Read Alur 1 Ubimo 4 Bible Online

1 Ubimo 4 - Alur bible

1 Ubimo 4

¹Man ubimo ma Suleman en e ubimo wi Israel ceke.

²Man maeni judongomawijo m’ebedo ko: Azaria ma wod Zadok, ma jalam;

³man Elihoref kud Ahija, ma wot Cica, ma jugorcik; man Yehocafat ma wod Ahilud, en e jagorlemkei;

⁴man Benaya ma wod Yehoiada en e wi udul; man Zadok kud Abiathar gi julam;

⁵man Azaria ma wod Nathan en e wi jego; man Zabud ma wod Nathan en e jatim ma jadit, man jarimb ubimo;

⁶man Ahicar en e wi juot; man Adoniram ma wod Abda en e jawi dhanu ma juketho kum tic mi olo.

⁷Man Suleman ubedo ku jego apar wi ario wi Israel ceke, ma joko cemo ni ubimo ku juode: kubang’gi kubang’gi ng’atuman joko dwi acel i rundi acel.

⁸Man maeni nying’gi: Ben-hur, i ng’om gudi pa Efraim;

⁹Ben-deker, i Makaz, man i Calbim, man Beth-cemec, man Elonbeth-anan,

¹⁰Ben-hesed, i Aruboth (Soko en e pare, man ng’om ceke pa Hefer);

¹¹Ben-abinadab, i ng’om m’utingre ceke mi Dor (ebedo ku Tafath ma nya Suleman ni dhaku);

¹²Bana ma wod Ahilud, i Tanak man Megido, ku Beth-cean ceke ma ni i ng’et Zarethan, the Yezrel, ugambre Beth-cean utundo kum Abel-mehola, cik loka Yokmeam;

¹³Bengeber, i Ramoth-gilead (pacu pa Yair ma wod Manase, ma ni i Gilead, en e pare; ng’om mir Argob bende en e pare, ma eni i Bacan, adhura pier abusiel ma dongo ku gang’kidi man utwindi mi mola);

¹⁴Ahinadab ma wod Ido, i Mahanaim;

¹⁵Ahimaz, i Naftali (en bende egamu Basemath ma nya Suleman ni dhaku);

¹⁶Bana ma wod Hucai, i Acer man Bealoth;

¹⁷Yehocafat ma wod Parua, i Isakar;

¹⁸Cimei ma wod Ela, i Benyamin;

¹⁹Geber ma wod Uri, i ng’om Gilead, ng’om pa Sihon m’ubimo mi Juamori man pa Og m’ubimo mi Bacan; man en e jego e kende m’eni i ng’ombe.

²⁰Yuda man Israel gi dupa calu kwio ma dhu nam ni udulgi, ma gibecamu gibemadhu de man gibetimo mutoro.

²¹Man Suleman ubimo wi ker ceke ugambre Kulo cil kum ng’om mi Jufilisti, man kum kieu mi Misiri: gikelo ajok, man gitimo ni Suleman i nindo ceke mi kwo pare.

²²Man ajok pa Suleman mi ceng’ acel en e mukero pier adek mi mogo ma yom, man mi cam mi mogo ma yom ungo mukero pier abusiel,

²³man koni dhiang’ m’ucwe apar, man koni dhiang’ ma kud i kwac pier ario, man rombe dak acel, umedo maeni thwon ruda, man thil, man thwon fura, ku gweno m’ufung’ni.

²⁴Kum ebimo wi ng’om ceke ma loka Kulo, ugambre Tifsa cil kum Gaza, wi ubimo ceke ma loka Kulo: man ng’om ukwio ire ng’ete ceke kun ku kun.

²⁵Man Yuda kud Israel gibedo museme, ku ba dhanu ceke ng’atuman the yendulok pare man the yendubolo pare, ugambre Dan cil kum Ber-ceba, i nindo ceke pa Suleman.

²⁶Man Suleman ubedo ku riuni mi magali pare dwol rubanga pier ang’wen, man weg riuni rubanga apar wi ario.

²⁷E jego maeno gicoko cemo ni ubimo ma Suleman, man ni dhanu ceke ma bino dhu mesa p’ubimo ma Suleman, ku ba dhanu ceke ng’atuman i dwi pare; giweko gin moko ngo m’urem.

²⁸Nganu bende ku soka mi riuni man riuni ma ringo pio gikelo i ka ma jego ni i ie, ku ba dhanu ceke ng’atuman calku lembang’ola pare.

²⁹Man Mungu mio rieko ku ng’eyong’ec dit apila ni Suleman, man adunde ma lac, cil calu kwio ma dhu nam.

³⁰Man rieko pa Suleman usagu rieko mi nyithindho ceke ma yo nyangu, ku rieko mi Misiri ceke.

³¹Kum e riek ma sagu dhanu ceke; ma sagu Ethan ma Jaezrahi, man Heman, ku Kalkol, man Darda, ma wot Mahol: man pire yik i thek ceke m’utieke gbur.

³²Man eyero lembrieko rubanga adek; man wer pare gi rubanga acel kud abic.

³³Man eyero pi yedhi, ugambre kum musonge ma ni i Lebanon cil kum alagi m’utwi kum gang’kidi: eyero bende pi yedi, man pi winyo, man pi gin ma lak i ng’om, man pi rec.

³⁴Man kind kodhidhanu ceke gibino kara giwinj rieko pa Suleman, ku bang’ ubimo ceke m’i ng’om, m’uwinjo pi rieko pare.