Read Alur 2 Ubimo 12 Bible Online

2 Ubimo 12 - Alur bible

2 Ubimo 12

¹Yehoac umaku camu ker i rundi mir abirone pa Yehu; man ecamu ker rundi pier ang’wen i Yerusalem: man nying’ min mire Zibia ma Ber-ceba.

²Man Yehoac utimo gin m’ubedo atira i wang’ Yehova ku ba nindo pare ceke ma Yehoiada ma jalam uponje i ie.

³Ento jukabu ka ma malu woko ngo; dhanu gilamu lam asu man giwang’u udok ma ng’wice ng’ar i ka ma malu.

⁴Man Yehoac uwacu ni julam kumae, Sente ceke mi gin ma leng’ ma jukelo i ot pa Yehova, en e sente ma jutimo kudo tic, sente mi dhanu ma jukwanu wi dhanu kubang’gi kubang’gi, man sente ceke ma ng’atu moko yenyo ya ekel i ot pa Yehova,

⁵wek julam gigame i bang’gi, ku ba dhanu ceke ng’atuman ba ng’atu m’eng’eyo; e gibiyiko ko wang’ot m’umor, ka ma tek junwang’u ie kamoko m’umor.

⁶Ento ebedo kumeno, nia i rundi pier ario wi adege p’ubimo ma Yehoac nia julam fodi giyiko wang’ot m’umor ungo.

⁷Ubimo ma Yehoac ulund ulwong’o Yehoiada ma jalam, ku julam mange, man ewacu igi kumae, Nedi wuyiko wang’ot m’umor ungo? ka kumeno kawono kud wugam sente kendo ba ju ma wung’eyogi, ento wumie pi wang’ot m’umor.

⁸E julam giyio nia ku gigam sente kendo ba dhanu, kadok wang’ot m’umor de gibiyiko ngo.

⁹Ento Yehoiada ma jalam ugamu sanduk, man epiyo wi sandukne, e ekethe i ng’et pemblam, i ng’ete ma yor acwic ka jumondo i ot pa Yehova; e julam ma gwoko dhugola giketho sente ceke ma jukelo i ot pa Yehova i ie.

¹⁰Man ebedo kumeno, kinde ma gineno nia sente dit i sanduk, nia jagorcik p’ubimo man jalam ma jadit giidho malu, e gipiko i usau man gikwanu sente ma junwang’u i ot pa Yehova.

¹¹E gimio sente ma juporo i jampor i cing’ ju ma timo tic, ma gigwoko ot pa Yehova: man gimie ni jubodho mi bau ku jugom, ma gitimo wi ot pa Yehova,

¹²man ni jubodho mir ulobo ku jubodho mi kidi, man mi ng’iewo yen ku kidi m’akaka kara uyik wang’ot pa Yehova m’umor, man kum gin ceke m’ucidho kum ot kara uyike.

¹³Ento jutimo kikombe mi mola ma tar mi ot pa Yehova ngo, kadi makasi, kadi tabu, kadi agwara, kadi agulu moko mi mola ma kwar, kadi agulu mi mola ma tar, ku sente ma jukelo i ot pa Yehova;

¹⁴kum gimie ni ju m’utimo tic, m’uyiko kudo ot pa Yehova.

¹⁵Mange ke gikwanu ngo ku dhanu, ma gimio sente i cing’gi kara gimi ni ju m’utimo tic; kum gitimo mandha.

¹⁶Sente mi girathiera mi kier, man sente mi girathiera mi dubo, jukelo ngo i ot pa Yehova: en e mi julam.

¹⁷Hazael m’ubimo mi Cami lund uidho malu man ekiedo kum Gath, man emake; e Hazael uketho wang’e ya eidh malu Yerusalem.

¹⁸Man Yehoac m’ubimo mi Yuda gamu gin ma leng’ ceke ma Yehocafat ku Yehoram man Ahazia, ma kwaru pare, m’ubimo mi Yuda, uthiero, man gin ma leng’ pare gire, ku mola ma kwar ceke ma ginwang’u i kakanpiny mi ot pa Yehova, man mi ot p’ubimo, man eore ba Hazael m’ubimo mi Cami: e eai ku kum Yerusalem.

¹⁹Nie dong’ tic pa Yoac, man gin ceke m’etimo, gigore i kirabu mi lemkei mir ubimo mi Yuda ngo?

²⁰E jutic pare giai, man giporo lembe i kume, e gigoyo Yoac i ot pa Milo, i yo ma loro piny ba Sila.

²¹Kum Yozakar ma wod Cimeath, man Yehozabad ma wod Corner, ma jutic pare, gigoye, e etho; man giyike ku kwaru mire i adhura pa Daudi: man Amazia ma wode camu ker kakare.