Read Alur 1 Ubimo 1 Bible Online

1 Ubimo 1 - Alur bible

1 Ubimo 1

¹Nwang’u ubimo ma Daudi ti man rundi pare dupa; man giume ku bongu, ento kume bedo mor ungo.

²Ka kumeno jutic pare giwacu ire kumae, Dong’ juyeny nyaku ma sumba ma fodubethik athika ni rwoth para m’ubimo: man wek ecung i wang’ ubimo man egwoke; man wek evut i kori, kara kum ubimo ma rwoth para ubed mor mor.

³Kum kumeno giyenyo nyaku ma wang’e leng’ kud i kieu mir Israel ceke mba mba, man ginwang’u Abicag ma nya Cunami, e gikele bang’ ubimo.

⁴E nyakune wang’e leng’ dit; man egwoko ubimo etimo ire de; ento ubimo vuto kude ngo.

⁵Adonija ma wod Hagith ulund udodre gire, ewacu kumae, Abibedo ubimo: man eyiko ire magali ku weg riuni, ku dhanu pier abic m’uringo i wang’e.

⁶E won unyayu can i ie ngo nindo moko ku wacu kumae, Itimo kumeni nedi? man en e ng’atu ma cu bende; man junyole yo ng’ei Absalom.

⁷E giporo lembe giku Yoab ma wod Zeruia, man kud Abiathar ma jalam: e gin ma gibelubo ng’ei Adonija gikonye.

⁸Ento Zadok ma jalam, man Benaya ma wod Yehoiada, man Nathan ma jabila, ku Cimei, man Rei, ku dhanu ma tek ma pa Daudi, gini kud Adonija ngo.

⁹Man Adonija nego rombe ku koni dhiang’ ku lim ma ful ful ng’et kidi pa Zoheleth, ma ni i ng’et En-rogel; man elwong’o utumin mire ceke, ma wot ubimo, ku dhanu ceke mi Yuda, ma jutic p’ubimo:

¹⁰ento Nathan ma jabila, man Benaya, ku dhanu ma jurukara, man Suleman m’umin mire, elwong’o ngo.

¹¹Nathan ulund uyero ni Bath-ceba ma min Suleman, ewacu kumae, Iwinjo ngo nia Adonija ma wod Hagith ubecamu keri, man Daudi ma rwoth mwa ng’eyo maeni ngo?

¹²Ka kumeno kawono bin, akwei, wek ami iri lembapora, kara ibodh kwo peri giri, man kwo pa wodi ma Suleman.

¹³Cidh imond bang’ ubimo ma Daudi, man iwac ire kumae, In, rwoth para, E ubimo, ikwong’o ni bong’ peri ngo, iwacu kumae, Andhandha Suleman ma Wodi bicamu ker yo ng’eya, man ebijany wi komker para? ka kumeno Adonija becamu ker nedi?

¹⁴Nen, kinde ma fodi ibeweco kud ubimo, e an bende abibino i toki, man abiketho lembe peri cungo.

¹⁵Man Bath-ceba mondo bang’ ubimo i kusika: e ubimone ti dit; man Abicag ma nya Cunami ubetimo ni ubimo.

¹⁶E Bath-ceba kulo wie, man erwo ni ubimo. E ubimo wacu kumae, Iyenyo ang’o?

¹⁷Man ewacu ire kumae, Rwoth para, ikwong’o ni bong’ peri ku Yehova Mungu peri, iwacu kumae, Andhandha Suleman ma wodi bicamu ker yo ng’eya, man ebijany wi komker para.

¹⁸Man kawono, nen, Adonija becamu ker; man in, rwoth para m’ubimo, ing’eyo ngo:

¹⁹e enego koni dhiang’ ku lim ma ful ful ku rombe dupa, man elwong’o wot ubimo ceke, kud Abiathar ma jalam, ku Yoab ma jego mir udul; ento Suleman ma jatic peri elwong’o ngo.

²⁰Man in, rwoth para m’ubimo, wang’ Israel ceke ni i wii, kara iwac igi nia ng’a ma bijany wi komker pa rwoth para m’ubimo yo ng’eye.

²¹Tek kumeno ngo ebitimbre, kinde ma rwoth para m’ubimo binindo ku kwaru pare, nia an ku woda ma Suleman jubikwanu ni ju m’ukier.

²²Man, nen, kinde ma fodi ebeweco kud ubimo. Nathan ma jabila mondo.

²³Man giyero ni ubimo, giwacu kumae, Nen, Nathan ma jabila. Man kinde m’emondo i wang’ ubimo, eram gire i wang’ ubimo arieba wang’e i ng’om.

²⁴E Nathan uwacu kumae, Rwoth para, E ubimo, iwacu kuipae, Adonija bicamu ker yo ng’eya, man ebijany wi komker para?

²⁵Kum eloro piny tinuni, man enego koni dhiang’ ku lim ma ful ful ku rombe dupa, man elwong’o wot ubimo ceke, ku jego mir udul, man Abiathar ma jalam; man, nen, gibecamu gibemadhu de i wang’e, man giwacu kumae, Ubimo ma Adonija bed kwo hai,

²⁶Ento an, ma an a jatic peri, man Zadok ma jalam, ku Benaya ma wod Yehoiada, man jatic peri ma Suleman, elwong’o ngo.

²⁷Gin maeni timbre ni kum rwoth para m’ubimo, man inyutho ng’atu ma bijany wi komker pa rwoth para m’ubimo yo ng’eye ngo ni jutic peri?

