Read Alur 2 Samwil 7 Bible Online

2 Samwil 7 - Alur bible

2 Samwil 7

¹Man etimbre, kinde m’ubimo bedo i ot pare, man Yehova mio ire yom ni judegi pare ceke m’i ng’ete gbur,

²nia ubimo wacu ni Nathan ma jabila kumae, Nen kawono, abedo i ot mi yen musonge, ento sanduk pa Mungu bedo i kusika mi bongu.

³Man Nathan uwacu ni ubimo kumae, Cidhi, tim gin ceke ma ni i adundeni; kum Yehova ni kudi.

⁴Man etimbre diewor nica nia lembe pa Yehova bino ba Nathan, m’uwacu kumae,

⁵Cidh man iyer ni jatic para ma Daudi kumae, Yehova wacu kumae, Ibigomo ira ot m’abed i ie?

⁶kum fodi abedo ngo i ot ugambre i ceng’ m’awodho ie nyithindho mir Israel woko kud i Misiri, cil i ceng’ maeni, ento awotho i hema man i kabedo.

⁷Man i ka ceke m’awotho ie ku nyithindho mir Israel ceke, ayero lembe moko ku suru mir Israel moko, m’ang’olo ya ubed jakwac mi dhanu para Israel, awacu kumae, Nedi wugomo ira ot mi yen musonge ngo?

⁸Ka kumeno kawono ibiwacu ni Daudi ma jatic para kumae, Yehova mir udul uwacu kumae, Agemi kud i kwac mi rombe, ku lubo rombe, kara idok jatelwic wi dhanu para, wi Israel;

⁹man wabedo karacelo kudi i ka ceke m’icidho i ie, man akabu judegini ceke kud i weng’i; man abidwoki ni nying’ ma dit, calu nying’ ju ma dwong’ ma gini i ng’om.

¹⁰Man abiketho kaka ni dhanu para Israel man abipidhogi, kara gibed i kakagi ma dhe, man gibidak kendo ngo; kadok nyithindho ma juco de gibisendo gi kendo ngo, calu ma kwong’a,

¹¹man calu ugambre i ceng’ m’ang’olo ya jupoklembe bed wi dhanu para Israel; man abiketho iyom ni judegi peri ceke. Mange ke Yehova yero iri nia Yehova bitimo iri ot.

¹²Kinde ma ceng’ peri timbre kakare, man ibinindo ku kwara, abiting’o kodhi peri yo ng’ei, ma biai kud i ii, man abiketho ker pare ucungi.

¹³Ebigomo ot pi nyinga, man abiketho komker mi ker pare ucung mi nja.

¹⁴Abibedo won, man ebibedo woda: tek ekier, abigoye kud ukede mi dhanu, man ku goc mi nyithindho mi dhanu;

¹⁵ento kisa para biai kud i bang’e ngo, calu akabe ku ba Saul, m’acore cen i weng’i.

¹⁶Man ot peri ku ker peri jubidwoke tek mi nja i weng’i: komker peri jubiketho cungo mi nja.

¹⁷Calku lembe maeni ceke, man calku ginmawokiwang’ maeni ceke, e Nathan uyero kumeni ni Daudi.

¹⁸Daudi m’ubimo ulund umondo, man ebedo i wang’ Yehova; man ewacu kumae, An a ng’a, E Rwoth Yehova, man ot para en e ang’o, ma nia ikela cil keni?

¹⁹Man maeni fodi en e gin ma nok i weng’i, E Rwoth Yehova; ento iyero bende pi ot pa jatic peri pi nindo ma dit ma bibino; man maeni en e calku kura dhanu, E Rwoth Yehova!

²⁰Man Daudi copo wacu ang’o kendo i beng’i? kum ing’eyo jatic peri, E Rwoth Yehova.

²¹Ni kum lembe peri, man calkud adundeni ma dhe, itimo dwong’ maeni ceke, kara iketh jatic peri ung’eye.

²²Kum kumeno in i dwong’, E Yehova Mungu: kum moko mbe ma calu in, kadok mungu mange de mbe ndhu in kendi, calku gin ceke ma wawinjo ku ithwa.

²³Man thek m’i ng’om ma kani ma calku dhanu peri, ma calu Israel, ma Mungu cidho kara ewar ire gire ni dhanu, man kara etim ire nyinge, man kara etim gin ma dwong’ iwu, man gin ma ng’oyo ndiri ni ng’om peri, i wang’ dhanu peri, m’iwaru iri kud i Misiri, ku ba thek ku mungu migi?

²⁴Man iketho dhanu peri Israel ginyang’ iri kara gibed ni dhanu iri mi nja; man in, Yehova, idoko Mungu migi.

²⁵Man kawono, E Yehova Mungu, lembe m’iyero pi jatic peri, man pi ot pare, keth ecung mi nja, man itim calu iyero.

²⁶Man dong’ judwok nyingi dwong’ mi nja, juwae kumae, Yehova mir udul en e Mungu mir Israel; man ot pa Daudi ma jatic peri jubiketho ecungo i weng’i.

²⁷Kum in, E Yehova mir udul, Mungu mir Israel, inyutho ni jatic peri, iwacu kumae, Abigomo iri ot: ka kumeno jatic peri nwang’u i adundene nia erwo ku rwo maeni i beng’i.

²⁸Man kawono, E Rwoth Yehova, in i Mungu, man lembe peri en e andha, man ing’olo gin maeni ma ber ni jatic peri:

²⁹ka kumeno kawono wek enyai mutoro ii nia imi mugisa wi ot pa jatic peri, kara ebed mi nja i weng’i; kum in, E Rwoth Yehova, iyero maeni: man ku mugisa peri wek ot pa jatic peri unwang’ mugisa mi nja.