Read Alur 2 Samwil 5 Bible Online

2 Samwil 5 - Alur bible

2 Samwil 5

¹Suru ceke mir Israel gilund gibino ba Daudi i Hebron, man giyero, giwacu kumae, Nen, wan wa cogo peri ku ring’kumi.

²I nindo ma con, kinde ma Saul en e ubimo i wiwa, en e in m’utelo wi Israel woko ku dwogo de: e Yehova wacu iri kumae, Ibibedo jakwac ni dhanu para Israel, man ibibedo jatelwic wi Israel.

³Kum kumeno judongo mir Israel ceke gibino bang’ ubimo i Hebron; e ubimo ma Daudi timo lembariba kugi i wang’ Yehova i Hebron: man giwiro Daudi ni ubimo wi Israel.

⁴Daudi rundi pare pier adek kan emaku camu ker, man ecamu ker rundi pier ang’wen.

⁵Ecamu ker wi Yuda rundi abiro ku dwi abusiel; man ecamu ker i Yerusalem rundi pier adek wi adek wi Israel ceke ku Yuda.

⁶Man ubimo ku dhanu pare gicidho i Yerusalem kum Juyebusi, ma ju m’ubedo i ng’ombe, m’uweco ba Daudi m’uwacu kumae, Tek ikabu abinga ku weg abala de ngo, ibimondo keni ngo; ma igi pido kumae, Daudi copo mondo keni ngo.

⁷Ento Daudi maku ka ma tek ma Sayuni; ma en e adhura pa Daudi.

⁸Man Daudi wacu i ceng’ maeca kumae, Ng’atu ma tek ugoyo Juyebusi, wek eidh malu i ka malu i ka mi pi ma ni i ie, man egoi weg abala kud abinga, m’udagu ng’eyong’ec pa Daudi. Kum kumeno giwacu kumae, Abinga ku weg abala bimondo i ot ungo.

⁹Man Daudi bedo i ka ma tek, man elwong’e adhura pa Daudi. Man Daudi gomo i ng’ete gbur ugambre i Milo ku yor i ie de.

¹⁰Man Daudi cikudoko dit m’usagu; kum Yehova, Mungu mir udul, ni karacelo kude.

¹¹Man Hiram m’ubimo mi Turo oro jukwenda ba Daudi, ku yen musonge, man jubodho mi bau, ku jubodho mir ulobo; e gigomo ot ni Daudi.

¹²Man Daudi ng’eyo nia Yehova kethe ni ubimo wi Israel, man nia edodo ker pare ni kum dhanu pare ma Israel.

¹³E Daudi gamu ire mon m’araga ku mon m’anyoma de kud i Yerusalem, yu ng’ei m’eai i Hebron: fodi jubenyolo nyithindho ma co ku ma nyir de asu ni Daudi.

¹⁴Man maeni gi nying’ ju ma junyolo ire i Yerusalem: Camua, man Cobab, ku Nathan, man Suleman,

¹⁵man Ibhar, man Elicua, man Nefeg, ku Yafia,

¹⁶man Elicama, ku Eliada, man Elifelet.

¹⁷Man ka Jufilisti giwinjo nia juwiro Daudi ni ubimo wi Israel, Jufilisti ceke giidho malu kara giyeny Daudi; e Daudi winjo pire, man eloro piny i ka ma tek.

¹⁸Nwang’u Jufilisti gibino man gimoiri gigi i poga mi Refaim.

¹⁹Man Daudi penjo ba Yehova, ewacu kumae, Abiidho malu kum Jufilisti? ibimiogi i cinga? E Yehova wacu ni Daudi kumae, Idh malu; kum abimio Jufilisti i cingi andha.

²⁰Man Daudi bino ba Bal-perazim, e Daudi goyogi keca; man ewacu kumae, Yehova turo judegina i wang’a, calu pi ma muk. Kum kumeno elwong’o nying’ kakeca Bal-perazim.

²¹Man giweko mungu m’acwia migi keca; e Daudi ku dhanu pare gikabugi woko.

²²E Jufilisti giidho malu kendo asu, man gimoiri gigi i poga mi Refaim.

²³Man ka Daudi penjo ba Yehova, ewacu kumae, Ibiidho malu ngo: lokri yor i ng’eigi, man ibin i wigi ku yo kum yen m’udinyo.

²⁴Man ebibedo, kinde m’iwinjo ba woth wi yen m’udinyo, ibilund yikri; kum i kinde maeca nwang’u Yehova wok woko i weng’i kara egoi udul mi Jufilisti.

²⁵E Daudi timo kumeca, calu Yehova ng’olo ire, man egoyo Jufilisti ugambre Geba cil m’ibino ko kum Gezer.