Read Alur 1 Ubimo 8 Bible Online

1 Ubimo 8 - Alur bible

1 Ubimo 8

¹Suleman ulund ucoko judongo mir Israel, man wi suru ceke, judongomawijo mi udi pa wego mi nyithindho mir Israel, bang’ ubimo ma Suleman i Yerusalem, kara gikel sanduk mi lembariba pa Yehova malu ku i adhura pa Daudi, ma en e Sayuni.

²E dhanu ceke mir Israel gicokri gigi bang’ ubimo ma Suleman i agba, i dwi Ethanim, [4] ma en e dwi mir abirone.

³E judongo mir Israel ceke gibino, man julam giting’o sanduk.

⁴Man gikelo sanduk pa Yehova malu, ku hema mi cokri, kud agulu ceke ma leng’ ma ni i Hema; julam ku Julawi gikelo maeni malu.

⁵Man ubimo ma Suleman ku cokri ceke mir Israel, ma gicokri i bang’e, gini karacelo kude i wang’ sandukne, ma gibelamu rombe ku koni dhiang’, ma jucopo kwanu ngo kadi ng’eyo welne de ni udulne.

⁶Man julam gikelo sanduk mi lembariba pa Yehova i kakare, i kayerlembe mi ot, ba kamaleng’ m’usagu, en e the bomb kerubi.

⁷Kum kerubi giyaru bombgi wi kaka sanduk, man kerubi giumo sanduk ku yende ku malu.

⁸Man yende bedo bor hai ketho nia dhu yende nen kud i kamaleng’ i wang’ kayerlembe; ento ginen ungo ku yo woko: man gibedo keca cil i ceng’ ma tin.

⁹Gin moko mbe i sandukne ndhu bankidi ario ma Musa ketho keca i Horeb, kinde ma Yehova timo lembariba ku nyithindho mir Israel, kinde ma giai woko kud i ng’om Misiri.

¹⁰Man etimbre, kinde ma julam uai woko kud i kamaleng’, nia afuru pong’o ot pa Yehova,

¹¹ketho nia julam copo cungo ngo kum timo ni kum afurune; kum der pa Yehova pong’o ot pa Yehova.

¹²Suleman ulund uwacu kumae, Yehova wacu nia ebibedo i mudho ma bii.

¹³Agomo iri ot mi bedo andha, ka m’ibed i ie mi nja.

¹⁴Man ubimo loko wang’e, e emio mugisa ni cokri ceke mir Israel: man cokri ceke mir Israel ucungo.

¹⁵E ewacu kumae, Mugisa bed ni Yehova, Mungu mir Israel, m’eyero ku dhoge ni Daudi ma vwa, man eketho etimbre kakare ku cinge, m’ewacu kumae,

¹⁶Ugambre i ceng’ m’awodho ie dhanu para Israel woko kud i Misiri, agoyo wi adhura moko ngo, kud i suru ceke mir Israel ya jugom ie ot, kara nyinga bed keca; ento agoyo wi Daudi kara ebed wi dhanu para Israel.

¹⁷Nie ebedo i adunde Daudi ma vwa kara egom ot pi nying’ Yehova, Mungu mir Israel.

¹⁸Ento Yehova wacu ni Daudi ma vwa kumae, Kum ebedo i adundeni ya igom ot pi nyinga, itimo dre kum ebedo i adundeni:

¹⁹ento ibigomo ot ungo; ento wodi ma biai kud i i, e m’ebigomo ot pi nyinga.

²⁰Man Yehova ketho lembe m’eyero cungo; kum juting’a malu ka Daudi ma vwa, man ajany wi komker mir Israel, calu Yehova ng’olo, man agomo ot pi nying’ Yehova, Mungu mir Israel.

²¹Man aketho kaka sanduk keca ma lembariba pa Yehova ni i ie, m’etimo ku kwaruwagi, kinde m’ewodhogi woko kud i ng’om Misiri.

²²Man Suleman ucungo i wang’ pemblam pa Yehova i vut cokri ceke mir Israel, man ethang’u cinge yor i polo:

²³man ewacu kumae, E Yehova, Mungu mir Israel, Mungu moko mbe ma calu in, malu i polo, kadi piny i ng’om; m’ugwoko lembariba ku mer mi bero Jeu jutic peri, m’uwotho i weng’i kud adundegi ceke;

²⁴m’igwoko wuku jatic peri Daudi ma vwa lembe m’ing’olo ire: eyo, iyero ku dhogi, man itime kakare ku cingi, calu ebedo i ceng’ ma tin.

