Read Alur 1 Ubimo 9 Bible Online

1 Ubimo 9 - Alur bible

1 Ubimo 9

¹Man etimbre, kinde ma Suleman udaru gomo ot pa Yehova, ku ot p’ubimo, man gin ceke ma cwiny Suleman uyenyo etim,

²nia Yehova nyuthre ni Suleman wang’ arionde, calu enyuthre ire i Gibeon.

³E Yehova wacu ire kumae, Awinjo rwo peri ku kwac peri, m’itimo i wang’a: adwoko ot maeni leng’, m’igomo, mi ketho nyinga keca mi nja; e wang’a kud adundena bibedo keca thiri thiri.

⁴Man piri in, tek ibiwotho i wang’a, calu Daudi ma wuru wotho, kud adundeni ma cu, man ku tic m’atira, ku timo calku gin ceke m’ang’olo iri, man ibiworo cik para ku lembapoka para;

⁵abilund ketho komker mi ker peri ucung wi Israel mi nja, calu ang’olo ni Daudi ma wuru, m’awacu kumae, Dhanu bibedo mbe ngo wi komker mir Israel.

⁶Ento tek wubilokru cen kum luba, wun kadi nyithindho mu, man wuworo lembang’ola para ngo ku cik para m’aketho i weng’wu, ento wubicidho wubitimo ni mungu mange, man wurwo i bang’gi;

⁷abilund kabu Israel woko kud i ng’om m’amio igi; man ot maeni, m’adwoko leng’ pi nyinga, abibayu woko kud i wang’a; man Israel bibedo ni lembabola ku koi i kind kodhidhanu ceke.

⁸Man kadok ot maeni wiu kumeni, ento ku ba dhanu ceke m’ukadhu kud i kume igi biwang’ li, man gibicayu acaya; gibiwacu de kumae, Yehova timo kumeni kum ng’om maeni nedi, man kum ot maeni?

⁹man gibiloko lembe kumae, Kum giweko Yehova Mungu migi, m’uwodho kwarugi woko kud i ng’om Misiri, man giketho cwinygi kum mungu mange, girwo i bang’gi de, man gitimo igi: ka kumeno Yehova kelo lembe ma rac maeni ceke i wigi.

¹⁰Man etimbre ka rundi pier ario thum, ma Suleman ugomo ie udi ario, ot pa Yehova man ot p’ubimo

¹¹(nie Hiram m’ubimo mi Turo mio yendmusonge ku yen sipre ni Suleman, ku mola ma kwar, calku yeny ma ie yenyo ceke), nia ubimo Suleman ulund umio adhura pier ario m’i ng’om Galilaya ni Hiram.

¹²Man Hiram uai kud i Turo kara enen adhurane ma Suleman umio ire; e efoyogi ngo.

¹³Man ewacu kumae, Adhura maeni en e adhura ma nedi m’imio ira, umira? Man elwong’ogi nia ng’om mi Kabul cil i ceng’ ma tin.

¹⁴Man Hiram uoro talanto mi mola ma kwar pier abusiel bang’ ubimo.

¹⁵Man maeni en e lembe m’uketho ubimo ma Suleman ujoko dhanu mi tic ma jumuli ko, kara ugom ot pa Yehova, ku ot pare gire, man Milo, ku gang’kidi mi Yerusalem, man Hazor, ku Megido, man Gezer.

¹⁶Farao m’ubimo mi Misiri idho malu, man emaku Gezer, ewang’e de ku mac, man enego Jukanani m’ubedo i adhurane, emie de ni makapiny ni nyare, ma ci Suleman.

¹⁷Man Suleman ugomo Gezer, ku Beth-horon ma piny,

¹⁸man Balath ku Tamar m’i langa, i ng’ombe,

¹⁹man adhura ceke mi kanupiny ma Suleman ubedo ko, kud adhura mi magali pare, man adhura mi weg riuni pare, ku maeno ma Suleman uyenyo egom ni muj toro pare i Yerusalem, man i Lebanon, kud i ng’om ceke mi ker pare.

²⁰Man pi dhanu ceke m’udong’ mi Juamori, man Juhiti, ku Juperizi, man Juhivi, ku Juyebusi, ma gi mi nyithindho mir Israel ungo;;

²¹nyithindho migi m’udong’ yo ng’eigi i ng’om, ma njathindho mir Israel ucopo nyothogi kot ungo, kind joca Suleman ujoko dhanune mi tic ma jumuli ko udoko ni jumiru cil i ceng’ ma tin.

²²Ento kind nyithindho mir Israel Suleman uketho moko ngo ni jumiru; ento gin gi dhanu mir ali, ku jutic pare, ku judongomawijo pare, man jego pare, ku jubim mi magali pare man mi weg riuni pare.

²³Maeni jego ma dongo ma ni wi tic pa Suleman, dak abic ku pier abic, m’ubimo wi dhanu m’utimo tic.

²⁴Ento nya Farao idho malu kud i adhura pa Daudi ba ot pare ma Suleman ugomo ire: i nindo maeca egomo Milo.

²⁵Wang’ adek i rundi acel Suleman uthiero lam m’awang’a ku lam mi kwiocwiny wi pemblam m’egomo ni Yehova, m’ewang’u ko udok ma ng’wice ng’ar karacelo kudo, wi pemblam ma ni i wang’ Yehova. Kum kumeno edaru ode.

²⁶E ubimo ma Suleman utimo udul combo i Ezion-geber, ma ni i ng’et Eloth, i dhu wath mi Nam Makwar i ng’om Edom.

²⁷Man Hiram uoro jutic pare i udul combo, en e junam m’ubedo ku ng’eyong’ec mi nam, karacelo ku jutic pa Suleman.

²⁸Man gibino ba Ofir, e gigamu mola ma kwar ku kuca, talanto dak ang’wen ku pier ario, man gikele bang’ ubimo ma Suleman.