Read Alur 1 Ubimo 2 Bible Online

1 Ubimo 2 - Alur bible

1 Ubimo 2

¹Nie ceng’ pa Daudi dhingo ceng’ni m’ebitho i ie; man eng’olo ni Suleman ma wode, ewacu kumae,

²Abecidho i yo ma ng’om ceke cidho i ie: ka kumeno bed tek, man inyuthri giri nia in i nico;

³man igwok lembang’ola pa Yehova Mungu peri, kara iwoth i yo pare, kara igwok cik pare, ku lembang’ola pare, man lembapoka pare, ku lembatuca pare, calku maeno m’ugore i cik pa Musa, kara gin ceke m’itimo bed miero, man ka ceke ma tek ilokri i ie giri;

⁴kara Yehova keth lembe pare cungi m’eyero pira, m’ewacu kumae, Tek nyithindhi bedo ku wang’gi kum yo migi, kara giwoth i wang’a i lemandha kud adundegi ceke man ku ng’eyong’ec migi ceke, e dhanu birem iri ngo (ewacu) ma bibedo wi komker mir Israel.

⁵Mange ke ing’eyo gin ma Yoab ma wod Zeruia timo i bang’a bende, gin m’etimo kum jego ario mir udul Israel, kum Abner ma wod Ner, man kum Amasa ma wod Yether, m’enego, man ecwiro rimo mir ali i nindo mi kwiocwiny, man eketho rimo mir ali wi thond piere m’ubedo i piere, man i wara pare m’eronyo i tiende.

⁶Ka kumeno tim calku rieko peri, man kud iwek wie ma ku lwar ulor piny i liel ku kwiocwiny.

⁷Ento nyutk bero ni wot Barzuai ma Jagileadi, man wek gibed kind ju ma camu dhu mesa peri; kum gibino i bang’a kumeno i kinde m’aringo Absalom m’umera.

⁸Man, nen, Cimei ma wod Gera, ma Jabenyamini, ma Bahurim, ni kudi, m’elama ku lam ma rac i ceng’ m’acidho Mahanaim; ento eloro piny kara eromb kuda i Yordan, man akwong’o ire ku Yehova, awacu kumae, Abinegi ku palamularu ngo.

⁹Ka kumeno kawono kud ikwane ma dubo mbe kude, kum in i ng’atu ma riek; man ibing’eyo gin ma maku itim i kume, man ibitero wie ma ku lwar piny i liel ku rimo.

¹⁰E Daudi nindo ku kwaru pare, man juyike i adhura pa Daudi.

¹¹E ceng’ma Daudi camu ie ker wi Israel en e rundi pier ang’wen; ecamu ker rundi abiro i Hebron, man rundi pier adek wi adek i Yerusalem.

¹²Man Suleman ujany wi komker pa Daudi ma won; e ker pare cungo tek.

¹³Adonija ma wod Hagith ulund ubino ba Bath-ceba ma min Suleman. Man ewacu kumae, Ibino ku kwiocwinyi? E ewacu kumae, Ku kwiocwiny.

¹⁴Man ewacu kendo kumae, Abedo ku nyalembe moko m’ayer iri. E ewacu kumae, Yer asu.

¹⁵Man ewacu kumae, Ing’eyo nia nwang’u ker en e para, man nia Israel ceke giketho wang’gi i kuma, nia acam ker: ento ker ulokre, man edoko p’umira; kum en e pare ku ba Yehova.

¹⁶Man kawono apenjo penji acel i beng’i; kud ikwere. E ewacu ire kumae, Yer asu.

¹⁷Man ewacu kumae, Akwei, yer ni Suleman m’ubimo (kum ebikwero iri ngo), nia emi Abicag ma Nyacunami ira ni dhaku.

¹⁸Man Bath-ceba wacu kumae, Dre; abiyero piri ni ubimo.

¹⁹Ka kumeno Bath-ceba mondo bang’ ubimo ma Suleman, kara eyer ire pir Adonija. E ubimo ai malu kara eromb kude, man erum gire ire, man ejany piny wi komker pare, man eng’olo ya juketh komker ni min ubimo; e ebedo yo ku cinge ma yor acwic.

²⁰Elund ewacu kumae, Apenjo penji acel ma nok i beng’i; kud ikwer ira. Man ubimo wacu ire kumae, Penj asu, ma; kum abikwero iri ngo.

²¹Man ewacu kumae, Wek jumi Abicag ma Nyacunami ni Adonija m’umeru ni dhaku.

²²Man ubimo Suleman uloko lembe man ewacu ni min kumae, Ipenjo Abicag ma Nyacunami ni Adonija ni dhaku nedi? penj ire ker bende; kum en e umira ma jadit; ndhu ire, man ni Abiathar ma jalam, man ni Yoab ma wod Zeruia.

²³E ubimo ma Suleman ulund ukwong’o ku Yehova, ewacu kumae, Mungu tim kumeni i bang’a, man m’usagu bende, tek Adonija yero lembe maeni kum kwo pare gire ngo.

