Read Alur 1 Ubimo 13 Bible Online

1 Ubimo 13 - Alur bible

1 Ubimo 13

¹Man, nen, dhanu pa Mungu ai kud i Yuda ku lembe pa Yehova i Beth-el: e Yeroboam ucungo ng’et pemblam kara ewang’ udok ma ng’wice ng’ar.

²Man ekok kum pemblamne ku lembe pa Yehova, ewacu de kumae, E pemblam, pemblam, Yehova wacu kumae: Nen, jubinyolo nyathin ma nico i ot pa Daudi, ma nyinge Yosia; man ebilamu julam m’i ka ma malu i wii, man gibiwang’u cogo dhanu i wii.

³Man emio giranyutha ceng’ nica, ewacu kumae, Maeni giranyutha ma Yehova yero: Nen, pemblam bing’eny, man vuru ma ni wie jubioyo woko.

⁴Man etimbre, kinde m’ubimo winjo lembawaca pa dhanu pa Mungu, m’ekok ku kum pemblam m’i Beth-el, nia Yeroboam urieyo cinge ku ba pemblam, ewacu kumae, Wumake. Man cinge, m’erieyo i kume, utal, ketho nia ecopo dole kendo ngo i bang’e.

⁵Pemblam bende ung’eny, man vuru oi woko ku wi pemblamne, calku lembanyutha ma dhanu pa Mungu mio ku lembe pa Yehova.

⁶Man ubimo loko lembe ewacu de ni dhanu pa Mungu kumae, Kawono kwai bero pa Yehova Mungu peri, man irwo pira, kara cinga dwog ira kendo kakare. E dhanu pa Mungu kwayu Yehova, man cing ubimo dwogo kendo ire kakare, man edoko calu ma naka ebedo.

⁷Man ubimo wacu ni dhanu pa Mungu kumae, Waci wakudi pacu, man idwok cwinyi, man abimio iri sukulia.

⁸Man dhanu pa Mungu wacu ni ubimo kumae, kadok imio ira ng’et ot peri ngi, wabimondo wakudi ngo, kadi camu kwen kadi madhu pi de abitimo ngo kakeni;

⁹kum jung’olo kumeni ira ku lembe pa Yehova, juwacu kumae, Ibicamu kwen moko ngo, kadi madhu pi de, kadok dok kud i yo m’ibino i ie de.

¹⁰Kum kumeno ecidho ku yor i yo mange, man edwogo ngo kud i yo m’ebino ko Beth-el.

¹¹Nwang’u jabila m’uti bedo i Beth-el; man ng’atu acel ma kind wote bino yero ire tic ceke ma dhanu pa Mungu timo ceng’ maeca i Beth-el: lembe m’eyero ni ubimo, giyero maeno bende ni weggi.

¹²Man weggi wacu igi kumae, Ecidho yo kani? Nwang’u wote gineno yo ma dhanu pa Mungu cidho i ie, m’uai i Yuda.

¹³Man ewacu ni wote kumae, Wuketh jambwoth ira wi kana. Kum kumeno giketho jambwoth ire wi kanane; man ewotho kud i wie.

¹⁴E elubo tok dhanu pa Mungu, man enwang’e m’ebedo the bongu m’ujany; e ewacu ire kumae, In i dhanu pa Mungu m’uai kud i Yuda? Man ewacu kumae, An a en.

¹⁵Elund ewacu ire kumae, Waci pacu wakudi, man wacam kwen.

¹⁶Man ewacu kumae, Wacopo dok wakudi ngo, kadi mondo kudi de; kadok camu kwen kadi madhu pi de wabicamu wabimadhu kudi ngo i ka maeni:

¹⁷kum juwacu ira ku lembe pa Yehova kumae, Kud icam kwen kadi madhu pi de kuca, kadi kud idok kendo ku yor i yo m’ibino i ie.

¹⁸Man ewacu ire kumae, An de an a jabila calu in; man malaika yero ira ku lembe pa Yehova, ewacu kumae, Dwog kude i ot peri, kara ecam kwen man emadh pi. Ento ecwayu ndra ire.

¹⁹Kum kumeno gidok gikude, man ecamu kwen i ot pare, emadhu pi de.

²⁰Man etimbre, ka gibedo dhu mesa, nia lembe pa Yehova bino ba jabila ma gidwogo gikude;

²¹man ekok ni dhanu pa Mungu m’uai i Yuda, ewacu kumae, Yehova wacu kumae, Kum iworo lembe ma dhu Yehova ngo, man iworo lembang’ola ma Yehova Mungu peri ng’olo iri ngo,

²²ento idwogo, man icamu kwen imadhu pi de i ka m’ewacu iri pire kumae, Kud icam kwen, man kud imadh pi moko; kumi bidok ba odliel pa kwaru ngo.

²³Man etimbre, yo ng’ei kwen m’ecamu, man yo ng’ei madhu m’emadhu, nia eketho jambwoth ire wi kana, ni jabila m’edwoke cen.

²⁴E kinde m’ecidho, umvor urombo kude i yo, e enege: man jubolo avuje i yo, e kana cungo i ng’ete; umvor bende cungo i ng’et avuje.

²⁵Man, nen, dhanu kadhu, man gineno avu ma jubayu i yo, man umvor m’ucungo i ng’et avune; e gibino giyero maeni i adhura ka ma jabila m’uti ni ie.

²⁶Man kinde ma jabila m’udwoke cen kud i yo winjo pire, ewacu kumae, En e dhanu pa Mungu, m’uworo lembe ma dhu Yehova ngo: ka kumeno Yehova mie ni umvor, m’uyece, m’unege de, calu lembe pa Yehova, m’eyero pire.

²⁷E eyero ni wote, ewacu kumae, Wuketh jambwoth ira wi kana. Man giketho jambwoth i wie.

²⁸E ecidho enwang’u avuje ma jubayu i yo, ku kana man umvor m’ucungo ng’et avune: umvor ucamu avune ngo, kadok kana de eyeco ngo.

²⁹E jabila ting’o avu dhanu pa Mungu, man ekethe wi kana, e edwoke cen; man etundo bang’ adhura pa jabila m’uti, kara eywak, man eyike.

³⁰Man eketho avuje i liel pare gire; e giywak i wie, giwacu kumae, Akayo, umira yo!

³¹Man etimbre, yo ng’ei yik m’eyike, nia eyero ni wote, ewacu kumae, Kinde m’atho, wulund wuyika i odliel ma juyiko ie dhanu pa Mungu; wuketh cogona i ng’et cogone.

³²Kum lembawaca m’ekok ko ku lembe pa Yehova kum pemblam m’i Beth-el, man kum udi ceke mi ka ma malu ma gini i adhura mi Samaria, bitimbre kakare andha.

³³Yo ng’ei gin maeni Yeroboam ulokre kendo ngo kud i yo pare ma rac, ento etimo julam kendo mi ka ma malu ku kind dhanu ceke: ng’atu ma tek uyio, ekethe, kara julam mi ka ma malu bed nuti.

³⁴Man gin maeni doko ni dubo ni ot pa Yeroboam, kara ukabe woko, man unyothe kud i wang’ ng’om.