dhanu para ma Israel kud i cing’ Jufilisti, man kud i cing’ judegi migi ceke.

¹⁹Man Abner uyero i ith Benyamin bende: e Abner ucidho kara eyer i ith Daudi bende i Hebron gin ceke m’ubedo ber i wang’ Israel, man ni ot ceke pa Benyamin.

²⁰Kum kumeno Abner ubino ba Daudi i Hebron, giku dhanu pier ario. Man Daudi timo agba ni Abner ku dhanu ma gini karacelo kude.

²¹Man Abner uwacu ni Daudi kumae, Abiai abicidho, man abicoko Israel ceke ba rwoth para m’ubimo, kara wutim lembariba wukugi, man kara ibim wi dhanu ceke ma ng’eyongec peri yenyo. Man Daudi ciko Abner; e ecidho ma cwinye kwio.

²²Man, nen, jutic pa Daudi ku pa Yoab ma giai i kind udul, e gibino kud ayeki ma dit: ento A’oner ni karacelo ku Daudi ngo i Hebron: kum ecike, man ecidho ma cwinye kwio.

²³E kinde ma Yoab kud udul ceke ma gini kude giwok, e giyero ni Yoab, giwacu kumae, Abner ma wod Ner ubino bang’ ubimo, e ecike, man ecidho ma cwinye kwio.

²⁴Yoab ulund ubino bang’ ubimo, man ewacu kumae, Itimo ang’o? nen, Abner ubino i beng’i; nedi icike, man ecidho?

²⁵Ing’eyo Abner ma wod Ner, nia ebino kara ebombi, man kara eng’ei wok woko peri ku mondo peri, man kara eng’ei gin ceke m’itimo.

²⁶Man ka Yoab uai ku ba Daudi, eoro jukwenda tok Abner, man gijige ku ba pi m’atong’a mi Sira: ento Daudi ng’eyo ngo.

²⁷E kinde ma Abner udwogo Hebron, Yoab ucoro kude cen i kind dhugang’ kara giwec kude ling’ ling’, e egoye keca i kume, ketho etho, pi rimb Asahel m’umin mire.

²⁸Man yo ku ng’eye, ka Daudi winjo pire, ewacu kumae, Waku ker para lembe mbe i wiwa i wang’ Yehova pi rimb Abner ma wod Ner:

²⁹wek epodh wi Yoab, man wi ot pa won ceke; man ng’atu moko kud ubed umbe i ot pa Yoab ma won tho ma kasinono, kadi ma won joi, kadi ma komo kud uluth, kadi ma podho ku palamularu, kadi ma can cam unege.

³⁰Kum kumeno Yoab kud Abicai m’umin mire ginego Abner, kum enego umeggi ma Asahel i Gibeon i lwiny.

³¹Man Daudi wacu ni Yoab, ku dhanu ceke ma gini kude kumae, Wuyec kendi mu, man wutwi gonia, wuywak de i wang’ Abner. E ubimo ma Daudi lubo tok kika mir avu.

³²Man giyiko Abner i Hebron: e ubimo ting’o dwande malu, man eywak wi liend Abner; e dhanu ceke giywak.

³³E can unego ubimo kum Abner, man ewacu kumae, Maku Abner utho calu jakasegu tho?

³⁴Cinge bedo atwia ngo, kadi tiende de juroyo ngo i kol: Calu ng’atu moko podho i wang’ nyithindho mi kier, ipodho kumeca. E dhanu ceke giywage kendo.

³⁵Man dhanu ceke gibino kara giketh Daudi ucam cemo kinde ma fodi ceng’ nuti; ento Daudi kwong’o, ewacu kumae, Mungu tim kumeno i kuma, mange bende, tek abilo kwen, kadi gin mange, ma fodi ceng’ kupodho ngo.

³⁶E dhanu ceke gineno maeni, e emaku igi; kum gin ma tek ubimo timo e emaku i dhanu ceke.

³⁷Kum kumeno dhanu ceke kud Israel ceke ging’eyo i ceng’ maeca nia eai bang’ ubimo ngo ya juneg Abner ma wod Ner.

³⁸Man ubimo wacu ni jutic pare kumae, Wung’eyo ngo nia jaditmawijo man ng’atu ma dwong’ upodho i ceng’ maeni i Israeli?

³⁹Man abedo ng’ic i ceng’ maeni, kadok juwira ni ubimo; e dhanu maeni ma gi wot Zeruia gi tek ira m’usagu: Yehova cul kum jatic rac calku dubo pare.