Read Alur 1 Ubimo 16 Bible Online

1 Ubimo 16 - Alur bible

1 Ubimo 16

¹Man lembe pa Yehova bino ba Yehu ma wod Hanani kum Baca, m’uwacu kumae,

²Kum ating’i malu kud i utur, man akethi ni jatelwic wi dhanu para Israel, man iwotho i yo pa Yeroboam, iketho dhanu para ma Israel udubo de, kara inyai ng’ecwiny i ia ku dubo migi;

³nen, abiyweyo Baca woko ku ot pare kot; man abidwoko ot peri calu ot pa Yeroboam ma wod Nebat.

⁴Dhanu pa Baca m’utho i adhura gwogi bicamu: man dhanu pare m’utho i thim winyo ma kor polo bicamu.

⁵Nie dong’ tic pa Baca, ku gin m’etimo, man tego pare, gigore i kitabu mi lemkei mir ubimo mir Israel ungo?

⁶E Baca nindo ku kwaru mire, man juyike i Tirza; man Ela ma wode camu ker kakare.

⁷Man ke lembe pa Yehova bino ku jabila ma Yehu ma wod Hanani kum Baca, man kum ot pare, kum dubo ceke m’etimo i wang’ Yehova, kara unyai ng’ecwiny i ie ku tic mi cinge, kum ebedo calu ot pa Yeroboam, man kum egoye.

⁸I rundi pier ario wi abusiende pa Asa m’ubimo mi Yuda, Ela ma wod Baca maku camu ker wi Israel i Tirza, man ecamu ker rundi ario.

⁹Man jatic pare ma Zimri, ma jego mi ng’et magali pare, uporo lembe i kume. Nie eni i Tirza, m’ebemadhre m’emer ko i ot pa Arza, m’ubedo wi juot i Tirza:

¹⁰e Zimri mondo man egoye, e enege, i rundi pier ario wi abirone pa Asa m’ubimo mi Yuda, man ecamu ker kakare.

¹¹Man etimbre, kinde m’emaku camu ker, kan ejany wi komker pare, nia egoyo juot ceke pa Baca: eweko ire ng’atu moko ngo ma nico, kadok mi wat pare, kadi mi jurimbe.

¹²Zimri nyotho juot pa Baca ceke kumeni, calku lembe pa Yehova, m’eyero kum Baca ku dhu Yehu ma jabila,

¹³kum dubo ceke pa Baca, man dubo pa Ela ma wode, ma gidubo, ma giketho Israel udubo kudo de, kara unyai ng’ecwiny i Yehova, Mungu mir Israel, ku tic migi ma kite mbe.

¹⁴Nie dong’ tic pa Ela, ku gin ceke m’etimo, gigore i kitabu mi lemkei mir ubimo mir Israel ungo?

¹⁵I rundi pier ario wi abirone pa Asa m’ubimo mi Yuda, Zimri camu ker ceng’ abiro i Tirza. Nie dhanu gigonjo kum Gibethon, ma en e mi Jufilisti.

¹⁶Man dhanu ma gigonjo giwinjo kumae, Zimri poro lembe, man egoyo ubimo bende: kum kumeno Israel ceke ketho Omri, ma jego mir udul, ni ubimo wi Israel i ceng’ maeca i kagonjo.

¹⁷Man Omri idho malu kud i Gibethon, man Israel ceke gikugi, man gitieko Tirza kud ali.

¹⁸Man etimbre, kinde ma Zimri neno nia gimaku adhura, nia emondo i ot ma tek mi ot p’ubimo, man ecwinyo ot p’ubimo i wie ku mac, e etho,

¹⁹kum dubo pare m’edubo ku tim m’etimo ko gin ma rac i wang’ Yehova, ku wotho i yo pa Yeroboam, mani dubo pare m’edubo, m’eketho Israel ududo ko.

²⁰Nie dong’ tic pa Zimri, man athube pare m’etimo, gigore i kitabu mi lemkei mir ubimo mir Israel ungo?

²¹Dhanu mir Israel ulund upokre i ng’ete ario: ng’et dhanu kucel gilubo Tibni ma wod Ginath, kara gikethe ni ubimo; ng’ete mucelo ke gilubo Omri.

²²Ento dhanu m’ulubo Omri givoyo dhanu m’ulubo Tibni ma wod Ginath: kum kumeno Tibni tho, man Omri camu ker.

²³I rundi pier adek wi acende pa Asa m’ubimo mi Yuda, Omri maku camu ker wi Israel, man ecamu ker rundi apar wi ario: rundi abusiel ecamu ker i Tirza.

²⁴Man eng’iewo ungulu got ma Samaria ba Cerner mi talanto mi mola ma tar ario; man egomo wi ungulu gode, e elwong’o nying adhurane m’egomo, calku nying’ Cerner, ma won ungulu gode, ma Samaria.

²⁵E Omri timo gin ma rac i wang’ Yehova, man etimo rac ma sagu ju m’ular uwok ire ceke.

²⁶Kum ewotho i yo pa Yeroboam ma wod Nebat ceke, man i dubo pare m’eketho Israel udubo kudo, kara enyai ng’ecwiny i Yehova, Mungu mir Israel, ku tic migi ma kite mbe.

²⁷Nie dong’ tic pa Omri m’etimo, ku tego pare m’enyutho, gigore i kitabu mi lemkei mir ubimo mir Israel ungo?

²⁸Kum kumeno Omri nindo ku kwaru mire, man juyike i Samaria; man Ahab ma wode camu ker kakare.

²⁹Man i rundi pier adek wi aborane pa Asa m’ubimo mi Yuda, Ahab ma wod Omri maku camu ker wi Israel: man Ahab ma wod Omri camu ker wi Israel i Samaria rundi pier ario wi ario.

³⁰Man Ahab ma wod Omri timo rac i wang’ Yehova ma sagu ju m’ular uwok ire ceke.

³¹E etimbre, calu en e gin ma nok ire nia ewoth i dubo pa Yeroboam ma wod Nebat, nia egamu Yezebel nyar Ethbal m’ubimo mi Jusidoni ni dhaku, man ecidho etimo ni Bal, erwo ire de.

³²E eguro pemblam ni Bal i ot pa Bal, m’eguro i Samaria.

³³Man Ahab utimo mungu m’araga; e Ahab utimo rac ma sagu ubimo ceke mir Israel m’ular uwok ire, kara unyai ng’ecwiny i Yehova, Mungu mir Israel.

³⁴I nindo pare Hiel ma Jabeth-eli gomo Yeriko: etheko there ku rwinyo pa Abiram ma kayu pare, man eketho dhugang’ne cungo ku rwinyo pa wode ma cogo Segub, calku lembe pa Yehova, m’eyero ku dhu Yocuwa ma wod Nun.