Read Alur 2 Samwil 9 Bible Online

2 Samwil 9 - Alur bible

2 Samwil 9

¹Man Daudi wacu kumae, Fodi jumoko m’i ot pa Saul nuti, kara anyuth ire bero ni kum Yonathani?

²Man jatic nuti m’i ot pa Saul ma nyinge Ziba, e gilwong’e ba Daudi; man ubimo wacu ire kumae, In i Ziba? Man ewacu kumae, Jatic peri en e en.

³Man ubimo wacu kumae, Jumoko mbe m’i ot pa Saul ma fodi nuti, kara anyuth bero pa Mungu ire? E Ziba wacu ni ubimo kumae, Fodi wod Yonathan nuti, ma en e jarabala m’i tielo.

⁴Man ubimo wacu ire kumae, Eni kani? E Ziba wacu ni ubimo kumae, Nen, eni i ot pa Makir ma wod Amiel, i Lo-debar.

⁵Ubimo ma Daudi lund uoro kwenda, man egame kud i ot pa Makir ma wod Amiel, kud i Lo-debar.

⁶Man Mefiboceth, ma wod Yonathan, ma wod Saul, ubino ba Daudi, man epodho arieba wang’e, erwo de. Man Daudi wacu kumae, Mefiboceth. Man eloko lembe kumae, Nen, jatic peri!

⁷E Daudi wacu ire kumae, Lworo kud unegi; kum abinyutho bero iri andha ni kum Yonathan ma wuru, man abidwoko ng’om ceke ma pa Saul i beng’i; man ibicamu kwen dhu mesa para thiri thiri.

⁸Man erwo, ewacu de kumae, Jatic peri en e ang’o, ma nia inen wi wadi avuj gwok ma calu ani?

⁹Ubimo lund ulwong’o Ziba, ma jatic pa Saul, man ewacu ire kumae, Gin ceke ma pa Saul man m’i ot pare ceke amio ni wod jadit peri.

¹⁰Man ibifuro ng’om ire, in, ku woti, man jutic peri; man ibicoko nyinge, kara wod jadit peri bed ku kwen m’ecam: ento Mefiboceth ma wod jadit peri bicamu kwen thiri thiri dhu mesa para. Nwang’u Zibane wote apar wi abic man jutic pier ario.

¹¹Ziba lund uwacu ni ubimo kumae, Calku gin ceke ma rwoth para m’ubimo ng’olo ni jatic pare, jatic peri bitimo kumeca. Ento Mefiboceth, ubimo wacu, ebicamu dhu mesa para, calu ng’atu acel ma kind wot ubimo.

¹²Man Mefibocethne wode ma nok nuti ma nyinge Mika. Man dhanu ceke m’ubedo i ot pa Ziba gi jutic ni Mefiboceth.

¹³Kum kumeno Mefiboceth ubedo i Yerusalem; kum ecamu thiri thiri dhu mesa p’ubimo. Man en e jarabala i tiende ario de.