Read Alur 1 Ubimo 7 Bible Online

1 Ubimo 7 - Alur bible

1 Ubimo 7

¹Man Suleman ugomo ot pare gire rundi apar wi adek, man edaru ot pare ceke.

²Kum egomo ot mi luli mi Lebanon; kaborne bot dak acel, man kalacne bot pier abic, kadongone de bot pier adek, wi mbegi mi musonge m’uthero wang’ ang’wen, ku riu mi musonge wi mbegine.

³Man juume yo malu ku musonge wi riu pier ang’wen wi abic, ma gini wi mbegi; apar wi abic i wang’e acel.

⁴Man riu uthero wang’ adek, wang’ode ni yo ba wang’ode i wang’e m’uthero adek.

⁵Man dhugola ku ng’ete jutimo rom rom ku riu: man wang’ode ni yo kum wang’ode i wang’e m’uthero adek.

⁶Man etimo pondode ku mbegi; kaborne bot pier abic, man kalacne bot pier adek; man pondode ni i wang’gi; man mbegi ku kamondo de ni i wang’gi.

⁷Man etimo pondode mi komker ka m’ebipoko ie lembe, en e pondode mi lembapoka: man juume ku musonge ugambre i die kusikane cil i die kusikane mucelo.

⁸Man ot pare ka m’ebibedo i ie, lelagang’ mange ma ni yor i pondot, ebedo calku tic ma kumeni. Etimo ot ni nya Farao bende (ma Suleman ugamu ni dhaku), calu pondot maeni.

⁹Maeni ceke mi kidi ma ng’eiune tek, en e mi kidi m’akaka, calku porne, ma juthumo kud uligu, yor i ie ku yo woko, ugambre i kathere cu kum kidi ma malu, yo woko bende kumeca cil kum lelagang’ ma dit.

¹⁰Man kathere en e mi kidi ma ng’ieune tek, kidi ma dwong’, kidi mi bot apar, man kidi mi bot abora.

¹¹Man kidi ma pire tek ni yo malu, en e kidi m’akaka, calku porne, man yendmusonge,

¹²Man lelagang’ ma dit m’utieke gbur ubedo ku kidi m’akaka wang’ adek, man riu mi musonge thero wang’ acel; calu lelagang’ ma yor i ie mi ot pa Yehova, ku pondode.

¹³Man ubimo ma Suleman uoro kwenda man egamu Hiram kud i Turo.

¹⁴En e wod dhaku ma cware tho mi suru pa Naftali, man won mire en e dhanu mi Turo, e jabodho mi mola; man epong’ ku rieko man ng’eyong’ec ku riu, m’etimo ko tic ceke mi mola. Man ebino bang’ ubimo ma Suleman, man etimo tic pare ceke.

¹⁵Kum etimo mbegi ario mi mola, kadongone bot apar wi abora kubang’e kubang’e: man thol mi bot apar wi ario utieko mbegi maeni ku mucelo de gbur.

¹⁶Man etimo jambruko ma malu i wie mi mola m’alenya, kara eketh wi mbegi: jambruko acel kadongone bot abic, man kadongo mi jambruko mucelo de bot abic.

¹⁷Man voi mi tic mir ungoli nuti, man ukobre mi tic mi nyoro, ni jambruko ma ni wi lwith mbegi; ni jambruko acel abiro, man ni jambruko mucelo de abiro.

¹⁸Kum kumeno etimo mbegi; man wang’e ario dnoko tic mi voi acel, kara uum jambruko ma ni wi lwith mbegi: man etimo kumeni kum jambruko mucelo de.

¹⁹Man jambruko ma ni wi mbegi i pondot gibedo tic mi kura, bot ang’wen.

²⁰Man jambruko ni malu wi mbegi ario bende, ceng’ni ka m’uludo i ng’et tic mi voi: man nyingulemo dak ario, i wang’e m’udhoko jambruko mucelo.

²¹Man eguro mbegi i pondot mi hekalu: man eguro mbegi ma yor acwic, e elwong’o nyinge Yakin; man eguro mbegi ma yor acam, e elwong’o nyinge Boaz.

²²Man tic mi kura ni wi lwith mbegine: kum kumeno tic mi mbegine thum.

²³Man etimo nam m’athiedha kalacne gambre kum dhoge acel cil kum dhoge mucelo de bot apar, dhoge gbur ubedo kumeno, kathuthne bot abic; man thol ma bot pier adek utieke gour.

²⁴Man tiende ma ni dhok ucudo i kum dhoge m’utieke gbur, mi bot apar, m’utieko nam gbur: tiendedhok uthero wang’ ario, ma juthiedhogi kinde ma juthiedhe.

²⁵Ecungo wi koni dhiang’ apar wi ario, adek m’uneno yor ariwa ma malu, man adek m’uneno yo reto, adek de m’uneno yor ariwa ma piny, man adek m’uneno yo nyangu; man juketho nam i wigi ku malu, man yor i thegi ceke ni yor i ie.

