Read Alur 1 Ubimo 20 Bible Online

1 Ubimo 20 - Alur bible

1 Ubimo 20

¹E Ben-hadad m’ubimo mi Cami coko udul pare ceke karacelo; man ubimo pier adek wi ario ni kude, ku riuni man magali: man eidho malu etieko Samaria de kud ali, man ekiedo i kume.

²Man eoro jukwenda bang’ Ahab m’ubimo mir Israel, i adhura, man ewacu ire kumae, Ben-hadad uwacu kumae,

³Mola ma tar peri ku mola ma kwar peri en e para; mon peri bende ku nyithindho peri, cil ma ber m’usagu, gi para.

⁴E ubimo mir Israel uloko lembe man ewacu kumae, En e calku lembawaca peri, rwoth para, E ubimo; an a peri, ku gin ceke m’abedo ko.

⁵Man jukwenda gibino kendo, e giwacu kumae, Ben-hadad uwacu kumae, Aoro kwenda i beng’i andha, awacu kumae, Ibimio mola ma tar peri ira, ku mola ma kwar peri, ku mon peri, man nyithindho peri;

⁶ento abioro jutic para i beng’i urwo unyoni, man gibiyenyo i ot peri, kud i udi mi jutic peri; man ebibedo, nia gin ceke ma tek e ber i weng’i, gibigame i cing’gi, e gibikabe woko.

⁷Ubimo mir Israel ulund ulwong’o judongo ceke m’i ng’om, man ewacu kumae, Akwayuwu, wung’i man wunen maram ng’atu maeni beyenya ko ku rop: kum eoro kwenda i bang’a pi mon para, man pi nyithindho para, man pi mola ma tar para, man pi mola ma kwar para; e akwere ngo.

⁸Man judongo ceke ku dhanu ceke giwacu ire kumae, Kud iwinji, kadok ayia de kud iyi.

⁹Kum kumeno ewacu ni jukwenda pa Ben-hadad kumae, Wuyer ni rwoth para m’ubimo kumae, Gin ceke m’ilar ioro pire ba jatic peri abitimo; ento gin maeni acopo timo ngo. Man jukwenda giai, e gikelo lembe i bang’e kendo.

¹⁰Man Ben-hadad uoro kwenda i bang’e, man ewacu kumae, Mungu tim kumeno i bang’a, man mange bende, tek utur mi Samaria biromo pong’ cing’ dhanu ceke ma bilubo ng’eye.

¹¹Man ubimo mir Israel uloko lembe man ewacu kumae, Wuyer ire kumae, Ng’atu m’utwio jambali pare kud elule gire calu ng’atu m’uwodhe cen.

¹²Man etimbre, kinde ma Ben-hadad uwinjo rwonglembe maeni, kan ebemadhu, en ku ju m’ubimo, i hema, nia ewacu ni jutic pare kumae, Wutheru. Man githeri kum adhurane.

¹³Man, nen, jabila moko bino ceng’ni bang’ Ahab m’ubimo mir Israel, man ewacu kumae, Yehova wacu kumae, Ineno udul ma dit maeni ceke? nen, abimie i cingi tin; e ibing’eyo nia an a Yehova.

¹⁴Man Ahab uwacu kumae, Ni kum ng’a? Man ewacu kumae, Yehova wacu kumae, Ni kum awobi mi judongomawijo mi ng’et ng’om. Elund ewacu kumae, Ng’a ma bitheko lwinyi? E eloko lembe kumae, In.

¹⁵Elund ecoko awobi mi judongomawijo mi ng’et ng’om, man gi dak ario ku pier adek wi ario: e yo ku ng’eigi ecoko dhanu ceke, en e nyithindho mir Israel ceke, ma gi rubanga abiro.

¹⁶E giwok woko dieceng’. Ento Ben-hadad ubemadhre m’emer ko i hema, en ku ju m’ubimo pier adek wi ario ma konye.

¹⁷Man awobi mi judongomawijo mi ng’et ng’om gilar giwok woko; e Ben-hadad uoro kwenda woko, man giyero ire, giwacu kumae, Dhanu moko giwok woko ku i Samaria.

¹⁸E ewacu kumae, Tek giwok woko mi kwiocwiny, wumakgi ma kwo; kadi tek giwok woko mir ali, wumakgi ma kwo.

¹⁹Kum kumeno jumaeni giwok woko ku i adhura, ma gin awobi mi judongomawijo mi ng’et ng’om, man njuru asikari m’ulubogi.

²⁰E ginego kubang’gi kubang’gi ng’atuman dhanu pare; e Jucami giringo, man Israel uriemo gi: man Ben-hadad m’ubimo mi Cami uboth ku wi riuni giku weg riuni.

²¹Man ubimo mir Israel uwok woko, man egoyo riuni ku magali, man enego Jucami ku nek ma dit.

²²Man jabilane bino ceng’ni bang’ ubimo mir Israel, ewacu de ire kumae, Cidhi, itegri giri, man ing’i, inen de gin m’itimo; kum ka rundi dwogo ubimo mi Cami biidho malu i kumi.