²⁵Ka kumeno kawono, E Yehova, Mungu mir Israel, gwok ku jatic peri ma Daudi ma vwa lembe m’ing’olo ire, m’iwacu kumae, Dhanu bibedo umbe ngo iri i wang’a m’ubed wi komker mir Israel, tek nyithindho peri giketho cwinygi kum yo migi kende, kara giwoth i wang’a calu iwotho i wang’a.

²⁶Ka kumeno kawono, E Mungu mir Israel, akwei, wek lembe peri bed andha, m’iyero ni jatic peri ma Daudi ma vwa.

²⁷Ento Mungu bibedo wi ng’om andha? nen, polo man polo m’i polo copo romi ngo; e ka ot maeni m’agomo biromi nenedi!

²⁸Ento nen ba rwo pa jatic peri, man ba kwac pare, E Yehova Mungu para, kara iwinj ba ywak ku rwo ma jatic peri berwo ko i weng’i tin;

²⁹kara weng’i bed ayaba yo ba ot maeni diewor ku dieceng’, en e ba ka m’iwacu pire kumae, Nyinga bibedo keca; kara iwinj ba rwo ma jatic peri birwo yo ba ka maeni.

³⁰Man iwinj kwac ma jatic peri kwayu, man mi dhanu peri Israel, kinde ma gibirwo yo ba ka maeni: eyo, winj i polo ma kabedo peri; man kinde m’iwinjo, wek lembe woko.

³¹Tek ng’atu moko dubo ni jadhugola pare, man tek juketho kwong’ i wie kara uketh ekwong’ kwong’, man ebino ekwong’o i wang’ pemblam peri i ot maeni;

³²ilund iwinj i polo, man itim, man ipok lembe mi jutic peri, m’igonj ko judubo, kara udwok yo pare i wie gire, m’igony ko lembe de ma wi weg bedopwe, kara imi ire calku bedopwe pare.

³³Kinde ma jugoyo dhanu peri Israel piny i wang’ jadegi, kum gidubo iri; tek gilokri kendo i beng’i, man gituco nyingi, e girwo man gikwei i ot maeni:

³⁴ilund iwinj kud i polo, man iwek dubo mi dhanu peri Israel, man idwokgi kendo i ng’om m’imio ni kwarugi.

³⁵Kinde ma polo kang’, man koth umbe, kum gidubo iri; tek girwo yo ba ka maeni, man gituco nyingi, gilokri de ni dubo migi, kinde m’ipcnjogi:

³⁶ilund iwinj kud i polo, man iwek dubo mi jutic peri woko, man mi dhanu peri Israel, kinde m’iponjogi ku yo ma ber ma maku giwoth i ie; man ior koth wi ng’om peri, m’imio ni dhanu peri ni aba.

³⁷Tek ndru bedo i ng’om, tek thong’om ubedo nuti, tek laimo kadi motho bedo nuti, bonyo de kadi ukokoubolo; tek jadegi migi tiekogi kud ali i ng’om mir adhura migi; thong’om moko ma tek nuti, tho moko de ma tek nuti;

³⁸rwo ku kwac moko ma tek ng’atu moko timo, kadi dhanu peri Israel ceke, ku ba dhanu ceke ma bing’eyo tho mir adundene gire, man ebithang’u cinge yo ba ot maeni:

³⁹ilund iwinj kud i polo ma kabedo peri, man iwek lembene woko, man itim, imi ni dhanu de kubang’gi kubang’gi ng’atuman calku yo pare, m’ing’eyo adundene; (kum in, in i kendi, ing’eyo adunde mi nyithi dhanu ceke;)

⁴⁰kara gilwori i nindo ceke ma gibedo ie i ng’om m’imio ni kwaruwa.

⁴¹Mange ke pi jawirok, ma en e mi dhanu peri Israel ungo, kinde m’ebiai kud i ng’om ma bor pi nyingi

⁴²(kum gibiwinjo pi nyingi ma dwong’, man pi cingi ma tek, man pi boti m’urieire); kinde m’ebibino man ebirwo yo ba ot maeni;

⁴³iwinj kud i polo ma kabedo peri, man itim calku gin ceke ma welo lwong’i pire; kara dhanu ceke m’i ng’om ging’ei nyingi, kara gilwori, calu dhanu peri Israel, man kara ging’ei nia ot maeni m’agomo ulwongre ku nyingi.

⁴⁴Tek dhanu peri cidho woko ni lwiny kum jadegi migi, ku yo moko ma tek ibiorogi, man girwo ni Yehova yo bang’ adhura m’igoyo wie, man yo ba ot m’agomo pi nyingi;

⁴⁵ilund iwinj rwo migi ku kwac migi kud i polo, man icung kum lembe migi.

