Read Alur 1 Ubimo 5 Bible Online

1 Ubimo 5 - Alur bible

1 Ubimo 5

¹Man Hiram m’ubimo mi Turo oro jutic pare ba Suleman; kum ewinjo nia juwire ni ubimo kaka won: kum Hiram en e jamer pa Daudi thiri thiri.

²Man Suleman uoro kwenda ba Hiram, ewacu kumae,

³Ing’eyo maram Daudi ma vwa copo gomo ot ungo i nying’ Yehova Mungu pare ni ali m’utieke gbur, maram Yehova ketho kogi the tiende.

⁴Ento kawono Yehova Mungu para mio ira yom i ng’eta kun ku kun; jadegi mbe, kadi lembe ma rac de.

⁵Man, nen, akeco ya agom ot pi nying’ Yehova Mungu para, calu Yehova yero ni Daudi ma vwa, ewacu kumae, Wodi, m’abikethe wi komker peri kakeri, ebigomo ot pi nyinga.

⁶Ka kumeno kawono ng’ol ya jutong’ ira yen musonge kud i Lebanon; man jutic para bibedo ku jutic peri; man abimio iri sukulia pi jutic peri calku lembe ceke m’ibiwacu: kum ing’eyo nia ng’atu moko mbe i kindwa m’ung’eyo ng’olo yen calu Jusidoni.

⁷Man etimbre, kinde ma Hiram uwinjo lembe pa Suleman, nia anyong’a nege dit, man ewacu kumae, Mugisa ni Yehova i ceng’ maeni, m’emio ni Daudi wode ma riek wi dhanu maeni ma dit.

⁸Man Hiram uoro kwenda ba Suleman, ewacu kumae, Awinjo kwenda m’ioro i bang’a: abitimo yeny ma ii yenyo ceke pi yend musonge, man pi yend sipre.

⁹Jutic para biterogi piny kud i Lebanon dhu nam; man abiribogi kum wadi kara ucidh yor i nam i ka m’ibing’olo ira, man abiketho jugonyogi keca, e ibigamugi; e ibitimo gin ma cande ni i kuma, m’ibimio ko cemo ni juot para.

¹⁰Kum kumeno Hiram umio yend musonge ku yend sipre ni Suleman calku yen ceke m’eyenyo.

¹¹Man Suleman umio nganu mukero rubanga pier ario ni Hiram ni cemo mi juode, man mukero pier ario mi mo ma leng’: Suleman umio kumeni ni Hiram ku ba rundi ku ba rundi.

¹²Man Yehova mio rieko ni Suleman, calu eng’olo ire; man kwiocwiny ni i kind Hiram ku Suleman; e gin ario giribo lembe karacelo.

¹³Man Suleman ujoko dhanu mi tic ma jumuli ko kud i kind Israel ceke; man jok mi dhanune en e dhanu rubanga pier adek.

¹⁴Man eorogi i Lebanon, ku ba dwi dhanu rubanga apar m’alawa; dwi acel gibedo i Lebanon, man dwi ario gibedo pacu: man Adoniram ni wi dhanu ma jukethogi kum tic ma jumuli ko.

¹⁵Man Suleman ubedo ku dhanu rubanga pier abiro ma yeyo ter, man rubanga pier abora ma payu yen kind gudi;

¹⁶umedo jego ma dongo pa Suleman ma gini wi tic, dhanu rubanga adek ku dak adek, ma gibimo wi dhanu ma timo tije.

¹⁷E ubimo ng’olo, man ging’enyo kidi ma dit, kidi ma pire tek, kara jutheb the ot ku kidi ma jung’enyo.

¹⁸Man jubodho pa Suleman ku jubodho pa Hiram ku Jugebali guilogi, man giyiko yen ku kidi mi gomo ode.