Read Alur 1 Ubimo 12 Bible Online

1 Ubimo 12 - Alur bible

1 Ubimo 12

¹Man Rehoboam ucidho Cekem: kum Israel ceke bino i Cekem kara gikethe ni ubimo.

²Man etimbre, kinde ma Yeroboam ma wod Nebat uwinjo pire (kum fodi eni i Misiri, ka m’eringo i ie kud i vut ubimo ma Suleman, e Yeroboam ubedo i Misiri,

³man gioro gilwong’e), nia Yeroboam ku cokri mir Israel ceke, gibino man giyero ni Rehoboam, giwacu kumae,

⁴Wuru dwoko mberembere mwa pek, ka kumeno kawono dwok tic ma tek pa wuru, man mberembere pare ma pek m’eketho i wiwa, udok yot, e wabitimo iri.

⁵Man ewacu igi kumae, Wukowuwek tundu ceng’ adek, e ka wubin kendo i bang’a. E dhanune giai.

⁶Man ubimo ma Rehoboam uporo lembe ku dhanu m’uti, m’ucungo i wang’ Suleman ma won kinde ma fodi ebedo kwo, ewacu kumae, Lembapora ang’o ma wumio ira m’alok ni dhanu maeni?

⁷E giyero ire, giwacu kumae, Tek ibibedo jatic ni dhanu maeni i ceng’ maeni, man ibitimo igi, ibiloko lembe de igi, man ibiyero lembe ma ber igi, gibilund bedo jutic peri mi nja.

⁸Ento eweko lembapora mi dhanu m’uti ma gimio ire, man giporo lembe gikud awobi m’udongo kude, m’ucungo i wang’e.

⁹Man ewacu igi kumae, Wumio lembapora ang’o, kara wadwok lembe ni dhanu maeni m’uyero ira, m’uwacu kumae, Dwok mberembere ma wuru ketho i wiwa yoti?

¹⁰E awobi ma gidongo kugi giyero ire, giwacu kumae, Ibiwacu kumeni ni dhanu maeni m’uyero iri, m’uwacu kumae, Wuru dwoko mberembere mwa tek, ento dwoke yot iwa; ibiwacu igi kumae, Lweta ma cogo e dit ma sagu pier vwa.

¹¹Man kawono tek vwa ketho mberembere ma pek i wiwu, abimedo wi mberembere mu: vwa ponjowu ku del, ento abiponjowu ku ith.

¹²Kum kumeno Yeroboam ku dhanu ceke gibino ba Rehoboam i ceng’ mir adege, calu ubimo ng’olo, m’ewacu kumae, Wubin i bang’a kendo i ceng’ mir adege.

¹³E ubimo loko lembe ni dhanu ku gai, man eweko lembapora mi dhanu m’uti ma gimio ire,

¹⁴man eyero igi calku lembapora mir awobi, ewacu kumae, Vwa dwoko mberembere mu pek, ento abimedo wi mberembere mii: vwa ponjowu ku del, ento abiponjowu ku ith.

¹⁵Kum kumeno ubimo winjo dwand dhanu ngo; kum en e lembe ma Yehova ketho uwoki, kara eketh lembe pare cungi, ma Yehova yero ku dhu Ahija ma Jaciloni ni Yeroboam ma wod Nebat.

¹⁶E kinde ma Israel ceke neno nia ubimo winjo dwandgi ngo, e dhanu loko lembe ni ubimo, giwacu kumae, Makapiny mwa ang’o ma ni ba Daudi? kadok aba de ma nia wabed ko ba wod Yese: ba hema mu, E Israel: dong’ icung kum ot peri giri, Daudi. Kum kumeno Israel udck ba hema migi.

¹⁷Ento nyithindho mir Israel m’ubedo i adhura pa Yuda, Rehoboam ucamu ker i wigi.

¹⁸Ubimo ma Rehoboam ulund uoro Adoram, ma ni wi dhanu ma juketho gi kum tic ma jumuli ko; e Israel ceke canye ku kidi m’etho ko. Man ubimo ma Rehoboam utimo pio kara eidh malu i magali pare, ering i Yerusalem.

¹⁹Kum kumeno Israel ujai ni ot pa Daudi cil i ceng’ ma tin.

²⁰Man etimbre, kinde ma Israel ceke winjo nia Yeroboam udwogo, ya gioro kwenda man gilwong’e bang’ udul, man gikethe ni ubimo wi Israel ceke: ng’atu moko mbe m’ulubo ot pa Daudi, ento suru pa Yuda kende.

²¹Man kinde ma Rehoboam ubino Yerusalem, ecoko ot pa Yuda ceke, ku suru pa Benyamin, dhanu ma jugoyo wigi rubanga dak acel ku pier abora, ma gi dhanu mir ali, kara gikied kum ot mir Israel, kara gidwok ker kendo ba Rehoboam ma wod Suleman.

²²Ento lembe pa Mungu bino ba Cemaya ma dhanu pa Mungu, uwacu kumae,

²³Yer ni Rehoboam ma wod Suleman, m’ubimo mi Yuda, man ni ot ceke mi Yuda ku Benyamin, man ni dong dhanu, wac kumae,

²⁴Yehova wacu kumae, Kud wuidh malu, kadi kud wukied kum utumegwu ma nyithindho mir Israel; wudok kewu ceke ng’atuman ba ot pare man ba ot pare; kum gin maeni ai i bang’a. Kum kumeno giwinjo lembe pa Yehova, e gidok gicidho i yo migi, calku lembe pa Yehova.

²⁵Yeroboam ulund ugomo Cekem i ng’om gudi pa Efraim, man ebedo i ie; man eai woko ku kuca, e egomo Penuel.

²⁶Man Yeroboam uwacu yor i adundene kumae, Kawono ker bidwogo ba ot pa Daudi:

²⁷tek dhanu maeni idho malu nithiero lam i ot pa Yehova i Yerusalem, adunde dhanu maeni bilund lokre kendo ba rwoth migi, en e ba Rehoboam m’ubimo mi Yuda; e gibinega, man gibidok ba Rehoboam m’ubimo mi Yuda.

²⁸Kum kumeno ubimo poro lembe, man etimo nyithi dhiang’ ario mi mola ma kwar; man ewacu igi kumae, Idho malu Yerusalem tek iwu: nen mungu peri, E Israel, m’ukeli malu kud i ng’om Misiri.

²⁹Man eketho acel i Beth-el, man mucelo eketho i Dan.

³⁰E gin maeni doko ni dubo; kum dhanu cidho nirwo i wang’ nyathi dhiange acel, en e ba Dan.

³¹Man egomo udi mi ka ma malu, man etimo julam kud i kind dhanu ceke, ma gi mi wot Lawi ngo.

³²Man Yeroboam uketho agba i dwi mir aborane, i ceng’ apar wi abije mi dwi, calkud agba ma ni i Yuda, man eidho malu ba pemblam; etimo kumeca i Beth-el, m’ebelamu ko lam ni nyithi dhiang’ m’etimo: man eketho julam mi ka ma malu m’etimo i Beth-el.

³³Man eidho malu ba pemblam m’etimo i Beth-el i ceng’ apar wi abije mi dwi aborane, en e i dwi m’eporo i adundene gire: man eketho agba ni nyithindho mir Israel, man eidho malu ba pemblamne, kara ewang’ udok ma ng’wice ng’ar.