Read Alur 1 Ubimo 10 Bible Online

1 Ubimo 10 - Alur bible

1 Ubimo 10

¹Man kinde m’ubimo ma dhaku mi Ceba winjo rwonglembe pa Suiej man pi nying’ Yehova, ebino kara emule; ku penji ma tek.

²E ebino Yerusalem ku piro ma dit apila, ku ngamia m’uyeyo yath ma jwa jwa, ku mola ma kwar ma; dit apila, ku kidi ma pire tek; e kinde m’ebino ba Suleman, giweco gikude pi gin ceke ma ni i adundene.

³Man Suleman uyero ire pi penji pare ceke: gin moko mbe m’upandre ni ubimo ma k’eyero ire ngo.

⁴Man kinde m’ubimo ma dhaku mi Ceba neno rieko ceke pa Suleman, ku ot m’egomo,

⁵man cemo mi mesa pare, ku bedo mi jutic pare, man kur mi jutim pare, ku kendi migi, man juyei kikombe pare, ku lam m’awang’a pare m’ethiero i ot pa Yehova; tipo moko mbe kendo i ie.

⁶Man ewacu ni ubimo kumae, En e rwonglembe mandha m’awinjo kud i ng’om para ma dhe pi tic peri, man pi rieko peri.

⁷Ento ayio lembene ngo, cil m’abino, man wang’a neno maeni: man, nen, juyero ira ng’ete kucel ungo; rieko peri ku mierolembe peri gisagu rwonglembe m’awinjo.

⁸Dhanu peri gi weg mutoro, jutic peri maeni gi weg mutoro, m’ucungo thiri thiri i weng’i, m’uwinjo rieko peri.

⁹Mugisa bed ni Yehova Mungu peri, m’enwang’u mutoro ii, ketho ekethi wi komker mir Israel: kum Yehova maru Israel mi nja, ka kumeni ekethi ni ubimo, kara itim pokolembe ku bedopwe.

¹⁰Man emio mola ma kwar talanto dak acel ku pier ario ni ubimo, man yath ma jwa jwa dupa dupa, ku kidi ma pire tek: man jukelo wagi yath ma jwa jwa ma kumeno dupa ngo kendo ma calu m’ubimo ma dhaku mi Ceba mio ni ubimo ma Suleman.

¹¹Man udul combo bende pa Hiram, m’ukelo mola ma kwar kud i Ofir, gikelo yendbongu ku kidi ma pire tek dupa kud i Ofir.

¹²Man ubimo timo yendbongu ni mbegi mi ot pa Yehova, man mi ot p’ubimo, adungu bende ku nanga mi juwer: wadi yendbongune mbe m’ubino, kadi ma juneno, cil i ceng’ ma tin.

¹³Man ubimo ma Suleman umio ni ubimo ma dhaku mi Ceba yeny ceke ma ie yenyo, gin ceke ma tek epenjo, umedo maeno ma Suleman umio ire mi jukupiny pare mi ker ma ku laccing’. Kum kumeno elokre man edok i ng’om pare ma dhe, en ku jutic pare.

¹⁴Nie pek mi mola ma kwar ma bino ba Suleman i rundi acel en e talanto mi mola ma kwar dak abusiel ku pier abusiel wi abusiel,

¹⁵umedo maeno ma jukuloka kelo, ku girang’iewa mi weg duka, man mir ubimo ceke mi dhanu ma tung’ tung’, man mi jubim m’i ng’ombe.

¹⁶Man ubimo ma Suleman utimo thungu dak ario ku mola ma kwar m’afoda; cekel mi mola ma kwar dak abusiel ucidho kum thungu acel.

¹⁷Man etimo ban dak adek ku mola ma kwar m’afoda; jampor adek mi mola ma kwar ucidho kum ban acel: man ubimo kethogi i ot mi luli mi Lebanon.

¹⁸Mange ke ubimo timo komker mi lakliec, man emwone ku mola ma kwar ma leng’ hai.

¹⁹Kaidho mi komkerne abusiel, man wi komker ugom ngulungulu i ng’eye; man yen ni kun ku kun ng’et kabedo, kud umvor ario m’ucungo i ng’et yende.

²⁰Man umvor apar wi ario cungo keca wi kaidho abusiel yor i ng’ete acel abusiel ke yor i ng’ete mucelo: jutimo wadi ma kumeno ngo i ker moko.

²¹Man kikombe ceke mi giramadha p’ubimo ma Suleman gi mi mola ma kwar, man agulu ceke mi ot mi luli mi Lebanon gi mi mola ma kwar ma leng’: moko mbe ma mi mola ma tar; jukwane ni gin moko ngo i nindo pa Suleman.

²²Kum ubimo bedo kud udul combo mi Tarcic i nam karacelo kud udul combo pa Hiram: wang’ acel i rundi adek udul combo mi Tarcic ubino, m’ekelo ko mola ma kwar, man mola ma tar, ku lakliec, ku wai, man weli.

²³Kum kumeno ubimo ma Suleman usagu ubimo ceke m’i ng’om ku lonyo man ku rieko.

²⁴Man ng’om ceke giyenyo gibed i vut Suleman, kara giwinj rieko pare, ma Mungu ketho i adundene.

²⁵Man gikelo ajok ku ba dhanu ku ba dhanu ng’atuman ajok pare, agulu mi mola ma tar, man agulu mi mola ma kwar, ku kendi, ku jambali, man yath ma jwa jwa, ku riuni, man kana, m’apoka rundi ku rundi.

²⁶Man Suleman ucoko magali ku weg riuni karacelo: man ebedo ku magali rubanga acel ku dak ang’wen, man weg riuni rubanga apar wi ario, m’ekethogi i adhura mi magali, man kud ubimo i Yerusalem.

²⁷Man ubimo ketho mola ma tar ubedo pami kidi i Yerusalem, man eketho yendmusonge bedo calu yenduduk ma ni i poga, ni ditne.

²⁸Man riuni ma Suleman ubedo ko jukelo kud i Misiri; man jukuloka p’ubimo gamugi ni udul, udul kubang’e kubang’e ku welpiny.

²⁹Man magali acel uidho malu ku yo i Misiri mi cekel mi mola ma tar dak abusiel, man riuni acel mi cekel dak acel ku pier abic; man kumeno ni ubimo ceke mi Juhiti, man ni ubimo mi Cami, giwodhogi woko ku kind piny migi.