Read Alur 2 Samwil 6 Bible Online

2 Samwil 6 - Alur bible

2 Samwil 6

¹Man Daudi coko dhanu ceke ma jugoyo wigi mir Israel kendo karacelo, rubanga pier adek.

²Man Daudi ai, man gicidho giku dhanu ceke ma gini kude, kud i Bale-yuda, kara giter sanduk pa Mungu malu kukeca ma julwong’e ku Nying’, en e nying’ Yehova mir udul m’ubedo wi kerubi.

³E giketho sanduk pa Mungu wi magali ma nyen, man giwodhe woko kud i ot pa Abinadab ma ni i Gibea: man Uza kud Ahio, ma wot Abinadab, gileko tok magali ma nyen.

⁴Man giwodhe woko kud i ot pa Abinadab, ma ni i Gibea, ku sanduk pa Mungu: man Ahio telo yo i wang’ sandukne.

⁵E Daudi ku ot mir Israel ceke gituko i wang’ Yehova ku kwond jamb wer ceke ma jutimo ku yen Sipre, man ku nanga, man kud adungu, man kud umbukulumbu, man ku ngara, man ku sasi.

⁶Man ka gitundo ba lelacam pa Nacon, Uza rieyo cinge kum sanduk pa Mungu, man emake; kum koni dhiang’ gikier.

⁷E ng’ecwiny pa Yehova opo kum Uza; man Mungu goye keca kum kier pare; e etho keca kum sanduk pa Mungu.

⁸E eton i Daudi, kum Yehova goyo Uza; man elwong’o kakeca Perez-uza, cil i ceng’ ma tin.

⁹E lworo nego Daudi kum Yehova i ceng’ maeca; man ewacu kumae, Sanduk pa Yehova bitundo i bang’a nenedi?

¹⁰Kum kumeno Daudi copo daku sanduk pa Yehova i bang’e ngo i adhura pa Daudi; ento Daudi tere cen ba ot pa Obed-edom ma Jagiti.

¹¹E sanduk pa Yehova dong’ i ot pa Obed-edom ma Jagiti dwi adek: man Yehova mio mugisa ni Obed-edom, ku ot pare ceke.

¹²Man juyero maeni ni ubimo ma Daudi, juwacu kumae, Yehova mio mugisa wi ot pa Obed-edom, ku gin ceke ma pare, ni kum sanduk pa Mungu. Man Daudi cidho man egamu sanduk pa Mungune kud i ot pa Obed-edom etere i adhura pa Daudi ku mutoro.

¹³Man ebedo kumeno, nia, kinde ma ju m’uyeyo sanduk pa Yehova gidaku tiendgi wang’ abusiel, elamu koni dhiang’ ku ma ful ful.

¹⁴E Daudi miel i wang’ Yehova ku tegone ceke; man Daudi kendo ugoke mi bongu ma nwang’.

¹⁵Kum kumeno Daudi ku ot mir Israel ceke gikelo sanduk pa Yehova malu ku muzira, man ku bang’ agwara.

¹⁶Man ebedo kumeno, kinde ma sanduk pa Yehova tundo i adhura pa Daudi, nia Mikal ma nya Saul uneno yo woko ku wang’ot, man eneno ubimo ma Daudi bepor malu man ebemiel i wang’ Yehova: e ecaye ku yor i adundene.

¹⁷Man gikelo sanduk pa Yehova, e gikethe kakare, i die hema ma Daudi guro ire; man Daudi thiero lam m’awang’a ku lam mi kwiocwiny i wang’ Yehova.

¹⁸Man kinde ma Daudi daru thiero lam m’awang’a ku lam mi kwiocwiny, emio mugisa ni dhanu i nying’ Yehova mir udul.

¹⁹Man epoko kwen m’ang’ina, ku ring’o moko, ku kwend nyingulok m’uthwo, i kind dhanu ceke kubang’gi kubang’gi, i kind udul ceke mir Israel. Kum kumeno dhanu ceke giai ng’atuman ba ot pare man ba ot pare.

²⁰Daudi lund udwogo kara emi mugisa ni juode. Man Mikal ma nya Saul uwok woko kara eromb ku Daudi, man ewacu kumae, Ane ka ba dwong’ mir ubimo mir Israel tin, m’uwanjre tin i wang’ bong’ mi jutic pare calu ng’atu moko ma kind dhanu ma s ai wanjre ma lewic umbe!

²¹Man Daudi wacu ni Mikal kumae, En e i wang’ Yehova, m’ugoyo wia ma sagu wuru, man ma sagu ot pare ceke, kara eketha ni jaditmawijo wi dhanu pa Yehova, wi Israel: ka kumeno abituko i wang’ Yehova.

²²Man abibedo tuu ma sagu maeni, man abibedo fraa i wang’a gira: ento bong’ m’iyero pigi, abinwang’u yung i bang’gi.

²³Man Mikal ma nya Saul nyathin umbe kude maram etho kudo.