²³Man jutic mir ubimo mi Cami uwacu ire kumae, Mungu migi en e mungu mi gudi; kum kumeno gi tek ma sagu wan; ento wek wakiedu kugi i pambu, man wabibedo tek ma sagugi andha.

²⁴Man itim gin maeni: kab ju m’ubimo woko, ku ba dhanu ceke kud i kakare, man iketh jego i kakagi:

²⁵man ikwan iri njuru asikari, calu njuru asikari m’urwinyo iri, rium pi riuni, man magali pi magali; e wabikiedo i kumgi i pambu, e wabibedo tek ma sagugi andha. E ewinjo dwandgi, man etimo kumeca.

²⁶Man etimbre ka rundi dwogo nia Ben-hadad ucoko Jucami, man eidho bang’ Afek, kara ekied kum Israel.

²⁷E jucoko nyithindho mir Israel, ku mio igi cemo de, man gicidho i kumgi: man nyithindho mir Israel ugonjo i wang’gi calu udul ario ma nok mi nyithi diegi; ento Jucami gipong’o ng’om.

²⁸Man dhanu pa Mungu bino ceng’ni eyero de ni ubimo mir Israel, man ewacu kumae, Yehova wacu kumae, Kum Jucami wacu kumae, Yehova en e mungu mir ungulu gudi, ento en e mungu mi poga ngo; ka kumeno abimio udul ma dit maeni ceke i cingi, man wubing’eyo nia an a Yehova.

²⁹E gigonjo man yo ba wadi man yo ba wadi ceng’ abiro. E ebedo kumeno, nia i ceng’ mir abirone ali moc; man nyithindho mir Israel unego kind Jucami dhanu ma ku tielo rubanga dak acel i ceng’ acel.

³⁰Ento donge m’udong’ giringo i Afek, i adhura; man gang’kidi podho wi dhanu rubanga pier ario wi abiro m’udong’. E Ben-hadad uringo, man edok i adhura, i kusika ma yor i ie.

³¹Man jutic pare wacu ire kumae, Kawono nen, wawinjo nia ubimo mi ot mir Israel gin ubimo ma weg kisa: wakwei, wek watwi pierwa ku gonia, ku uno i wiwa, man waci woko bang’ ubimo mir Israel: kuno nyo ebibodho kwo peri.

³²Kum kumeno gitwio piergi ku gonia, e giketho uno i wigi, man gibino bang’ ubimo mir Israel, giwacu de kumae, Jatic peri ma Ben-hadad uwacu kumae, Akwei, wek abed kwo. Man ewacu kumae, Fodi ebedo kwo? en e umira.

³³Nie dhanu ging’io cu, man gitimo pio kara ging’ei tek en e pidoie pare; e giwacu kumae, Umeru Ben-hadad. Elund ewacu kumae, Wucidhi, wukele. Ben-hadad ulund uwok woko i bang’e: man eketho eidh malu i magali.

³⁴Man Ben-hadad uwacu ire kumae, Adhura ma vwa mayu ba wuru abidwoko; man ibitimo gengi iri i Dameski, calu vwa timo i Samaria. Man an, Ahab uwacu, abiweki icidh ku lembariba maeni. Kum kumeno gitimo lembariba gikude, man giwek ecidho.

³⁵Man ng’atu moko ma kind wot jubila wacu ni wadi ku lembe pa Yehova kumae, Akwei, goya. Man ng’atuca kwero goye.

³⁶Elund ewacu ire kumae, Kum iworo dwand Yehova ngo, nen, kinde m’iai i bang’a, umvor binegi. Man kinde m’eai i bang’e, umvor unwang’e, man enege.

³⁷Elund enwang’u ng’atu mange, man ewacu kumae, Akwei, goya. E ng’atu maeno goye, egoye m’etong’o ko lero i kume.

³⁸Kum kumeno jabilane ai, man ekuro ubimo dhu yo, e epale gire ku kitambala pare i wang’e.

³⁹E kinde m’ubimo kadhu, ekok bang’ ubimone; man ewacu kumae, Jatic peri cidho woko i kind lwiny; man, nen, ng’atu acel ulokre cen, man ekelo ng’atu moko i bang’a, e ewacu kumae, Gwok ng’atu maeni: tek erwinyo ku yo moko, kwo peri bilund bedo pi kwo pare, k adi ibiculo talanto acel mi mola ma tar.

⁴⁰Man ka jatic peri betimo tic keni man kuca, e ecidho. Man ubimo mir Israel uwacu ire kumae, Lembapoka peri bibedo kumeca; in giri iketho lembene cungo.

⁴¹Man etimo pio, e ekabu kitambala woko kud i wang’e; man ubimo mir Israel ung’iye nia en e ng’atu acel ma kind jubila.

⁴²E ewacu ire kumae, Yehova wacu kumae, Kum iweko ng’atu m’akethe mi nyoth, ka kumeno kwo peri bibedo ka kwo pare man dhanu peri ka dhanu pare.

⁴³E ubimo mir Israel ucidho ba ot pare ku cwinye m’udieng’ ma lembe ton i ie de, man ebino Samaria.