²⁸Ubimo ma Daudi lund uloko lembe, man ewacu kumae, Lwong’ Bath-ceba. E ebino i vut ubimo, man ecungo i wang’ ubimo.

²⁹Man ubimo kwong’o, ewacu de kumae, Calu Yehova bedo kwo, m’uwaru ng’eyong’ec para kud i masendi ceke,

³⁰andha calu akwong’o iri ku Yehova, Mungu mir Israel, awacu kumae, Andhandha Suleman ma wodi bicamu ker yo ng’eya, man ebibedo wi komker para kakara; e abitimo kumeca andha i ceng’ ma tin.

³¹Bath-ceba lund urum arieba wang’e i ng’om, man erwo ni ubimo, ewacu de kumae, Wek rwoth para m’ubimo Daudi bed kwo mi nja.

³²E ubimo ma Daudi wacu kumae, Wulwong’ Zadok ma jalam, man Nathan ma jabila, ku Benaya ma wod Yehoiada, i bang’a. Man gibino i wang’ ubimo.

³³E ubimo wacu igi kumae, Wugam jutic pa rwoth mu kudu, man wuketh Suleman ma woda uwoth wi kana para ma dhe, man wutere piny i Gihon:

³⁴man wek Zadok ma jalam ku Nathan ma jabila giwire keca ni ubimo wi Israel; e wukudh agwara, man wuwac kumae, Ubimo Suleman ubed kwo hai.

³⁵E wubilund idho malu yo ng’eye, man ebibino ebijany de wi komker para; kum ebibedo ubimo kakara; e akethe ni jatelwic wi Israel man wi Yuda.

³⁶Man Benaya ma wod Yehoiada loko lembe ni ubimo, man ewacu kumae, Amen: Yehova, Mungu pa rwoth para m’ubimo, uwac kumeni bende.

³⁷Calu Yehova bedo ku rwoth para m’ubimo, dong’ ebed kumeno ku Suleman, man edwok komker pare dwong’ ma sagu komker pa rwoth para m’ubimo Daudi.

³⁸Kum kumeno Zadok ma jalam, ku Nathan ma jabila, man Benaya ma wod Yehoiada, man Jukerethi ku Jupelethi, giloro piny, man giketho Suleman uwotho ku wi kana p’ubimo ma Daudi, man gitere Gihon.

³⁹Man Zadok ma jalam uting’o tung mi mo kud i Hema, man ewiro Suleman. Man gikudho agwara; e dhanu ceke wacu kumae, Ubimo ma Suleman ubed kwo hai.

⁴⁰E dhanu ceke giidho malu yo ng’eye, man dhanu gikudho usegu, gifoyo de kud anyong’a ma dit, ketho nia ng’om ukak ni ba dwandgi.

⁴¹E Adonija ku welo ceke ma gini kude giwinjo maeni kinde ma gidaru camu. E kinde ma Yoab uwinjo badwand agwara, ewacu kumae, Thelembe mi badwal mir adhura m’ubewoi en e ang’o?

⁴²Kinde ma fodi ebeweco, nen, Yonathan ma wod Abiathar ma jalam ubino: man Adonija wacu kumae, Mondi; kum in i ng’atu ma cu, man ikelo rwonglembe ma ber.

⁴³Man Yonathan uloko lembe man ewacu ni Adonija kumae, Andha rwoth mwa m’ubimo Daudi ketho Suleman ni ubimo:

⁴⁴e ubimo oro Zadok ma jalam kude, ku Nathan ma jabila, man Benaya ma wod Yehoiada, ku Jukerethi man Jupelethi; e giketho ewotho ku wi kana p’ubimo;

⁴⁵e Zadok ma jalam ku Nathan ma jabila giwire ni ubimo i Gihon; e giidho malu kukeca ma anyong’a benegogi, ketho nia adhura woi kendo. Maeni en e woi ma wuwinjo.

⁴⁶E Suleman bende bejany wi komker mi ker.

⁴⁷Man mange ke jutic p’ubimo gibino kara gimi mugisa ni rwoth mwa m’ubimo Daudi, giwacu kumae, Mungu peri keth nying’ Suleman ubed ber ma sagu nyingi, man uketh komker pare dwong’ ma sagu komker peri: e ubimo kulo wie gire ku wi kavuto.

⁴⁸Man ubimo wacu kumae bende, Mugisa bed ni Yehova, Mungu mir Israel, m’emio ng’atu acel ujany wi komker para i ceng’ maeni, ketho wang’a neno lembe maeni.

⁴⁹E welo ceke pa Adonija lworo negogi, man giai malu, gicidho de ku ba dhanu ceke ng’atuman i yo pare.

⁵⁰Man lworo nego Adonija kum Suleman; man eai, ecidho, man emaku tung mi pemblam.

⁵¹Man juyero ni Suleman, juwacu kumae, Nen, lworo nego Adonija kum ubimo ma Suleman; kum, nen, emaku tung mi pemblam, ewacu kumae, Wek ubimo ma Suleman ular ukwong’ ira nia ebinego jatic pare ngo ku palamularu.

⁵²E Suleman uwacu kumae, Tek ebinyuthre gire nia en e ng’atu mandha, yukwie acel de mbe ma bipodho i ng’om; ento tek junwang’u dubo i ie, ebitho.

⁵³Kum kumeno ubimo ma Suleman uoro kwenda, man gikele piny ku ba pemblam. Man ebino erwo de ni ubimo ma Suleman; e Suleman uwacu ire kumae, Cidh i ot peri.