Read Alur 1 Ubimo 18 Bible Online

1 Ubimo 18 - Alur bible

1 Ubimo 18

¹Man etimbre yo ng’ei nindo dupa, nia lembe pa Yehova bino bang’ Elia, i rundi mir adege, m’uwacu kumae, Cidhi, nyuthri giri ni Ahab; man abioro koth wi ng’om.

²Man Elia cidho kara enyuthre ni Ahab. Man ndru bedo tek dit i Samaria.

³Man Ahab ulwong’o Obadia, ma en e wi juot. (Nwang’u Obadiane lworo Yehova hai:

⁴kum ebedo kumeno, kinde ma Yezebel ukabu jubila pa Yehova woko, nia Obadia gamu jubila dak acel, man ekanugi pier abic pier abic i odng’om, man emio igi kwen ku pi.)

⁵Man Ahab uwacu ni Obadia kumae, Kadh kud i ng’om, ba kulo mi pi ceke, man ba kulo ma thindho ceke: kuno nyo wabinwang’u lum man wabibodho riuni ku kana ma kwo, kara lim kud urwiny ceke iwa.

⁶Kum kumeno gipoko ng’om i kindgi kara gikadh kud i ie ndri: Ahab ucidho i yo acel en gire, man Obadia cidho i yo mucelo en gire.

⁷Man ka Obadia ni i yo, nen, Elia rombo kude: man eng’eye, e epodho arieba wang’e, ewacu de kumae, En e in, rwoth para ma Elia?

⁸E eloko ire lembe kumae, En e an: cidhi, yer ni rwoth peri kumae, Nen, Elia ni keni.

⁹Man ewacu kumae, Ang’o m’adubo i ie, m’uketho iyenyo imi jatic peri i cing Ahab, kara enega?

¹⁰Calu Yehova Mungu peri bedo kwo, thek moko mbe kadi ker, ma rwoth para kuyenyi i ie ngo: man ka giwacu kumae, Eni keni ngo, egamu kwong’ ba kerne man ba thekne, nia ginweng’i ngo.

¹¹Man kawono iwacu kumae, Cidhi, yer ni rwoth peri kumae, Nen, Elia ni keni.

¹²Man ebitimbre, kan aai i beng’i, nia Tipo pa Yehova biting’i teri i ka m’ang’eyo ngo; man kan abino ayero ni Ahab de, man ecopo nweng’i ngo, ebinega: ento an m’a jatic peri agamu lworo Yehova i aradu para.

¹³Juyero ni rwoth para ngo gin m’atimo kinde ma Yezebel unego jubila pa Yehova, maram akanu ko dhanu dak acel ma kind jubila pa Yehova pier abic pier abic i odng’om, man amio igi kwen ku pi gicami?

¹⁴Man kawono iwacu kumae, Cidhi, yer ni rwoth peri kumae, Nen, Elia ni keni; man ebinega.

¹⁵E Elia wacu kumae, Calu Yehova mir udul ubedo kwo, m’acungo i wang’e, abinyuthra gira andha ire tin.

¹⁶Kum kumeno Obadia cidho kara eromb kud Ahab, man eyero ire; e Ahab ucidho kara eromb kud Elia.

¹⁷Man etimbre, kinde ma Ahab uneno Elia, nia Ahab uwacu ire kumae, En e in, in i jasend Israeli?

¹⁸Man eloko lembe kumae, Asendo Israel ungo; ento in, ku ot pa wuru, kum wukuno lembang’ola pa Yehova, man ilubo Balim.

¹⁹Ka kumeno kawono or kwenda, man icok Israel ceke i bang’a wi got Karmel, ku jubila pa Bal dak ang’wen ku pier abic, man jubila mi mungu m’araga dak ang’wen, ma camu dhu mesa pa Yezebel.

²⁰Kum kumeno Ahab uoro kwenda ba nyithindho mir Israel ceke, man ecoko jubila karacelo wi got Karmel.

²¹Man Elia bino ceng’ni ba dhanu ceke, e ewacu kumae, Wubikomo akoma i kind yic ario rokani? tek Yehova en e Mungu, wulube; ento tek Bal, e wulube. Man dhanu giloko ire lembe acel de ngo.

²²Elia lund uwacu ni dhanu kumae, Ndhu an, a kenda, e m’adong’ ni jabila pa Yehova; ento jubila pa Bal gi dak ang’wen ku pier abic.

²³Ka kumeno wek gimi thwoni dhiang’ ario iwa; man wek gigoi wi thwon dhiang’ acel igi gigi, e githume ni undhing’ undhing’, man gikethe wi yen, man ku giketh mac moko i there; e abitong’o thwon dhiang’ mucelo, man abikethe wi yen, e abiketho mac moko ngo i there.

²⁴Man wulwong’ nying’ mungu mu, man abilwong’o nying’ Yehova: e Mungu m’uloko lembe ku mac, wek ebed Mungu. E dhanu ceke giloko lembe man giwacu kumae, Juyero dre.