²⁴Ka kumeno calu Yehova bedo kwo, m’eketho acungo, man m’eketha wi komker pa Daudi ma vwa, man m’etimo ira ot, calu eng’olo, andha jubinego Adoiiija tin.

²⁵E ubimo ma Suleman ung’olo ni Benaya ma wod Yehoiada; e epodho i wie, enege.

²⁶Man ubimo wacu ni Abiathar ma jalam kumae, Cidh i Anathoth, ba podho peri ma dhe; kum iromo ku tho; ento abinegi i nindo maeni ngo, kum iyeyo sanduk pa Rwoth Yehova i wang’ Daudi ma vwa, man kum jusendi ku gin ceke ma jusendo ko vwa.

²⁷Kum kumeno Suleman uriemo Abiathar kud ebed jalam ni Yehova, kara eketh lembe pa Yehova timbre kakare, m’eyero pi ot pa Eli i Cilo.

²⁸E rwonglembene bino ba Yoab; kum Yoab ulokre tok Adonija, kadok elokre tok Absalom ungo. Man Yoab uringo ba Hema pa Yehova, man emaku tung pemblam.

²⁹Man juyero ni ubimo ma Suleman kumae, Yoab uringo ba Hema pa Yehova, man, nen, eni i ng’et pemblam. Suleman ulund uoro Benaya ma wod Yehoiada, ewacu kumae, Cidh, ipodh i wie.

³⁰Man Benaya bino ba Hema pa Yehova, man ewacu ire kumae, Ubimo wacu kumae, Ai ku keno. Man ewacu kumae, Ungo; ento abitho keni. Man Benaya dwoko lembe kendo bang’ ubimo, ewacu kuman, Yoab uwacu kuman.

³¹Man ubimo wacu ire kumae, Tim calu ewacu, man ipodh i wie, e iyike; kara ikab rimo woko, ma Yoab ewiro m’umbe lembe, kud i bang’a man ku ba ot pa vwa.

³²Man Yehova bidwoko rimo pare i wie gire, kum epodho wi dhanu ario ma pwe man ma ber ma sagu en, man enegogi ku palamularu, man Daudi ma vwa ng’eyo ngo, en e Abner ma wod Ner, ma jego mir udul mir Israel, kud Amasa ma wod Yether, ma jego mir udul pa Yuda.

³³Kum kumeno rimbgi bidwogo i wi Yoab, man wi kodhine mi nja: ento kum Daudi, man kum kodhine, man kum ot pare, man kum komker pare, kwiocwiny m’uai ba Yehova bibedo nuti mi nja.

³⁴Benaya ma wod Yehoiada, elund eidho malu, man epodho i wie, e enege; man juyike i ot pare ma dhe i langa.

³⁵Man ubimo ketho Benaya ma wod Yehoiada i kakare wi udul; man ubimo ketho Zadok ma jalam i kakar Abiathar.

³⁶Man ubimo oro kwenda man elwong’o Cimei, ewacu ire de kumae, Gom iri ot i Yerusalem, man ibed keca, e kud iwok woko ku keca kamoko.

³⁷Kum i ceng’ m’iwok woko, man ikadhu loka kulo Kidron, dong’ ing’ei andha nia ibitho andha: rimo peri de bibedo i wii giri.

³⁸E Cimei wacu ni ubimo kumae, Lembawaeane e dre: calu rwoth para m’ubimo wacu, e jatic peri bitimo kumeca. E Cimei bedo i Yerusalem ceng’ dupa.

³⁹Man etimbre ka rundi adek uthum, nia jutic ario pa Cimei gipiei giringo ba Akic, ma wod Maka, m’ubimo mi Gath. E giyero ni Cimei, giwacu kumae, Nen, jutic peri gini i Gath.

⁴⁰E Cimei ai, man eketho jamb wo th wi kana pare, man ecidho i Gath ba Akic, kara eyeny jutic pare; e Cimei cidho, man egamu jutic pare kud i Gath.

⁴¹E juyero ni Suleman nia Cimei ai kud i Yerusalem ucidho i Gath, man edwogo kendo.

⁴²E ubimo oro kwenda ulwong’o Cimei ewacu ire kumae, Acimi ngo ku Yehova, man, ayero iri, awacu kumae, Dong’ ing’ei andha, nia ceng’ m’iwok woko, man iwotho bor kamoko, nia ibitho andha? e iwacu ira kumae, Lembawaca m’awinjo e dre.

⁴³Ka kumeno iworo kwcng’ pa Yehova ngo nedi, ku lembang’ola m’ang’olo iri?

⁴⁴Ubimo wacu kendo ni Cimei kumae, Ing’eyo dubo ceke m’ubedo amung’a yor i adundeni, m’itimo kum Daudi ma vwa: ka kumeno Yehova bidwoko dubo peri i wii giri.

⁴⁵Ento ubimo ma Suleman binwang’u mugisa, man komker pa Daudi bicungo i wang’ Yehova mi nja.

⁴⁶Kum kumeno ubimo ng’olo ni Benaya ma wod Yehoiada; e ecidho woko, epodho i wie, ketho etho. Man ker ucungo i cing’ Suleman.