²⁶Man dhoge ro ku laccing’; man jutimo dhoge calu dhu kikombe, calu thiu kura; man etero pi ma romo ajiku rubanga ario.

²⁷Man etimo there apar mi mola; there acel kaborne bot ang’wen, man kalacne bot ang’wen, kadongone de bot adek.

²⁸Man tic mi there bedo kumeni: gibedo ku jambruko; man jambruko ni i kind cwicne;

²⁹man ayi umvor, ku koni dhiang’, ku kerubi ni wi jambruko ma ni i kind cwicne; man giratwia ni malu wi cwicne; man ukobre mi tic m’ulekni ni ther ayi umvor ku koni dhiang’.

³⁰Man ku ba there ceke bedo kud ukobre ang’wen mi mola, ku gin ma ni i kind ukobrene mi mola; man akara ni the tiende ang’wen: man akara m’athiedha ni i the jamblogo, ku bang’ akara ceke de bedo kud ukobre mi thiuboko i ng’ete.

³¹Man kalac mi dhoge mi karukone ma yor i ie ku ma malu de en e bot acel: man dhoge twodre calku tim mir akara, bot acel ku katumbla; man gin m’angika ni wi dhoge bende, man ng’et jambrukone rom rom, adundo ngo.

³²Man ukobre ang’wen ni i the jambruko man riu mir ukobrene ni i there: man kadongo mir ukobrene bot acel ku katumbla.

³³Man tim mir ukobrene calu tim mir ukobre mi magali: riune, ku ng’ei ukobrene man thondhe, man uthaje ma yor i ie, gin ceke gibedo athiedha.

³⁴Man akara ang’wen ni i gunde ang’wen kubang’e kubang’e: akarane en e mi therene.

³⁵Man uthac ni wi there kadongone katumbla mi bot; man jambmak ku jambrukone ma ni wi there en e calku wadi.

³⁶Man eng’iko kerubi, kud ayi umvor, kud ayi thith, wi ban mi jambmakne, man wi jambrukone calku porne, kud ukobre mi thiuboko m’utieke gbur.

³⁷Etimo there apar calu maeni: kubang’gi ceke jutimogi wang’ acel, ku jampor acel, man ayi acel.

³⁸Man etimo jamblogo apar mi mola: jamblogo acel tero pi ma romo ajiku pier ang’wen; man ku ba jamblogo ceke en e bot ang’wen; man jamblogo acel ni wi there apar kubang’e kubang’e.

³⁹Man eketho there, abic i ng’et ot ma yor acwic, man abic i ng’et ot ma yor acam: man eketho nam i ng’et ot ma yor acwic yo nyangu, yor ariwa ma piny.

⁴⁰Man Hiram utimo jamblogo, kud upal mi kwer, man tabu. Kum kumeno Hiram udara tic ceke m’etimo ni ubimo ma Suleman i ot pa Yehova:

⁴¹mbegi ario, man tabu ario mi jambruko ma ni wi mbegine; man tim mi voi ario kara uum tabu ario mi jambruko ma ni i wi mbegine;

⁴²man ayi nyingulemo dak ang’wen pi tim mi voi ario; wang’e ario mir ayi nyingulemo pi tim mi voi kubang’e kubang’e, kara uum tabu ario mi jambruko ma ni i wi mbegine;

⁴³man there apar, ku jamblogo apar wi there;

⁴⁴man nam acel, kud ayi koni dhiang’ apar wi ario ni the nambe;

⁴⁵kud agulu, man upal mi kwer, man tabu: en e agulu maeni ceke, ma Hiram utimo ni ubimo ma Suleman, i ot pa Yehova, gi mi mola ma jutwagu.

⁴⁶Ubimo thiedhogi i pambu mi Yordan, i ng’om ulobo i kind Sukoth ku Zarethan.

⁴⁷Man Suleman uweko agulu ceke ma k’eporogi ngo, kum gi dupa m’usagu: pek mi mola copo nwangre ngo.

⁴⁸Man Suleman utimo agulu ceke ma ni i ot pa Yehova: ku pemblam mi mola ma kwar, man mesa mi mola ma kwar, ma kwen m’anyutha ni i wie;

⁴⁹man thethala, abic i ng’ete ma yor acwic, man abic yor acam, i wang’ kayerlembe, mi mola ma kwar ma leng’; man thiuboko, ku thala, ku makasi, mi mola ma kwar;

⁵⁰man kikombe, ku makasi, man tabu, ku lapau, man jamb mac, mi mola ma kwar ma leng’; man utwindi mi dhugola, mi ot ma yor i ie, ma en e ka ma leng’ m’usagu, man mi dhugola mi ot, ma en e hekalu, mi mola ma kwar.

⁵¹Kum kumeno tic ceke m’ubimo ma Suleman utimo i ot pa Yehova thum. Man Suleman ukelo gin ma Daudi ma won uthiero, en e mola ma tar, ku mola ma kwar, kud agulu, man ekethogi i kakanpiny mi ot pa Yehova.