²⁵Man Elia wacu ni jubila pa Bal kumae, Wugoi wi thwon dhiang’ acel iwu giwu, man wular wutong’e; kum wun wu dupa; man wulwong’ nying’ mungu mu, ento kud uketh mac moko i there.

²⁶E gigamu thwon dhiange ma jumio igi, e gitong’e, man gilwong’o nying’ Bal ugambre kugweno cil dieceng’, giwacu kumae, E Bal, koiwinjwa. Ento dwal moko mbe ma nuti, kadi moko mbe m’uloko lembe. Man giwotho ku por malu gilworo ko pemblam ma juguro.

²⁷Man etimbre dieceng’, nia Elia poro bang’gi, man ewacu kumae, Wukok ma tek; kum en e mungu: kadi ebepido lembe, kadi ecoro cen, kadi ecidho i woth, kadi kuno nyo enindo man maku wueewe be.

²⁸E gikok ma tek, man githumbri gigi calu kura migi ku palamularu man ku pala, maram rimo thwogre ko woko i kumgi.

²⁹Man ebedo kumeno, kinde ma dieceng’ ma ling’ ukadhu, nia giewo lembe cil i nindo mi thiero girathiera mir uthieno; ento kadok dwal de mbe, kadi ng’atu moko m’ulok lembe de, kadi ng’atu moko mbe m’unen bang’gi.

³⁰Man Elia wacu ni dhanu ceke kumae, Wucor ceng’ni vuta; e dhanu ceke gibino ceng’ni bang’e. Man eyiko pemblam pa Yehova ma juredho piny.

³¹Man Elia gamu kidi apar wi ario, calku wel suru mi wot Yakobo, ma lembe pa Yehova bino i bang’e, uwacu kumae, Nyingi bibedo Israel.

³²Man etadu pemblam ku kidine ku nying’ Yehova; man etong’o vur utieko pemblamne, ma ditne romo mukero ario mi kodhi.

³³Man etadu yen kubang’e kubang’e, ethumo i thwon dhiang’ de ni undhing’ undhing’, man ekethe wi yen. Man ewacu kumae, Wupong’ agulu ang’wen ku pi, e wukonje wi lam m’awang’ane, man wi yende.

³⁴Man ewacu kumae, Wutim wang’ arionde; e gitime wang’ arionde. Man ewacu kumae, Wutime wang’ adege; e gitime wang’ adege.

³⁵Man pi mol ku tieko pemblam gbur; man epong’o vur bende ku pi.

³⁶Man etimbre i nindo mi thiero girathiera mir uthieno, nia Elia ma jabila bino ceng’ni, man ewacu kumae, E Yehova, Mungu pa Ibrahim, pa Isak, man pa Israel wek jung’ei i ceng’ maeni nia in i Mungu i kind Israel, man nia an a jatic peri, man nia atimo gin maeni ceke kum lembe peri.

³⁷Winja, E Yehova, winja, kara dhanu maeni ging’ei nia in, Yehova, in i Mungu, man nia iloko adundegi udwog kendo.

³⁸E mac pa Yehova lund upodho, man ewang’u lam m’awang’a, ku yen, kukidi, kud utur, man enang’u pi ma ni i vur.

³⁹E kinde ma dhanu ceke gineno maeni, gipodho arieba wang’gi: man giwacu kumae, Yehova, en e Mungu; Yehova, en e Mungu.

⁴⁰Man Elia wacu igi kumae, Wumak jubila pa Bal; kud wuwek acel m’i kindgi bothi. E gimakugi; man Elia kelogi piny i kulo Kicon, e enegogi keca.

⁴¹Man Elia wacu ni Ahab kumae, Idhi, man icam imadh de; kum dwal mi koth ma dit nuti.

⁴²Kum kumeno Ahab uidho malu kara ecam emadh de. Man Elia idho malu wi Karmel; e erum gire piny wi ng’om, man eketho wang’e i kind conge.

⁴³E ewacu ni jatic pare kumae, idh malu kawono, nen yo ba nam. Man eidho malu, eneno de, e ewacu kumae, Gin moko mbe. Man ewacu kumae, Cidh kendo wang’ abiro.

⁴⁴Man etimbre i wang’ abirone, nia ewacu kumae, Nen, afuru wok kud i nam, ma nyathigi calu cing’ dhanu. E ewacu kumae, Idh malu, wac ni Ahab kumae, Yik magali peri, man ilor piny, kara koth kud uceri.

⁴⁵Man etimbre i kinde ma nyanok, nia polo yutho kud afuru ku yamu, e koth ma dit nuti. Man Ahab uringo, man ecidho Yezrel:

⁴⁶man cing’ Yehova ni wi Elia; e etwio piere, man eringo i wang’ Ahab ba kamondo mi Yezrel.