⁴⁶Tek gidubo iri (kum ng’atu moko mbe ma dubo ngo), man ng’ecwiny unegi i kumgi, man imiogi ni jadegi, ketho nia giyakugi man giterogi ni ng’eca i ng’om pa jadegi, bor kadi ceng’ni;

⁴⁷ento tek gibipoi gigi i ng’om ma juterogi i ie ni ng’eca, man gilokri kendo, e gikwei i ng’om mi ju m’uterogi ni ng’eca, gibiwacu kumae, Wadubo, wacamu co, watimo rac;

⁴⁸tek gidwogo i beng’i kud adundegi ceke man ku ng’eyong’ec migi ceke i ng’om mi judegi migi, m’uterogi ni ng’eca, man girwo i beng’i yo ba ng’om migi, m’imio ni kwarugi, adhura m’igoyo wie, man ot m’agomo pi nyingi:

⁴⁹ilund iwinj rwo migi ku kwac migi i polo ma kabedo peri, man icung kum lembe migi;

⁵⁰man iwek lembe mi dhanu peri m’udubo iri, man dubo migi ceke ma gidubo ie iri; e imi igi ngisi i wang’ ju m’uterogi ni ng’eca, kara ngisi neggi i kumgi

⁵¹(kum gi dhanu peri, man aba peri, m’iwodho woko kud i Misiri, kud i dier uka mi nyunyu);

⁵²kara weng’i bed ayaba yo ba kwac pa jatic peri, man ba kwac mi dhanu peri Israel, kara iwinj gi i nindo ceke ma tek gilwong’i i ie.

⁵³Kum ikoyogi ku kind kodhi dhanu ceke m’i ng’om, kara gibed ni aba peri, calu iyero ku dhu Musa ma jatic peri, kinde m’iwodho kwaruwa woko kud i Misiri, E Rwoth Yehova.

⁵⁴Man ebedo kumeno, nia, kinde ma Suleman udaru timo rwo maeni ceke ku kwac ba Yehova, eai malu kud i wang’ pemblam pa Yehova, kud i rum ma wi conge m’ethang’u ko cinge yor i polo.

⁵⁵Man ecungo, e emio mugisa ni cokri ceke mir Israel ku dwande ma tek, ewacu kumae,

⁵⁶Mugisa ni Yehova, m’emio yom ni dhanu pare Israel, calku gin ceke m’eng’olo: lembe acel de mbe m’udong’ mi lembang’ola pare ceke ma ber, m’eng’olo ku dhu Musa ma jatic pare.

⁵⁷Yehova Mungu mwa bed kudwa, calu ebedo ku kwaruwa: kud ewekwa, kadi kud ekunwa;

⁵⁸kara enyeb adundewa i bang’e, kara wawoth i yo pare ceke, man kara watim lembang’ola pare, ku cik pare, ku lembapoka pare, m’eng’olo ni kwaruwa.

⁵⁹Man wek lembe para maeni, m’atimo kudo kwac i wang’ Yehova, ubed ceng’ni ba Yehova Mungu mwa dieceng’ ku diewor, kara ecung kum lembe pa jatic pare, man kum lembe mi dhanu pare Israel, calu ma cande bibedo nuti ceng’ ku ceng’;

⁶⁰kara kodhidhanu ceke m’i ng’om ung’ei nia Yehova, en e Mungu; mange mbe.

⁶¹Ka kumeno wuwek adundewu bed ndhu cu ku Yehova Mungu mwa, mi wotho i cik pare, man mi timo lembang’ola pare, calu i ceng’ ma tin.

⁶²Man ubimo, gikud Israel ceke, githiero lam i wang’ Yehova.

⁶³Man Suleman uthiero koni dhiang’ rubanga pier ario, ku rombe rubanga dak acel ku pier ario ni Yehova, ni lam mi kwiocwiny. Kum kumeno ubimo ku nyithindho mir Israel ceke githiero ot pa Yehova.

⁶⁴Ceng’ maeca ubimo dwoko die lelagang’ ma ni i wang’ot pa Yehova leng’; kum ethiero lam m’awang’a keca, ku lam mi mogo, ku mio mi lam mi kwiocwiny, kum pemblam mi mola ma ni i wang’ Yehova e nok hai mi romo ku lam m’awang’a, man lam mi mogo, ku mio mi lam mi kwiocwiny.

⁶⁵Kum kumeno Suleman uketho agba i nindo maeca, gikud Israel ceke, cokri ma dit, ugambre i kamondo mi Hamath cil kum kulo mi Misiri, i wang’ Yehova Mungu mwa, ceng’ abiro man ceng’ abiro, en e ceng’ apar wi ang’wen.

⁶⁶I ceng’ mir aborane elalu dhanu; man gimio mugisa ni ubimo, e gicidho ba hema migi ma mutoro kud anyong’a de nego adundegi kum bero ceke ma Yehova nyutho ni Daudi ma jatic pare, man ni Israel ma dhanu pare.