Read Alur 2 Samwil 8 Bible Online

2 Samwil 8 - Alur bible

2 Samwil 8

¹Man yo ng’ei maeni etimbre, nia Daudi goyo Jufilisti, man evoyogi: man Daudi gamu ratwiny mi dhu kana mi min adhura kud i cing’ Jufilisti.

²Man egoyo Moab, man eporogi ku thol, m’eketho givuto piny i ng’om; man eporo wang’e ario kara eneggi, man wang’e acel bo juwek ubed kwo. Man Jumoabi gidoko jutic ni Daudi, e gikelo ajok.

³Daudi goyo Hadadezer bende ma wod Rehob, m’ubimo mi Zoba, kan ecigamu ker pare kendo i Kulo.

⁴E Daudi yaku i bang’e weg riuni rubanga acel ku dak abiro, man dhanu rubanga pier ario ma ku tielo: man Daudi tong’o ler riuni ceke ni magali, ento ecero kindgi mi magali dak acel.

⁵Man kinde ma Jucami mi Dameski gibino kara gibodh Hadadezer m’ubimo mi Zoba, Daudi goyo Jucami dhanu rubanga pier ario wi ario.

⁶Daudi lund uketho ot ma tek mir ali i Cami mi Dameski; man Jucami gidoko jutic pa Daudi, e gikelo ajok. Man Yehova mio aloci ni Daudi i ka ceke ma tek ecidho i ie.

⁷Man Daudi ting’o ban mi mola ma kwar ma ni kum jutic pa Hadadezer, man ekelogi i Yerusalem.

⁸Man Daudi m’ubimo yaku mola ma dit apila kud i Beta, man kud i Berothai, ma gin adhura pa Hadadezer.

⁹Man kinde ma Toi m’ubimo mi Hamath uwinjo nia Daudi goyo udul ceke pa Hadadezer,

¹⁰Toi ulund uoro Yoram ma wode bang’ ubimo ma Daudi, kara emothe, man kara emi ire mugisa, kum ekiedo kum Hadadezer, man egoye: kum Hadadezer ubedo kud ali kum Toi. Man Yoram ubino kud agulu mi mola ma tar, man agulu mi mola ma kwar, kud agulu mi mola:

¹¹ubimo ma Daudi thiero maeni bende ni Yehova, karacelo ku mola ma tar ku mola ma kwar m’ethiero mi thek ceke m’eloyo;

¹²mi Cami, man mi Moab, man mi nyithindho pa Amon, mi Jufilisti, man pa Amalek, man mir ayeki pa Hadadezer, ma wod Rehob, m’ubimo mi Doba.

¹³Man Daudi gamu ire nying’ kinde in’edwogo kugoyo Jucami i Poga mi Kadu, en e dhanu rubanga apar wi abora.

¹⁴Man eketho ot ma tek mir ali i Edom; i Edom ceke mba mba eketho ot ma tek mir ali, man Juedomi ceke gidoko jutic pa Daudi. Man Yehova mio aloci ni Daudi i ka ceke ma tek ecidho i ie.

¹⁵Man Daudi camu ker wi Israel ceke; man Daudi poko lembe cu man pwe ba dhanu pare ceke.

¹⁶Man Yoab ma wod Zeruia ebedo wi udul; man Yehocafat ma wod Ahilud en e jagorlemkei;

¹⁷man Zadok ma wod Ahitub, kud Ahimelek ma wod Abiathar, gi julam; man Seraya en e jagorcik;

¹⁸man Benaya ma wod Yehoiada en e wi Jukerethi man Jupelethi: man wot Daudi gi jutim ma judongo.