Read Alur 1 Ubimo 22 Bible Online

1 Ubimo 22 - Alur bible

1 Ubimo 22

¹Man gibedo rundi adek ma ali mbe i kind Garni kud Israel.

²Man etimbre i rundi mir adege, nia Yehocafat m’ubimo mi Yuda loro piny bang’ ubimo mir Israel.

³Man ubimo mir Israel uwacu ni jutic pare kumae, Wung’eyo ngo nia Ramoth-gilead en e mwa, man wabedo ling’, e wagame ngo kud i cing ubimo mi Cami?

⁴E ewacu ni Yehocafat kumae, Wabicidho wakudi i lwiny ba Ramothgileadi? Man Yehocafat uwacu ni ubimo mir Israel kumae, Abedo calu in, dhanu para calu dhanu peri, riuni para calu riuni peri.

⁵Man Yehocafat uwacu ni ubimo mir Israel kumae, Akwei, lar ipenj lembe ba Yehova.

⁶Ubimo mir Israel ulund ucoko jubila karacelo, calu dhanu dak ang’wen, man ewacu igi kumae, Abicidho kum Ramoth-gilead i lwiny, kadi abidong’i? Man giwacu kumae, Idh malu; kum Rwoth bimie i cing ubimo.

⁷Ento Yehocafat uwacu kumae, Jabila pa Yehova mange mbe keni, kara wapenjue?

⁸Man ubimo mir Israel uwacu ni Yehocafat kumae, Fodi ng’atu acel nuti ma wacopo penjo lembe ba Yehova ni kume, en e Mikaya ma wod Imla: ento adage; kum eewo lembe ber pira ngo, ento rac. Man Yehocafat uwacu kumae, Dong’ ubimo kud uwac kumeno.

⁹Ubimo mir Israel ulund ulwong’o jego, man ewacu kumae, Kel Mikaya ma wod Imla pio.

¹⁰Nie ubimo mir Israel ku Yehocafat m’ubimo mi Yuda gibedo wi komker migi man wi pare man wi pare, ma gironjri ku kendi migi mi ker, i ka ma thwolo i kamondo mi dhugang’ mi Samaria; e jubila ceke gibeewo lembe i wang’gi.

¹¹Man Zedekia ma wod Kenana timo ire tung mi nyunyu, man ewacu kumae, Yehova wacu kumae, Ibicwalu Jucami ku maeni, maram githum ko.

¹²Man jubila ceke giewo kumeca, giwacu kumae, Idh malu ba Ramoth-gilead man lembe peri bed miero; kum Yehova bimie i cing ubimo.

¹³Man jakwenda m’ucidho nilwong’o Mikaya yero ire, ewacu kumae, Nen kawono, lembe mi jubila yere ber bang’ ubimo ku dhok acel: wek lembe peri, akwei, bed calu lembe pa ng’atu acel m’i kindgi, man iyer ber.

¹⁴E Mikaya wacu kumae, Calu Yehova bedo kwo, gin ma Yehova wacu ira, maeca abiyero.

¹⁵Man kinde m’ebino bang’ ubimo, ubimo wacu ire kumae, Mikaya, wabicidho malu Ramothgilead i lwiny, kadi wabidong’i? Man eloko lembe ire kumae, Idh malu man lembe bed miero: e Yehova bimie i cing ubimo.

¹⁶E ubimo wacu ire kumae, Abikwong’i wang’ adi nia kud iyer ira gin moko ndhu lemandha ku nying’ Yehova?

¹⁷Man ewacu kumae, Aneno Israel ceke kethri wi gudi, calu rombe ma jakwacgi mbe: e Yehova wacu kumae, Won maeni mbe; wek gidok kubang’gi kubang’gi ng’atuman ba ot pare ku cwinye m’ukwio.

¹⁸E ubimo mir Israel uwacu ni Yehocafat kumae, Ayero iri ngo nia ebiewo lembe ma ber ungo pira, ento raci?

¹⁹Man Mikaya wacu kumae, Ka kumeno winj lembe pa Yehova: Aneno Yehova bedo wi komker pare, man udul m’i polo ceke gicungo i ng’ete yo ku cinge ma yor acwic ku ma yor acam de.

²⁰E Yehova wacu kumae, Ng’a ma bibidho Ahab, kara eidh malu man epodh i Ramoth-gileadi? Man ng’atu acel uwacu kumae; man ng’atu mange wacu kumae.

²¹E tipo moko wok woko, man ecungo i wang’ Yehova, ewacu de kumae, Abibidhe.

²²E Yehova wacu ire kumae, Kud ang’o? Man ewacu kumae, Abiwok woko, man abibedo ni tipo mi ndra i dhu jubila pare ceke. Man ewacu kumae, Ibibidhe, man ibisagu bende: cidhi, man itim kumeca.

²³Ka kumeno kawono, nen, Yehova ketho tipo mi ndra i dhu jubila maeni ceke; man Yehova yero lembe ma rac piri.

²⁴Zedekia ma wod Kenana lund ubino ceng’ni, man epadu Mikaya i limbe, ewacu de kumae, Yo ma kani ma Tipo pa Yehova ai ko i bang’a kara ewec i beng’i?

²⁵Man Mikaya wacu kumae, Nen, ibineno i ceng’ maeca, kinde m’ibicidho i kusika ma yor i ie kara ipondi.

²⁶Man ubimo mir Israel uwacu kumae, Wumak Mikaya, man wutere cen ba Amon ma jabim mir adhura, man ba Yoac ma wod ubimo;

²⁷man wuwac kumae, Ubimo wacu kumae, Wuketh janduni i kol, man wumi ire kwen mi masendi ku pi mi masendi, cil m’abino ko ku kwiocwiny.

²⁸Man Mikaya wacu kumae, Tek idwogo ku kwiocwiny, nwang’u Yehova yero kuda ngo. Man ewacu kumae, Wuwinji, wu dhanu, kewu ceke.

²⁹Kum kumeno ubimo mir Israel ku Yehocafat m’ubimo mi Yuda giidho malu ba Ramoth-gilead.

³⁰Man ubimo mir Israel uwacu ni Yehocafat kumae, Abipala gira, man abicidho i lwiny: ento irony kendi peri mi ker. E ubimo mir Israel upale gire, man ecidho i lwiny.

³¹Nwang’u ubimo mi Cami ng’olo ni jego pier adek wi ario mi magali pare, ewacu kumae, Kud wukied ku dhanu ma thindho kadi ma dongo, ndhu kud ubimo mir Israel kende.

³²Man etimbre, kinde ma jego mi magali gineno Yehocafat, nia giwacu kumae, En e ubimo mir Israel andha; e gilokri cen kara gikied i kume: man Yehocafat ukok.

³³Man etimbre, kinde ma jego mi magali neno nia en e ubimo mir Israel ungo, nia gilokri gidwogo ku ba lubo ng’eye.

³⁴Man ng’atu moko kilo atum pare swa, man ekilo ubimo mir Israel i kind jamtho: kum kumeno ewacu ni jalek magali pare kumae, Lok cingi, man itera woko kud i udul; kum jukila rac.

³⁵E lwiny ucikusagu asaga i ceng’ maeca: man jujengo ubimo malu i magali pare kum Jucami, e etho uthieno; man rimo cwir kud i wang’ athero i the magali.

³⁶E jukok i kind udul ceke i kinde ma ceng’ ubepodho, juwacu kumae, Ku ba dhanu ceke ng’atuman ucidh bang’ adhura pare, man ku ba dhanu ceke ng’atuman ba ng’om ma thugi.

³⁷Kum kumeno ubimo tho, man jukele Samaria; e juyiko ubimo i Samaria.

³⁸E gilwoko magali ng’et kut mi Samaria; man gwogi ginang’u rimbe (nwang’u weg asara gijom keca); calku lembe pa Yehova m’eyero.

³⁹Nie dong’ tic pa Ahab, ku gin ceke m’etimo, man ot m’egomo ku lakliec, kud adhura ceke m’egomo, gigore i kitabu mi lemkei mir ubimo mir Israel ungo?

⁴⁰Kum kumeno Ahab unindo ku kwaru mire; man Ahazia ma wode camu ker kakare.

⁴¹Man Yehocafat ma wod Asa maku camu ker wi Yuda i rundi mir ang’wende pa Ahab m’ubimo mir Israel.

⁴²Yehocafat rundi pare pier adek wi abic kinde m’emaku camu ker; man ecamu ker rundi pier ario wi abic i Yerusalem. Man nying’ min mire Azuba ma nyar Cilhi.

⁴³Man ewotho i yo ceke pa Asa ma won mire; elokre cen ungo i kume, m’etimo ko gin m’atira i wang’ Yehova: ento ka ma malu jukabu woko ngo; dhanu gilamu lam giwang’u udok ma ng’wice ng’ar de i ka ma malu asu.

⁴⁴Man Yehocafat utimo kwiocwiny kud ubimo mir Israel.

⁴⁵Nie dong’ tic pa Yehocafat, ku tego pare ceke m’enyutho, man maram ekiedo ko, gigore i kitabu mi lemkei mir ubimo mi Yuda ngo?

⁴⁶Man dong’ jusodomi, m’udong’ i nindo pa Asa ma won mire, ekabu woko kud i ng’om.

⁴⁷Man ubimo moko mbe i Edom: ng’atu ma jukethe bedo ni ubimo.

⁴⁸Yehocafat utimo combo mi Tarcic kara ucidh Ofir pi mola ma kwar: ento gicidho ngo; kum combone tur i Ezion-geber.

⁴⁹Ahazia ma wod Ahab ulund uwacu ni Yehocafat kumae, Wek jutic para gicidh ku jutic peri i combo. Ento Yehocafat uyio ngo.

⁵⁰E Yehocafat unindo ku kwaru mire, man juyike ku kwaru mire i adhura pa Daudi ma kwaru mire; e Yehoram ma wode camu ker kakare.

⁵¹Ahazia ma wod Ahab umaku camu ker wi Israel i Samaria i rundi apar wi abirone pa Yehocafat m’ubimo mi Yuda, man ecamu ker rundi ario wi Israel.

⁵²Man etimo gin ma rac i wang’ Yehova, ewotho de i yo pa won, man i yo pa min, i yo pa Yeroboam de ma wod Nebat, m’eketho Israel udubo i ie.

⁵³Man etimo ni Bal, erwo ire de, man enyayu ng’ecwiny i Yehova, Mungu mir Israel, calku gin ceke ma won utimo.